ఆర్టీసీ సమ్మెపై ఉత్కంఠ.. 20 నుంచి సమ్మె సంకేతాలు

తెలంగాణలో ఆర్టీసీ సమ్మె ఉద్రిక్తత పెరుగుతోంది. ఈ నెల 20 నుంచి సమ్మెకు వెళ్లే సూచనలు కనిపిస్తున్నాయి. ఈ నేపథ్యంలో మంత్రి పొన్నం ప్రభాకర్ స్పందించారు. ఆర్టీసీకి సంబంధించిన రెండు కీలక అంశాలపై ప్రభుత్వం కమిటీ ఏర్పాటు చేసినట్లు వెల్లడించారు. కమిటీ నివేదిక వచ్చిన తర్వాత కార్మికులకు అనుకూలంగా నిర్ణయం తీసుకుంటామని తెలిపారు. ఆర్టీసీ విలీనం మరియు యూనియన్ అంశాలపై ప్రత్యేకంగా కమిటీ పని చేస్తున్నట్లు ఆయన వివరించారు. మిగతా సమస్యలను కూడా పరిష్కరించేందుకు ప్రభుత్వం సిద్ధంగా ఉందని స్పష్టం చేశారు. కార్మికులు ఆలోచించి నిర్ణయం తీసుకోవాలని, తొందరపడవద్దని విజ్ఞప్తి చేసినట్లు సమాచారం.

ఇక సమ్మెకు సిద్ధమవుతున్న ఆర్టీసీ కార్మికులు ఈరోజు సాయంత్రం 4 గంటలకు లేబర్ కమిషనర్‌తో చర్చలు జరపాలని నిర్ణయించారు. జేఏసీ పిలుపుతో పెద్ద సంఖ్యలో కార్మికులు కార్యాలయానికి చేరుకోవాలని ఏర్పాట్లు చేస్తున్నారు. ఈ చర్చల తర్వాత సమ్మె తేదీపై తుది నిర్ణయం తీసుకునే అవకాశం ఉంది. ప్రభుత్వం తమ డిమాండ్లపై స్పందించకపోతే ఈ నెల 20 నుంచి సమ్మె ప్రారంభించే దిశగా కార్మికులు ఆలోచిస్తున్నట్లు తెలుస్తోంది. ఇప్పటికే మార్చి 13న ఆర్టీసీ జేఏసీ యాజమాన్యానికి సమ్మె నోటీసు ఇచ్చిన విషయం గుర్తుచేసుకోవాలి. మొత్తంగా ఈ చర్చలు కీలకంగా మారాయి. ప్రభుత్వం మరియు కార్మికుల మధ్య ఒప్పందం కుదురుతుందా లేదా అన్నది రాబోయే గంటల్లో స్పష్టత వచ్చే అవకాశం ఉంది.