మందుబాబులపై పోలీసుల కొరడా: రోడ్డు ప్రమాదాలపై స్పెషల్ డ్రైవ్స్

మల్కాజిగిరి ట్రాఫిక్ పోలీసులు ఈ వారాంతంలో మద్యం తాగి వాహనాలు నడిపే వారిపై (డ్రంక్ అండ్ డ్రైవ్) ప్రత్యేక తనిఖీలు నిర్వహించారు. ఈ తనిఖీల్లో 286 మంది మద్యం తాగి నిబంధనలను ఉల్లంఘించారని తేలడంతో వారిని అదుపులోకి తీసుకున్నారు. 251 మంది బైకర్లు, 9 మంది ఆటో డ్రైవర్లు, 26 మంది లారీ డ్రైవర్లు, నలుగురు భారీ వాహనాల డ్రైవర్లు మద్యం తాగి వాహనాలు నడుపుతూ డ్రంక్ అండ్ డ్రైవ్ పరీక్షల్లో దొరికారు. ఇందులో 259 మంది బ్లడ్ ఆల్కాహాల్ కంటెంట్ (బీఏసీ) స్థాయి 200 మిల్లీగ్రాములు ఉందని పరీక్షల్లో తేలింది. మరో 27 మంది డ్రైవర్లైతే పీకల దాకా డ్రైవింగ్ చేస్తున్నారని వెల్లడైంది.

గత వారంలో డ్రంక్ అండ్ డ్రైవ్ కేసుల్లో 30 మంది మందుబాబులకు కోర్టులు జైలుశిక్షతో పాటు జరిమానా విధించాయి.ఇద్దరికి జరిమానాతో పాటు సామాజిక సేవ చేయాలని కోర్టు ఆదేశించింది. మరో 186 మందికి కేవలం జరిమానా విధించింది.

హైదరాబాద్ ట్రాఫిక్ పోలీసులు మద్యం తాగి వాహనాలు నడపడంపై క్రమం తప్పకుండా ప్రత్యేక తనిఖీలను నిర్వహిస్తున్నారు. వారాంతాల్లో రెండు రోజుల పాటు జరిగే ఈ తనిఖీల్లో తరచుగా 300-400 మంది వాహనచోదకులను పోలీసులు పట్టుకుంటున్నారు. ఈ తనిఖీలలో చాలా మంది నేరస్థులకు జైలు శిక్షలు విధించగా, మరికొందరికి సామాజిక సేవ కేటాయించారు.ఏప్రిల్ నెలలో రెండు రోజుల ప్రత్యేక తనిఖీల్లో 343 కేసులు నమోదు చేశారు. మార్చి 6-7 తేదీల్లో జరిగిన దాడుల్లో 445 మంది వాహనదారులపై కేసులు నమోదు చేశారు. వీరిలో అధిక శాతం ద్విచక్ర వాహనదారులే.ఫిబ్రవరి 6-7 తేదీల్లో జరిగిన రెండు రోజుల ప్రత్యేక తనిఖీల్లో అధిక బ్లడ్ ఆల్కాహాల్ కంటెంట్ (BAC) స్థాయిలు కనుగొనటంతో 600 మందికి పైగా వాహనదారులపై కేసులు నమోదు చేశారు.

సైబరాబాద్ ట్రాఫిక్ పోలీసులు మద్యం తాగి వాహనాలు నడుపుతున్న వారిపై కొరడా ఝళిపించారు. ఇటీవల డ్రంక్ అండ్ డ్రైవ్‌లో ప్రతి వారాంతంలో 170కి పైగా కేసులు నమోదు చేశారు. వీటిలో అధికభాగం ద్విచక్ర వాహనాలకు సంబంధించినవే. నేరస్థులను తక్షణ చట్టపరమైన చర్యల కోసం కోర్టులో హాజరుపరుస్తున్నారు. మియాపూర్, శంషాబాద్, రాజేంద్రనగర్, గచ్చిబౌలి వంటి అధిక ప్రమాదం ఉన్న ప్రాంతాలను లక్ష్యంగా చేసుకుని తరచుగా పోలీసులు ప్రత్యేక డ్రైవ్‌లు నిర్వహిస్తున్నారు.చాలా మంది మందుబాబులు 21-40 సంవత్సరాల మధ్య వయస్సు గలవారని తేలింది.

ట్రాఫిక్ పోలీసులు ఎంత కఠిన చర్యలు తీసుకున్నా, ప్రజల్లో అవగాహన లేకపోతే ప్రమాదాలు తగ్గవు. ఒక క్షణిక నిర్లక్ష్యం జీవితాంతం బాధను మిగులుస్తుంది. కాబట్టి ప్రతి వాహనదారుడు నిబంధనలు పాటిస్తూ బాధ్యతతో డ్రైవింగ్ చేస్తేనే రోడ్డు ప్రమాదాలకు చెక్ పడుతుంది.