తెలంగాణ విద్యా కమిషన్ రిపోర్ట్ తొలగింపు వివాదం

తెలంగాణ విద్యా కమిషన్ నివేదికను అధికారిక వెబ్‌సైట్ నుంచి తొలగించారు అధికారులు. దీంతో వివాదం మరింత ముదిరింది. ఆకునూరి మురళి నేతృత్వంలో తయారైన ఈ నివేదికను అప్‌లోడ్ చేసిన 24 గంటల్లోనే డిలీట్ చేయడం ప్రస్తుతం చర్చనీయాంశంగా మారింది. ఫిబ్రవరి 26, 2026న రాష్ట్ర విద్యా విధానం-2026 నివేదికను ముఖ్యమంత్రికి సమర్పించారు.

విద్యా వ్యవస్థలో మార్పుల కోసం రూపొందించిన ఈ నివేదికలో కొన్ని కీలక సిఫార్సులు ఉన్నాయి. టీచర్ల వేతనాల తగ్గింపు, ప్రమోషన్లకు పరీక్షలు, TG EAPCET రద్దు చేసి ఇంటర్ మార్కుల ఆధారంగా అడ్మిషన్లు ఇవ్వడం, గురుకులాల తగ్గింపు వంటి ప్రతిపాదనలు చేర్చబడ్డాయి. అలాగే పాస్ మార్కులను 35 శాతం నుంచి 45 శాతానికి పెంచాలని కూడా సూచించారు.

నివేదికను తరువాత తెలంగాణ విద్యా కమిషన్ వెబ్‌సైట్‌లో అప్‌లోడ్ చేశారు. అయితే రిపోర్టులో అనేక తప్పులు ఉన్నాయని విమర్శలు వచ్చాయి. పేజీలు మిస్ కావడం, పేజీ నెంబర్లు జంబ్లింగ్ కావడం వంటి లోపాలు ఉన్నట్లు సోషల్ మీడియాలో చర్చ జరిగింది. దీంతో నివేదిక గందరగోళంగా ఉందని పలువురు విమర్శించారు. ఈ విమర్శల మధ్యే రిపోర్టును వెబ్‌సైట్ నుంచి తొలగించారు. నివేదికను సరిగా తయారు చేయకపోతే రాష్ట్ర విద్యా విధానాన్ని ఎలా నిర్ణయిస్తారని కొందరు ప్రశ్నించినట్లు సమాచారం.

నివేదికలోని సిఫార్సులపై రాజకీయంగా కూడా విమర్శలు వచ్చాయి. ఉపాధ్యాయుల వేతనాలపై చేసిన ప్రతిపాదనలు అభ్యంతరకరంగా ఉన్నాయని బీఆర్‌ఎస్ నేత ఆర్‌.ఎస్‌. ప్రవీణ్ కుమార్ వ్యాఖ్యానించినట్లు తెలిపారు. నివేదికను పూర్తిగా తిరస్కరించాలని ఆయన డిమాండ్ చేసినట్లు పేర్కొన్నారు. ఉపాధ్యాయుల జీతాల తగ్గింపు ప్రతిపాదనపై కేంద్ర మంత్రి బండి సంజయ్ కుమార్ కూడా తీవ్ర అభ్యంతరం వ్యక్తం చేసినట్లు సమాచారం.

ఇక నివేదికపై వస్తున్న విమర్శలను ఆకునూరి మురళి ఖండించినట్లు తెలిసింది. తన నివేదికను పూర్తిగా చదవకుండా విమర్శలు చేస్తున్నారని ఆయన పేర్కొన్నట్లు సమాచారం. విద్యా రంగ అభివృద్ధి కోసం ఈ నివేదిక రూపొందించబడిందని, దీనిని రాజకీయ అంశంగా మార్చకూడదని ఆయన అభిప్రాయపడ్డట్లు వెల్లడైంది. ప్రస్తుతం నివేదికలోని అంశాలను పరిశీలించేందుకు కే. కేశవరావు నేతృత్వంలో ఒక కమిటీ ఏర్పాటు చేసినట్లు తెలుస్తోంది. నివేదికపై చర్చలు కొనసాగుతున్న నేపథ్యంలో తదుపరి నిర్ణయాలు ఎలా ఉంటాయన్నది ఆసక్తికరంగా మారింది.