ప్రభుత్వ ఉద్యోగుల జీతం కోతకు కేబినెట్ గ్రీన్ సిగ్నల్

తెలంగాణలో కీలక నిర్ణయాలతో క్యాబినెట్ ముందుకు వచ్చింది. తాజాగా జరిగిన సమావేశంలో తల్లిదండ్రుల సంక్షేమానికి సంబంధించిన జీతం కోత బిల్లుకు ఆమోదం తెలిపింది. ఇదే సమయంలో రోహిత్ వేముల చట్టంపై కూడా కీలక నిర్ణయం తీసుకుంది. ముఖ్యమంత్రి రేవంత్ రెడ్డి అధ్యక్షతన సోమవారం అసెంబ్లీ కమిటీ హాల్‌లో జరిగిన క్యాబినెట్ సమావేశంలో ఈ నిర్ణయాలు తీసుకున్నట్లు సమాచారం. వృద్ధాప్యంలో ఉన్న తల్లిదండ్రులను పట్టించుకోని ప్రభుత్వ ఉద్యోగుల జీతాల్లో కోత విధించే బిల్లును ప్రస్తుత అసెంబ్లీ సమావేశాల్లో ప్రవేశపెట్టేందుకు సిద్ధమైంది.

ఈ బిల్లు ప్రకారం, ఉద్యోగుల జీతం నుంచి 15 శాతం లేదా రూ.10 వేల వరకు కోత విధించనున్నారు. ఈ రెండింటిలో తక్కువ మొత్తాన్ని తల్లిదండ్రుల బ్యాంకు ఖాతాల్లో జమ చేయాలని నిర్ణయించారు. ఇప్పటికే అసోంలో అమలులో ఉన్న ‘ప్రణామ్’ చట్టాన్ని ఆదర్శంగా తీసుకున్నట్లు తెలుస్తోంది. ఈ అంశంపై ముఖ్యమంత్రి గతేడాది అక్టోబర్‌లో ఒకసారి, ఈ ఏడాది సంక్రాంతి ముందు మరోసారి స్పష్టం చేసినట్లు అధికారులు గుర్తు చేశారు. బడ్జెట్ సెషన్‌లోనే బిల్లును తీసుకురావాలని ప్రభుత్వం నిర్ణయించినట్లు సమాచారం.

ఇందుకు సంబంధించి గతంలో శాంతికుమారి రూపొందించిన నివేదికతో పాటు, ఇటీవల చీఫ్ సెక్రటరీ రామకృష్ణారావు నివేదికను కూడా ప్రభుత్వం పరిశీలించినట్లు తెలిసింది. అనంతరం ఫైనాన్స్ శాఖ రూపొందించిన ముసాయిదా బిల్లుపై చర్చించి క్యాబినెట్ ఆమోదం తెలిపింది. వృద్ధాప్యంలో ఉన్న తల్లిదండ్రులను నిర్లక్ష్యం చేసే వారిపై చట్టపరమైన చర్యలు అవసరమనే ఉద్దేశంతో ఈ నిర్ణయం తీసుకున్నట్లు ప్రభుత్వ వర్గాలు పేర్కొన్నాయి.

తల్లిదండ్రుల రోజువారీ అవసరాలకు ఆర్థిక సహాయం అందేలా చూడాలనే లక్ష్యంతో ఈ బిల్లు తీసుకువస్తున్నట్లు వివరించారు. ఇప్పటికే ‘ప్రణామ్’ పేరుతో డే కేర్ సెంటర్లు ఏర్పాటు చేసిన విషయాన్ని కూడా గుర్తుచేశారు. ఇదే సమావేశంలో విద్యాసంస్థల్లో కుల వివక్షను అరికట్టేందుకు రోహిత్ వేముల చట్టంపై ముందడుగు వేసింది. ఈ చట్టాన్ని అమలు చేసేందుకు అవసరమైన విధివిధానాలను రూపొందించాలని క్యాబినెట్ నిర్ణయించింది.

డిప్యూటీ సీఎం మల్లు భట్టి విక్రమార్క అధ్యక్షతన మంత్రివర్గ ఉపసంఘాన్ని ఏర్పాటు చేయాలని ఆమోదించింది. ఈ ఉపసంఘంలో మంత్రులు దామోదర రాజనరసింహ, దుద్దిళ్ల శ్రీధర్ బాబు, ఉత్తమ్ కుమార్ రెడ్డి, పొన్నం ప్రభాకర్ సభ్యులుగా ఉండనున్నారు. ఉపసంఘం రూపొందించే విధివిధానాలను ప్రభుత్వం పరిశీలించి తదుపరి నిర్ణయం తీసుకోనుంది. మొత్తంగా ఈ నిర్ణయాలు రాష్ట్రంలో సామాజిక సంక్షేమం మరియు సమానత్వానికి దిశగా తీసుకున్న చర్యలుగా భావించబడుతున్నాయి.