జనసేన కీలక నిర్ణయం.. తెలంగాణలో రద్దు

తెలంగాణలో పార్టీని బలోపేతం చేయడానికి ఏపీ డిప్యూటీ సీఎం, జనసేన పార్టీ అధ్యక్షుడు పవన్ కల్యాణ్ ప్రయత్నాలు షురూ చేశారు. క్షేత్ర స్థాయి నుంచి పార్టీని బలోపేతం చేయాలని శ్రేణులకు సూచించారు. ఈ క్రమంలోనే తెలంగాణ జనసేన విషయంలో పవన్ కల్యాణ్ కీలక నిర్ణయం తీసుకున్నారు. తెలంగాణ రాష్ట్ర కమిటీలను రద్దు చేస్తున్నట్లు వెల్లడించారు. పవన్ ఆదేశాల మేరకే ఈ నిర్ణయాన్ని అమలు చేస్తున్నట్లు పార్టీ ప్రధాన కార్యదర్శి రామ్ తుళ్లూరి తెలిపారు. జీహెచ్ఎంసీ, వీరమహిళ, యువజన, విద్యార్థి విభాగాలను రద్దు చేశారు. కాగా వాటి స్థానంలో కొందరు సభ్యులతో అడ్ హక్ కమిటీలను నియమించనున్నట్లు తెలిపారు. ఈ అడ్ హక్ కమిటీలను తాత్కాలికంగా ఏర్పాటు చేస్తున్నట్లు పవన్ వివరించారు. ఈ కమిటీలు 30 రోజుల పాటు పనిచేస్తాయని తెలిపారు.

ఈ కమిటీలు జీహెచ్‌ఎంసీ పరిధిలోని 300 వార్డుల్లో పర్యటించనున్నాయి. కనీసం ఐదుగురు సభ్యులతో జాబితాలను సిద్ధం చేసి పార్టీ కార్యాలయానికి అందజేయనున్నారు. ఆ తర్వాత పార్టీని సంస్థాగతంగా బలోపేతం చేసే దిశగా నూతన కమిటీలను ప్రకటిస్తామని తెలిపారు. ఈ మేరకు జనసేన పార్టీ అధికారిక ఆదేశాలను విడుదల చేసింది. వచ్చే సార్వత్రిక ఎన్నికల నాటికి తెలంగాణ రాష్ట్రంలో జనసేన పార్టీని ఒక బలమైన ప్రత్యామ్నాయ రాజకీయ శక్తిగా తీర్చిదిద్దే లక్ష్యంతో ఈ కమిటీలు పనిచేయనున్నాయని తెలియజేస్తున్నారు.