మున్సిపల్ బరిలో 28 వేల మంది.. ప్రచారానికి రంగం సిద్ధం
తెలంగాణ మున్సిపల్ ఎన్నికల్లో కాంగ్రెస్ స్టార్ క్యాంపెయినర్ల జాబితా విడుదలైంది. 28,456 నామినేషన్లు దాఖలై ప్రచారం వేగం పెరగనుంది.
మున్సిపల్ ఎన్నికలకు తెలంగాణ ముస్తాబవుతోంది. నామినేషన్ల స్వీకరణ ప్రక్రియ కూడా ముగిసింది. ఈ ఎన్నికల్లో ఎలాగైనా గెలవాలని రాజకీయ పార్టీలు కూడా తమ వ్యూహాలకు పదును పెడుతున్నాయి. అతిరథ మహారథుల లాంటి నేతలను ప్రచార రంగంలోకి దించుతున్నాయి.
తెలంగాణలో 116 మున్సిపాలిటీలు, 7 కార్పొరేషన్లకు రెండో మున్సిపల్ ఎన్నికలు ఫిబ్రవరి 11న జరగనున్నాయి. ఫలితాలు ఫిబ్రవరి 13న ప్రకటించనున్నారు. నామినేషన్ ప్రక్రియ ముగిసిందని పరిశీలన తర్వాత ఫిబ్రవరి 3న తుది అభ్యర్థుల జాబితా విడుదల కానుంది. జీహెచ్ఎంసీ ఈ షెడ్యూల్లో లేకపోవడం గమనార్హం. దాని పదవీకాలం ఫిబ్రవరి 10న ముగియనుండటంతో పాటు భవిష్యత్తులో మూడు కార్పొరేషన్లుగా విభజించే అవకాశాలు ఉన్నట్లు సమాచారం.
నామినేషన్ల చివరి రోజున భారీ రద్దీ కనిపించింది. మొత్తం 28,456 మంది అభ్యర్థులు నామినేషన్లు దాఖలు చేశారు. మొదటి రెండు రోజుల్లో 9,276 నామినేషన్లు వస్తే చివరి రోజైన శుక్రవారం ఒక్కరోజే 19,180 దాఖలయ్యాయి. కాంగ్రెస్, బీఆర్ఎస్, బీజేపీతో పాటు ఆప్, తెలంగాణ రాజ్యాధికార పార్టీ, బీఎస్పీ అభ్యర్థులు కూడా పోటీలోకి దిగారు. నామినేషన్ దశ ముగియడంతో శనివారం నుంచి ప్రచారం వేగం పెరగనుంది.
రంగంలోకి మంత్రులు
తెలంగాణలో మున్సిపల్ ఎన్నికల హడావిడి మరింత పెరిగింది. తాజా అప్డేట్గా తెలంగాణ ప్రదేశ్ కాంగ్రెస్ కమిటీ రాబోయే ఎన్నికల కోసం స్టార్ క్యాంపెయినర్ల జాబితాను విడుదల చేసింది. ఇందులో సీఎం రేవంత్ రెడ్డి, డిప్యూటీ సీఎం భట్టి విక్రమార్క మల్లు పేర్లు ఉన్నాయి. ఈ జాబితాలో మొత్తం 20 మంది నేతలు ఉండగా నీటిపారుదల మంత్రి ఉత్తమ్ కుమార్ రెడ్డి, ఆరోగ్య మంత్రి దామోదర్ రాజనరసింహ, ఐటీ మంత్రి శ్రీధర్ బాబు కూడా చోటు దక్కించుకున్నారు.
ఆర్ అండ్ బీ మంత్రి కోమటిరెడ్డి వెంకట్ రెడ్డి, రవాణా మంత్రి పొన్నం ప్రభాకర్, మహిళా శిశు సంక్షేమ మంత్రి సీతక్క, దేవాదాయ శాఖ మంత్రి కొండా సురేఖ స్టార్ క్యాంపెయినర్లుగా ఎంపికయ్యారు. మైనారిటీస్ మంత్రి అజారుద్దీన్, వ్యవసాయ మంత్రి తుమ్మల నాగేశ్వరరావు, రెవెన్యూ-హౌసింగ్ మంత్రి పొంగులేటి శ్రీనివాస్ రెడ్డి, పర్యాటక మంత్రి జూపల్లి కృష్ణారావు, కార్మిక మంత్రి వివేక్ వెంకటస్వామి, గిరిజన సంక్షేమ మంత్రి ఆద్లూరి లక్ష్మణ్ కుమార్ కూడా జాబితాలో ఉన్నారు.
బరిలోకి రాజకీయ కుటుంబాలు
ఈ ఎన్నికల్లో రాజకీయ కుటుంబాల పాల్గొనడం కూడా కనిపించింది. మహబూబాబాద్లో మాజీ బీఆర్ఎస్ ఎమ్మెల్యే శంకర్ నాయక్ కుమార్తె తేజస్విని వార్డు 20 నుంచి నామినేషన్ వేశారు. చిట్యాల మున్సిపాలిటీలో ట్రాన్స్జెండర్ అభ్యర్థి నాగిళ్ల సుధాకర్ అలియాస్ కావేరి వార్డు 1 నుంచి పోటీ చేస్తున్నారు. భూపాలపల్లి మున్సిపాలిటీలో రెండు బీఆర్ఎస్ దంపతులు వేర్వేరు వార్డుల నుంచి బరిలోకి దిగారు. నిర్మల్లో మూడు జంటలు నామినేషన్లు దాఖలు చేశాయి.
కొన్ని చోట్ల రాజకీయ ఉద్రిక్తతలు కూడా చోటుచేసుకున్నాయి. నల్గొండ జిల్లా చాందూర్లో కాంగ్రెస్ టికెట్ దక్కలేదని బి.వేణు అనే వ్యక్తి ఆత్మహత్యాయత్నానికి పాల్పడ్డట్లు సమాచారం. హుజూరాబాద్లో బీజేపీ అంతర్గత పోటీ కనిపించగా కొత్తగూడెం కార్పొరేషన్లో కాంగ్రెస్-సీపీఐ సీటు సర్దుబాటు ఖరారు కాకపోవడంతో రెండు పార్టీలు ఎక్కువ వార్డుల్లో అభ్యర్థులను నిలబెట్టాయి.
సూర్యాపేటలో కర్నల్ సంతోష్ బాబు తల్లి బిక్కుమల్ల మంజుల బీఆర్ఎస్ టికెట్పై వార్డు 44 నుంచి నామినేషన్ వేశారు. మిర్యాలగూడలో కాంగ్రెస్ ఎమ్మెల్యే బత్తుల లక్ష్మారెడ్డి కుటుంబ సభ్యులు కూడా నామినేషన్లు దాఖలు చేశారు. నామినేషన్ ప్రక్రియ పూర్తవడంతో తెలంగాణ పట్టణ ప్రాంతాల్లో ఎన్నికల ప్రచారం మరింత ఉత్కంఠగా కొనసాగనున్నట్లు రాజకీయ వర్గాలు భావిస్తున్నాయి.
