బడ్జెట్‌లో తెలంగాణకు మొండి చేయి : డిప్యూటీ సీఎం భట్టి విక్రమార్క

కేంద్ర ప్రభుత్వం ప్రవేశపెట్టిన 2026–27 బడ్జెట్‌లో తెలంగాణను పూర్తిగా నిర్లక్ష్యం చేశారని డిప్యూటీ సీఎం భట్టి విక్రమార్క మల్లు తీవ్రంగా విమర్శించారు. రాష్ట్రానికి రావాల్సిన నిధులను కేటాయించకుండా వివక్ష చూపించిందని, సాగునీటి ప్రాజెక్టులు, మౌలిక వసతులు, వ్యవసాయం, ఉపాధి హామీ వంటి కీలక రంగాలను కేంద్రం పట్టించుకోలేదని ఆయన ఆరోపించారు. కేంద్రం బడ్జెట్ లో తెలంగాణకు మొండి చేయి చూపించిందని ఆయన దుయ్యబట్టారు. రాష్ట్రాల ఆదాయ వాటాను కేంద్రం తగ్గించిందని, నిధుల కేటాయింపులో తెలంగాణ పట్ల వివక్ష చూపించిందని ఆయన పేర్కొన్నారు. తెలంగాణలో సాగునీటి ప్రాజెక్టుల పట్ల కేంద్రం నిర్లక్ష్యం చూపించిందని ఆయన చెప్పారు. వ్యవసాయాభివృద్ధికి, రైతుల సంక్షేమానికి నిధులు ఇవ్వలేదని ఆయన ఆవేదన వ్యక్తం చేశారు. ఒకవైపు రాష్ట్రానికి నిధులు ఇవ్వక పోగా మరో వైపు సెస్ పెంపు ద్వారా రాష్ట్రాల ఆదాయ వాటాను తగ్గించారని భట్టి విమర్శించారు.