హైదరాబాద్ మెట్రోరైలు ఫేజ్–2 నిధుల కోసం రాష్ట్రం ముమ్మర యత్నాలు

- మరో వైపు తెలంగాణ రాష్ట్ర ప్రభుత్వం ఈ ఏడాది మార్చి నాటికి మెట్రోరైలు నిర్వహణ బాధ్యతలను ఎల్ అండ్ టి నుంచి తెలంగాణ సర్కారు టేకోవర్ చేయనుంది.

- తెలంగాణ రాష్ట్ర ప్రభుత్వం హైదరాబాద్ మెట్రోరైలు రెండో దశ ప్రాజెక్టు ప్రతిపాదనలను 2024 జనవరి 4వతేదీన కేంద్ర మినిస్ట్రీ ఆఫ్ హౌసింగ్ అండ్ అర్బన్ అఫైర్స్ కు పంపించింది. ఈ ప్రతిపాదనలకు ఆమోదం తెలిపి నిధులు కేటాయించాలని కోరుతూ తెలంగాణ సీఎం ఎ రేవంత్ రెడ్డి 2024 జనవరి 4వతేదీన లేఖ రిఫరెన్స్ నంబరు 10 పీఎస్ తో సీఎం కేంద్ర మంత్రికి లేఖ రాశారు.

అభివృద్ధి చెందుతున్న హైదరాబాద్ నగరంలో మెట్రో రెండో దశ పనులకు రూ.19,579 కోట్లను మంజూరు చేయాలని కోరుతూ తెలంగాణ రాష్ట్ర ప్రభుత్వం కేంద్రానికి ప్రతిపాదనలు పంపించింది.శంషాబాద్ లోని రాజీవ్ గాంధీ అంతర్జాతీయ విమానాశ్రయం (RGIA) నుంచి ఫ్యూచర్ సిటీ (స్కిల్స్ విశ్వవిద్యాలయం) వరకు 39.6 కిలోమీటర్ల దూరం మెట్రో కారిడార్ 9 విమానాశ్రయ లింక్ ను ప్రతిపాదించింది. సికింద్రాబాద్ లోని జూబ్లీ బస్ స్టేషన్ (JBS) నుంచి మేడ్చల్ వరకు 24.5 కిలోమీటర్ల దూరం మెట్రోరైలు కారిడార్ 10ను , జూబ్లీ బస్ స్టేషన్ (JBS) నుంచి శామిర్‌పేట వరకు 22 కిలోమీటర్ల దూరం మెట్రోరైలు 11వ కారిడార్ మార్గాన్ని నిర్మించాలని నిర్ణయించారు.

హైదరాబాద్ నగరంలో కనెక్టివిటీని పెంచేందుకు హైదరాబాద్ మెట్రో రైలు ప్రతిపాదిత దశ రెండో దశ విస్తరణ దోహదపడనుంది. కొత్త మెట్రోరైలు వృద్ధి కారిడార్‌ల నిర్మాణం వల్ల నగరంలో మౌలిక సదుపాయాలను బలోపేతం చేస్తుంది.హైదరాబాద్‌ను గ్లోబల్ సిటీగా చేయడంతోపాటు పెట్టుబడి ఆధారిత, పర్యావరణపరంగా స్థిరమైన మహానగరంగా వృద్ధి చేసేందుకు ఈ ప్రాజెక్టు ఉపకరించనుంది.ఈ ప్రాజెక్టు పూర్తి అయితే విమానాశ్రయ కనెక్టివిటీని బలోపేతం చేస్తుంది.దీంతోపాటు ప్రపంచ స్థాయి ప్రజా రవాణాతో ప్రపంచ నగరంగా హైదరాబాద్ నిలవనుంది.

హైదరాబాద్ మెట్రో ఫేజ్ 2 ప్రాజెక్టుపై తెలంగాణ రాష్ట్ర ప్రభుత్వం కేంద్ర ప్రభుత్వంతో నిరంతరం సంప్రదింపులు జరుపుతోంది. దీనిలో భాగంగా కేంద్ర పట్టణాభివృద్ధి మంత్రిత్వ శాఖ కోరిన అన్ని వివరాలను కూడా అందించిందని ముఖ్యమంత్రి ఎ రేవంత్ రెడ్డి చెప్పారు. సీఎం రేవంత్ రెడ్డి ఇటీవల కేంద్ర మంత్రి జి కిషన్ రెడ్డికి ఒక లేఖ రాశారు. ఈ మెట్రో ప్రాజెక్టుపై కేంద్రం ప్రతిపాదించిన ఉమ్మడి కమిటీలో ఇద్దరు అధికారులను నామినేట్ చేయాలని సీఎం కోరారు.మెట్రో రైలు రెండో దశ ప్రాజెక్టుకు మోక్షం కల్పించాలని కోరుతూ గత ఏడాది నవంబర్ 18, మళ్లీ డిసెంబర్ 3వ తేదీన సీఎం రేవంత్ రెడ్డి కేంద్ర పట్టణాభివృద్ధిశాఖ మంత్రిని కలిశారు.

