రిటైర్డ్ ఉద్యోగుల పెన్షన్లను ఢిల్లీకి పంపిస్తున్నారు: ఈటల

రిటైర్డ్ ఉద్యోగుల పెన్షన్లను ఢిల్లీకి పంపిస్తున్నారని ఎంపీ ఈటల రాజేందర్ ఆరోపించారు. ఇందిరా పార్క్ వద్ద బీజేపీ ఆధ్వర్యంలో జరిగిన ధర్నాలో ఆయన ప్రభుత్వంపై తీవ్ర విమర్శలు గుప్పించారు. తెలంగాణ ప్రభుత్వ విశ్రాంత ఉద్యోగులు, ఉపాధ్యాయులకు రావాల్సిన బకాయిలను వెంటనే చెల్లించాలని ఆయన డిమాండ్ చేశారు. పీఆర్‌సీ 2020 బకాయిలను తక్షణమే విడుదల చేయాలని, డీఏ బకాయిలను వాయిదాలు లేకుండా ఒకేసారి ఇవ్వాలని కోరారు.

లీవ్ ఎన్కాష్మెంట్ చెల్లింపును ఆలస్యం చేయకూడదని పేర్కొన్నారు. 2024 మార్చి నుంచి రిటైర్ అయిన వారికి కూడా బకాయిలు ఇవ్వాలని చెప్పారు. జీపీఎఫ్, జీఐఎస్ నిధులను వడ్డీతో సహా చెల్లించాలని డిమాండ్ చేశారు. రిటైర్మెంట్ ప్రయోజనాల కోసం వృద్ధులు రోడ్డెక్కాల్సి రావడం బాధాకరమని అన్నారు. విద్యార్థులు ఆత్మహత్యలు చేసుకుంటున్న సమయంలో, రిటైర్డ్ ఉద్యోగులు ఇబ్బందులు పడుతున్న సమయంలో ప్రభుత్వం స్పందించడం లేదని విమర్శించారు. రాష్ట్ర వనరులను ఇతర అవసరాలకు మళ్లిస్తున్నారని ఆరోపించారు.

భూముల విక్రయాలపై కూడా ఆయన ప్రశ్నలు లేవనెత్తారు. ప్రజల కోసం కాకుండా ఇతర ప్రయోజనాల కోసం భూములను కేటాయిస్తున్నారని వ్యాఖ్యానించారు. పాత బకాయిల చెల్లింపు ప్రభుత్వ బాధ్యత అని గుర్తుచేశారు. ఉద్యోగ సంఘాలు ముందుకు రావాలని, అవసరమైతే పెద్ద స్థాయిలో ఉద్యమం చేపడతామని ఈటల రాజేందర్ హెచ్చరించారు. ప్రభుత్వం వెంటనే స్పందించి సమస్యను పరిష్కరించాలని కోరారు.