ఎస్ఐఆర్ అంతా తప్పుల తడక.. ఢిల్లీలో భట్టి ఫైర్
ఎస్‌ఐఆర్‌లో అక్రమాలు జరిగాయంటూ ఢిల్లీలో కాంగ్రెస్ నిరసన. సీఈసీ జ్ఞానేశ్ కుమార్ రాజీనామా చేయాలని భట్టి విక్రమార్క డిమాండ్ చేశారు.
స్పెషల్ ఇంటెన్సివ్ రివిజన్(ఎస్ఐఆర్)పై కాంగ్రెస్ నేతలు తీవ్ర విమర్శలు చేశారు. ఈ ప్రక్రియ అంతా తప్పుల తడకలా ఉందని తెలంగాణ డిప్యూటీ సీఎం భట్టివిక్రమార్క ఘాటు వ్యాఖ్యలు చేశారు. ఎస్‌ఐఆర్‌కు వ్యతిరేకంగా ఢిల్లీలో జరుగుతున్న నిరసనల్లో ఏఐసీసీ పిలుపుతో సోమవారం తెలంగాణ కాంగ్రెస్ నేతలు ఢిల్లీలో నిరసనకు దిగారు. ముఖ్యమంత్రి రేవంత్ రెడ్డి, ఉప ముఖ్యమంత్రి భట్టి విక్రమార్క, టీపీసీసీ అధ్యక్షుడు మహేశ్ గౌడ్, మంత్రి శ్రీధర్ బాబు, వీహెచ్‌తో పాటు పలువురు మంత్రులు, ఎంపీలు, ఎమ్మెల్యేలు ఈ ఆందోళనలో పాల్గొన్నారు. ఈ సందర్భంగానే భట్టి విక్రమార్క కీలక వ్యాఖ్యలు చేశారు. ఎస్ఐఆర్ ప్రక్రియలో అక్రమాలు జరుగుతున్నాయంటూ కాంగ్రెస్ సహా ఇండియా కూటమి నేతలు కేంద్రంపై ఆగ్రహం వ్యక్తం చేస్తున్నారు.
ఎన్నికల సంఘం బీజేపీకి అనుకూలంగా వ్యవహరిస్తోందని ఇండియా కూటమి నేతలు ఆరోపించారు. ఎస్ఐఆర్ ప్రక్రియలో లోపాల వల్ల ఓటర్ల జాబితాలో అవకతవకలు జరుగుతున్నాయని విమర్శించారు. బీజేపీకి అనుకూలమైన ఓట్లను తొలగించకుండా, తమకు వ్యతిరేకంగా ఉన్న ఓట్లను తొలగిస్తున్నారన్నది వారి ప్రధాన ఆరోపణ. ఈ వ్యవహారంతో దేశంలో ఓటు చోరీ జరుగుతోందని కాంగ్రెస్ అగ్రనేతలు ఆందోళన వ్యక్తం చేశారు. ఎన్నికల సంఘం తీరుతో ప్రజాస్వామ్యానికి నష్టం జరుగుతోందని విమర్శించారు. జంతర్ మంతర్ వద్ద జరిగిన నిరసనకు కాంగ్రెస్ శ్రేణులు పెద్ద సంఖ్యలో తరలివచ్చాయి. గత మూడు రోజులుగా ఢిల్లీలో ఈ అంశంపై ఆందోళనలు కొనసాగుతున్నాయి.
జ్ఞానేశ్ కుమార్ రాజీనామా చేయాల్సిందే!
ప్రధాన ఎన్నికల కమిషనర్ జ్ఞానేశ్ కుమార్ వెంటనే రాజీనామా చేయాలని ఇండియా కూటమి నేతలు డిమాండ్ చేశారు. ఆయన పదవి నుంచి తప్పుకునే వరకు నిరసనలు కొనసాగిస్తామని స్పష్టం చేశారు. కేంద్ర ప్రభుత్వం ఎన్నికల సంఘం వ్యవహారంపై స్పందించాలని, సీఈసీని పదవి నుంచి తొలగించాలని కోరారు. కాంగ్రెస్ అగ్రనేతలు రాహుల్ గాంధీ, ప్రియాంక గాంధీ, మల్లికార్జున ఖర్గేతో పాటు ఇతర ప్రతిపక్ష నేతలు కూడా కేంద్ర ప్రభుత్వంపై విమర్శలు చేశారు. ఇండియా కూటమిలోని వివిధ పార్టీల నాయకులు, కార్యకర్తలు నిరసనకు మద్దతుగా పాల్గొన్నారు.
ఓటు హక్కు రక్షణ కోసమే పోరాటం: భట్టి విక్రమార్క
ఏఐసీసీ ఇచ్చిన ‘ఛలో ఢిల్లీ’ పిలుపు మేరకే తాము నిరసనలో పాల్గొన్నామని ఉప ముఖ్యమంత్రి భట్టి విక్రమార్క తెలిపారు. రాహుల్ గాంధీ పిలుపుతో ఢిల్లీకి వచ్చినట్లు చెప్పారు. ప్రజాస్వామ్యానికి ఓటు హక్కు బలమైన పునాది అని పేర్కొన్నారు. ఎస్ఐఆర్ పేరుతో బీజేపీ మాత్రమే గెలిచేలా అక్రమాలు చేస్తున్నారని భట్టి ఆరోపించారు. కేంద్రం ఓటు హక్కును హరిస్తోందని విమర్శించారు. ఈ పోరాటం కాంగ్రెస్ పార్టీ కోసం కాదని, ప్రతి ఒక్కరి ఓటు హక్కును కాపాడేందుకేనని స్పష్టం చేశారు. ప్రజాస్వామ్య పరిరక్షణ కోసం అందరూ ముందుకు రావాలని పిలుపునిచ్చారు. ప్రధాన ఎన్నికల కమిషనర్ జ్ఞానేశ్ కుమార్ రాజీనామా చేయాలని డిమాండ్ చేశారు.
భారీ భద్రత మధ్య నిరసనలు
జంతర్ మంతర్ వద్ద నిరసనల నేపథ్యంలో పోలీసులు ఆంక్షలు విధించారు. ఉద్రిక్త పరిస్థితులు తలెత్తే అవకాశం ఉండటంతో భారీ భద్రత ఏర్పాటు చేశారు. కేంద్ర ప్రభుత్వానికి వ్యతిరేకంగా ప్రతిపక్షాల ఆందోళనలు కొనసాగుతున్న నేపథ్యంలో, ఎస్ఐఆర్ ప్రక్రియపై లేవనెత్తిన ఆరోపణలు, ఎన్నికల సంఘం స్పందన ఇప్పుడు రాజకీయంగా కీలకంగా మారాయి.
