ఇమ్మడి రవి కస్టడీ రిపోర్ట్‌లో కళ్లు చెదిరే అంశాలు

టాలీవుడ్ ఇండస్ట్రీకి చుక్కలు చూపించిన వ్యక్తి ఇమ్మడి రవి కేసులో కీలక విషయాలు వెలుగుచూశాయి. పోలీసు కస్టడీ ముగించుకుని రిమాండ్‌లో చంచల్‌గుడ జైలులో ఉన్న రవిపై పోలీసులు రెడీ చేసిన కస్టడీ ఫైలులో ఔరా అనిపించే అంశాలు వెలుగు చూశాయి. ఈ రిపోర్ట్‌లో ఆయనపై పైరసీ, ఆన్‌లైన్ బెట్టింగ్, డబ్బు లావాదేవీలు వంటి అనేక కీలక అంశాలు వెల్లడయ్యాయి. పోలీసుల విచారణలో రవి సినిమా ప్రింట్లు రెండు రకాలుగా కొనుగోలు చేసినట్లు అంగీకరించాడు. నార్మల్ ప్రింట్‌కు 100 డాలర్లు, హెచ్‌డీ ప్రింట్‌కు 200 డాలర్లు చెల్లించినట్టు వివరించాడు. కోవిడ్ తర్వాత ఆన్‌లైన్ సినిమాలు చూడటం పెరగడంతో తన ఆదాయం భారీగా పెరిగిందని రవి తెలిపాడు.

పోలీసులు తమ పరిశీలనలో రవికి చెందిన 7 బ్యాంక్ ఖాతాలలో రూ.13.40 కోట్లు ఉన్నట్టు గుర్తించారు. ఇందులో రూ.1.78 కోట్లు ఆన్‌లైన్ బెట్టింగ్ ద్వారా వచ్చినవి. రవి తన సోదరి చంద్రికకు రూ.90 లక్షలు నగదుగా బదిలీ చేసినట్టు కూడా రిపోర్ట్‌లో ఉంది. మరింతగా, లావాదేవీలు ప్రధానంగా విదేశీ కరెన్సీలో జరిగాయని పోలీసుల వివరాలు చెబుతున్నాయి. హైదరాబాద్ కూకట్‌పల్లిలో రవి ఆఫీస్ నడిపి, పైరసీ కార్యకలాపాలకు 10 మందిని నియమించినట్టు పోలీసుల విచారణలో తేలింది. రాకేష్ అనే వ్యక్తి ద్వారా ట్రేడ్‌మార్క్ లైసెన్స్ పొందినట్టు, అలాగే బెట్టింగ్, పైరసీ ద్వారా వచ్చిన డబ్బుతో లగ్జరీ జీవితం గడిపినట్టు కూడా వెల్లడయింది.

కస్టడీలో రవి హైఫై పబ్‌లు, ఫైవ్ స్టార్ హోటళ్లలోనే ఖర్చు చేసి, సుమారు రూ.10 కోట్ల విలాసపు వ్యయం చేసినట్టు వివరించారు. ప్రస్తుతం రవి అకౌంట్లో రూ.3 కోట్లు ఫ్రీజ్ చేసినట్లు పోలీసులు తెలిపారు. రవి పైరసీ వెబ్‌సైట్లు, డూప్లికేట్ పోర్టల్స్ ద్వారా సినిమాలపై వ్యాపారం కొనసాగించాడు. ఫ్రాన్స్ నుంచి వీఆర్ ఇన్ఫోటెక్ కంపెనీ ఆధారంగా ఆ డొమైన్‌లు నిర్వహించినట్టు, ఐబొమ్మ వెబ్‌సైట్ కోసం పోస్టర్ డిజైన్ చేసిన వ్యక్తిని పోలీసులు అదుపులోకి తీసుకున్నారు. ఐబొమ్మ రవి సినిమా పరిశ్రమ, పోలీసుల ముప్పును ఎదుర్కొని, విలాసవంతమైన జీవితం గడిపినప్పటికీ, చేసిన నేరాలు బయటపడ్డాయని పోలీసుల కస్టడీ రిపోర్ట్ స్పష్టంగా చెబుతుంది.