ఏఐ ప్రభావంపై సీఎం-శంతను కీలక చర్చ

గ్లోబల్ మాన్యుఫ్యాక్చరింగ్, గ్రీన్ ఎనర్జీ, ఉద్యోగాలపై ఏఐ ప్రభావం, స్కిల్లింగ్ మరియు రీస్కిల్లింగ్ అంశాలపై ముఖ్యమంత్రి ఎ. రేవంత్ రెడ్డి తో అడోబ్ సీఈఓ శంతను నారాయణ్ కీలకంగా చర్చించారు. హైదరాబాద్‌లో జరిగిన ఈ భేటీ రాష్ట్ర భవిష్యత్ దిశను ప్రతిబింబించింది. శంతను నారాయణ్ మర్యాదపూర్వకంగా ముఖ్యమంత్రిని కలిశారు. ప్రపంచవ్యాప్తంగా మారుతున్న ట్రెండ్స్, కొత్త అవకాశాలపై ప్రభుత్వం చేపట్టాల్సిన చర్యలను వివరించారు.

మాన్యుఫ్యాక్చరింగ్ రంగంలో తెలంగాణను శక్తివంతమైన కేంద్రంగా తీర్చిదిద్దాలని ముఖ్యమంత్రి అభిప్రాయపడ్డారు. ప్రముఖ సంస్థలను ఆకర్షించేలా వ్యూహాలు సిద్ధం చేయాల్సిన అవసరం ఉందన్నారు. గ్రీన్ ఎనర్జీ విస్తరణ, సాంకేతిక పరిణామాలు ఆర్థిక వ్యవస్థపై చూపే ప్రభావాన్ని సమీక్షించారు. ఏఐ విప్లవం ఉద్యోగ రంగాన్ని ఎలా ప్రభావితం చేస్తుందన్న దానిపై ప్రత్యేకంగా చర్చించారు.

యువతకు స్కిల్లింగ్, రీస్కిల్లింగ్ అత్యవసరమని భావించారు. రాబోయే రోజుల్లో ఏఐను సమర్థవంతంగా వినియోగించుకునే విధానాలపై అభిప్రాయాలు పంచుకున్నారు. తెలంగాణను అభివృద్ధి పథంలో ముందుకు నడిపేందుకు సాంకేతిక రంగం నుంచి మరింత సహకారం అవసరమని ముఖ్యమంత్రి కోరారు. సమావేశం తెలంగాణ రైజింగ్-2047 విజన్‌కు అనుగుణంగా కొనసాగింది.