మున్సిపల్ పోలింగ్.. టాప్ ప్లేస్‌లో చౌటుప్పల్

తెలంగాణ మున్సిపల్ ఎన్నికలు ప్రశాంత వాతావరణంలో ముగిశాయి. సాయంత్రం ఐదు గంటలకు పోలింగ్ ప్రక్రియ ముగియగా, క్యూలో ఉన్న ఓటర్లకు రాత్రి ఏడు గంటల వరకు అవకాశం కల్పించారు. రాష్ట్రవ్యాప్తంగా మొత్తం 73.01 శాతం పోలింగ్ నమోదైనట్లు అధికారులు వెల్లడించారు. ఏడు కార్పొరేషన్లలో 66.05 శాతం పోలింగ్ నమోదైంది. 116 మున్సిపాలిటీల్లో 75.88 శాతం ఓటింగ్ నమోదైంది. అత్యధికంగా చౌటుప్పల్‌లో 91.91 శాతం పోలింగ్ నమోదవగా, అత్యల్పంగా నందికొండ మున్సిపాలిటీలో 59.68 శాతం నమోదైంది.

ఎన్నికలను ప్రశాంతంగా నిర్వహించడంలో పోలీసు సిబ్బంది అంకితభావం కీలకమైందని డీజీపీ శివధర్ రెడ్డి పేర్కొన్నారు. ఆధునిక వెబ్‌కాస్టింగ్ సాంకేతికత కూడా సహాయపడిందని ఆయన తెలిపారు. రాష్ట్రవ్యాప్తంగా 8,203 పోలింగ్ కేంద్రాలకు భద్రత కల్పించామని చెప్పారు. వీటిలో 1,302 కేంద్రాలను హైపర్ సెన్సిటివ్‌గా, 1,926ను సెన్సిటివ్‌గా, 4,975ను సాధారణంగా గుర్తించి పరిస్థితులకు అనుగుణంగా బలగాలను మోహరించామని వివరించారు. పలు ప్రాంతాల్లో వృద్ధులు ఓటు వేయడానికి పోలీసు సిబ్బంది సహాయం చేసినట్లు ఆయన తెలిపారు.

ఉమ్మడి వరంగల్ జిల్లాలో 12 మున్సిపాలిటీల్లో జరిగిన పోలింగ్ చిన్నచిన్న ఘటనలు మినహా ప్రశాంతంగా ముగిసింది. మొత్తం 260 వార్డులకు 1,073 మంది అభ్యర్థులు పోటీపడ్డారు. ఉదయం ఏడు గంటలకు మందకొడిగా ప్రారంభమైన పోలింగ్ మధ్యాహ్నానికి ఊపందుకుంది. సాయంత్రం ఐదు గంటల వరకు అక్కడ 84 శాతం పోలింగ్ నమోదైనట్లు అధికారులు ప్రకటించారు.

మహబూబాబాద్‌లో కాంగ్రెస్ అభ్యర్థి పోలింగ్ కేంద్రం సమీపంలో ప్రచారం చేస్తున్నాడని ఆరోపిస్తూ బీఆర్ఎస్ అభ్యర్థి దాడి చేసిన ఘటన చోటుచేసుకుంది. భూపాలపల్లిలో బీఆర్ఎస్ అభ్యర్థి తరపున ఓ వ్యక్తి డబ్బులు పంచుతుండగా పోలీసులు అతడిని అదుపులోకి తీసుకున్నారు. వర్ధన్నపేట మున్సిపాలిటీ డీసీ తండాలో పోలింగ్ సరళిని పరిశీలించేందుకు వెళ్లిన కాంగ్రెస్, బీఆర్ఎస్ నేతలపై స్థానికులు ఆగ్రహం వ్యక్తం చేశారు.

ఉమ్మడి వరంగల్ జిల్లాలో ములుగు 80.41 శాతం, పరకాల 80.16, స్టేషన్ ఘనపూర్ 84.47, జనగామ 70.06, వర్ధన్నపేట 86.23, నర్సంపేట 85.21, భూపాలపల్లి 65.18, తొర్రూరు 77.99, డోర్నకల్ 81.35, మరిపెడ 85.76, మహబూబాబాద్ 75.60, కే సముద్రం 86.14 శాతం పోలింగ్ నమోదు చేశాయి. మొత్తంగా రాష్ట్రవ్యాప్తంగా ప్రశాంత వాతావరణంలో పోలింగ్ పూర్తవడం గమనార్హం. ఇప్పుడు ఫలితాలపై రాజకీయ వర్గాల్లో ఆసక్తి నెలకొంది.