హైదరాబాద్ మెట్రో రైలు కార్యకలాపాలను ఎల్ అండ్ టి నుంచి స్వాధీనం చేసుకోవడానికి తెలంగాణ ప్రభుత్వం స్పష్టమైన గడువును నిర్ణయించింది. ఈ ఏడాది మార్చి నాటికి పరివర్తన ప్రక్రియ పూర్తవుతుందని భావిస్తున్నారు.దీనిలోభాగంగా రాష్ట్ర ప్రధాన కార్యదర్శి కె.రామకృష్ణారావు సమీక్షించారు.ఎల్ అండ్ టి కార్యదర్శులు, అధికారుల కమిటీతో జరిగిన సమావేశంలో ప్రస్తుత ఆర్థిక సంవత్సరంలోనే మొత్తం పరివర్తన పూర్తి చేయాలని ప్రధాన కార్యదర్శి ఆదేశించారు.హైదరాబాద్ మెట్రో రైలు ప్రారంభించినప్పటి నుండి నగరంలో కీలకమైన ప్రజా రవాణా వ్యవస్థగా ఉంది. ఈ మౌలిక సదుపాయాల ప్రాజెక్టు యొక్క కార్యాచరణ నియంత్రణలో టేకోవర్ గణనీయమైన మార్పును సూచిస్తుంది.

ఎంఎంటీఎస్‌ రైళ్లు, మెట్రో రైలు, టీజీఎస్ ఆర్టీసీ బస్సు సేవలను అనుసంధానిస్తూ సమగ్ర ప్రజా రవాణా వ్యవస్థను రూపొందించేందుకు తెలగాణ రాష్ట్ర ప్రభుత్వం ప్రణాళిక ప్రారంభించింది. నగర ప్రయాణికులకు మొదటి,చివరి మైలు కనెక్టివిటీని మెరుగుపరచడం, రహదారి రద్దీని తగ్గించడం, ప్రజా రవాణా వినియోగాన్ని పెంపొందించడం ఈ ప్రణాళిక ప్రధాన లక్ష్యంగా నిర్దేశించారు. హైదరాబాద్‌లో మల్టీమోడల్‌ రవాణా వ్యవస్థ దిశగా ఇది కీలక ముందడుగు కానుంది. ఇందులో భాగంగా 51 ఎంఎంటీఎస్‌ స్టేషన్ల చుట్టుపక్కల అనుసంధాన రహదారులను విస్తరించాలని జీహెచ్‌ఎంసీని ప్రభుత్వం కోరింది. బస్‌స్టాప్‌లను ఎంఎంటీఎస్‌ స్టేషన్లకు మరింత దగ్గరగా మార్చడం,మెట్రో, ఎంఎంటీఎస్‌, ఆర్టీసీ బస్సులన్నింటికీ వర్తించే సమగ్ర టికెటింగ్‌ వ్యవస్థ ఏర్పాటు చేయాలని ప్రతిపాదించారు.

మొత్తానికి, మెట్రో రైలు రెండో దశకు కేంద్రం ఆమోదం లభిస్తే హైదరాబాద్ నగర రవాణా రంగంలో విప్లవాత్మక మార్పులు చోటుచేసుకునే అవకాశం ఉంది. కనెక్టివిటీ పెరగడంతో పాటు పెట్టుబడులు, ఉపాధి అవకాశాలు కూడా పెరుగుతాయని ప్రభుత్వం భావిస్తోంది.కేంద్రంతో జరుగుతున్న చర్చలు ఫలిస్తే మెట్రో ఫేజ్–2కు త్వరలోనే గ్రీన్ సిగ్నల్ లభించే అవకాశం ఉందని రాష్ట్ర ప్రభుత్వం ఆశాభావం వ్యక్తం చేస్తోంది. ఇప్పుడు అందరి చూపు కేంద్ర నిర్ణయంపైనే నిలిచింది.