ఆంధ్ర శాసనమండలిలో ‘టీటీడీ నెయ్యి’ మంటలు

టీటీడీ నెయ్యి సరఫరా అంశం ఆంధ్రప్రదేశ్ శాసనమండలిలో రాజకీయంగా పెద్ద చర్చకు దారి తీసింది. ఇందాపూర్ డెయిరీ, హెరిటేజ్ పేర్లతో ప్రారంభమైన ఈ వివాదం తాజాగా సభ స్తంభన వరకు వెళ్లింది. టీటీడీ లడ్డూ తయారీలో వినియోగించే నెయ్యి సరఫరా వ్యవహారంపై స్పష్టత కోరుతూ ప్రతిపక్షం గట్టిగా నిలబడింది. బుధవారం సమావేశాలు ప్రారంభం కాగానే మాజీ ఎంపీ రత్నాబాయి, మాజీ ఎమ్మెల్సీ ఐలాపురం వెంకయ్య మృతిపై సంతాపం తెలిపారు.

సభ్యులు రెండు నిమిషాల మౌనం పాటించారు. సభలో శాంత వాతావరణం కనిపించినా, బయట రాజకీయ ఉద్రిక్తత పెరిగింది. వైఎస్సార్‌సీపీ సభ్యులు నినాదాలతో ర్యాలీగా మండలికి చేరుకున్నారు. భోలేబాబా, హెరిటేజ్ సంస్థల పేర్లు ప్రస్తావిస్తూ నిరసన వ్యక్తం చేశారు. టీటీడీకి నెయ్యి సరఫరా ఒప్పందాలపై సమగ్ర చర్చ జరపాలని డిమాండ్ చేశారు.

వాయిదా తీర్మానం తిరస్కరణ.. ప్రతిపక్ష ఆందోళన

ఇందాపూర్ డెయిరీ అంశంపై చర్చించాలని కోరుతూ రెండో రోజు కూడా వాయిదా తీర్మానం ఇచ్చారు. టీటీడీకి సరఫరా అవుతున్న నెయ్యి మూలం, విధానం, ఒప్పందాలపై వివరాలు వెల్లడించాలని కోరారు. అయితే మండలి చైర్మన్ తీర్మానాన్ని అనుమతించలేదు. దీంతో సభలో నినాదాలు వినిపించాయి. గందరగోళం నెలకొంది. పరిస్థితి అదుపులోకి రావడానికి సమావేశాన్ని కొంతసేపు వాయిదా వేశారు.

చర్చను తప్పించడానికే లోకేష్ యత్నం: లేళ్ల అప్పిరెడ్డి

మంత్రి నారా లోకేష్ చేసిన వ్యాఖ్యలు చర్చను మరింత వేడెక్కించాయి. పార్టీ మారిన ఎమ్మెల్సీలు బల్లి కళ్యాణ్ చక్రవర్తి, మర్రి రాజశేఖర్‌లను వైఎస్సార్‌సీపీ సభ్యులుగా ప్రస్తావించడం తగదని ఎమ్మెల్సీ లేళ్ల అప్పిరెడ్డి అన్నారు. వారు ఇప్పటికే టీడీపీ కండువాలు కప్పుకున్నారని స్పష్టం చేశారు. వారితో వాయిదా తీర్మానం ఇప్పించి, దాన్ని వైఎస్సార్‌సీపీపై మోపడం సరికాదని పేర్కొన్నారు. ప్రభుత్వం చర్చను తప్పించుకుంటోందని విమర్శించారు.

చర్చకు సిద్ధమా, సవాల్

టీటీడీ లడ్డూ తయారీలో వినియోగించే నెయ్యి సరఫరా విషయంలో పారదర్శకత అవసరమని వైఎస్సార్‌సీపీ పేర్కొంది. ఇందాపూర్ డెయిరీ పేరుతో హెరిటేజ్ నెయ్యి సరఫరా చేస్తున్నారనే ఆరోపణలపై స్పష్టమైన సమాధానం ఇవ్వాలని డిమాండ్ చేసింది. ప్రభుత్వానికి నిజంగా టీటీడీ పట్ల చిత్తశుద్ధి ఉంటే సభలో సమగ్ర చర్చకు రావాలని సవాల్ విసిరింది.