వైభవంగా కపిలేశ్వర స్వామి బ్రహ్మోత్సవాలు

తిరుపతిలో శ్రీ కపిలేశ్వర స్వామివారి వార్షిక బ్రహ్మోత్సవాలను ఫిబ్రవరి 8 నుంచి 17 వరకు వైభవంగా నిర్వహించేందుకు టీటీడీ విస్తృత ఏర్పాట్లు చేస్తోంది. తాజా సమీక్షలో జేఈవో వి. వీరబ్రహ్మం అధికారులకు కీలక సూచనలు చేశారు. మంగళవారం ఆలయంలో బ్రహ్మోత్సవ ఏర్పాట్లపై జేఈవో అధికారులతో సమావేశం నిర్వహించారు.

ఉత్సవాలకు ముందు ఫిబ్రవరి 4న కోయిల్ ఆళ్వార్ తిరుమంజనం జరగనున్న నేపథ్యంలో సన్నాహాలు పూర్తిచేయాలని తెలిపారు. ఫిబ్రవరి 15న మహాశివరాత్రి సందర్భంగా పెద్ద సంఖ్యలో భక్తులు వచ్చే అవకాశం ఉందని పేర్కొన్నారు. వారికి అన్నప్రసాదాలు, బాదంపాలు నిరంతరాయంగా అందించాలని సూచించారు. భక్తులను ఆకట్టుకునేలా ఆధ్యాత్మిక సంగీత కార్యక్రమాలు ఏర్పాటు చేయాలని అధికారులను ఆదేశించారు. ఆలయ పుష్కరిణిని పరిశుభ్రంగా ఉంచాలని చెప్పారు.

పెయింటింగ్, రంగోళీలు, విద్యుత్ అలంకరణలు, పుష్పాలంకరణలు ఆకర్షణీయంగా చేయాలని తెలిపారు. వాహనాల మరమ్మత్తులు పూర్తి చేయాలని సూచించారు. క్యూలైన్లు పటిష్టంగా నిర్వహించాలని, తిరుపతి నగరంలోని ప్రధాన కూడళ్లలో ఆర్చ్‌లు ఏర్పాటు చేయాలని చెప్పారు. భక్తులకు అసౌకర్యం కలగకుండా చలువ పందిళ్లు, తాగునీరు, అన్నప్రసాదాల ఏర్పాట్లు సకాలంలో పూర్తి చేయాలని స్పష్టం చేశారు.

పారిశుధ్యానికి ప్రాధాన్యం ఇస్తూ అదనపు సిబ్బంది నియామకం చేయాలని తెలిపారు. తదుపరి ఆలయంలో కొనసాగుతున్న అభివృద్ధి పనులు, క్యూలైన్లను జేఈవో పరిశీలించి పలు సూచనలు చేశారు. ఈ సమీక్షలో ఆలయ అర్చకులు, ప్రత్యేక అధికారి డి. ఫణి కుమార్ నాయుడు, రవాణా విభాగం జీఎం శేషారెడ్డి, గార్డెన్ డిప్యూటీ డైరెక్టర్ శ్రీనివాసులు, ఈఈ మల్లికార్జున్, ఇతర అధికారులు పాల్గొన్నారు. బ్రహ్మోత్సవాలు భక్తులకు సౌకర్యవంతంగా జరిగేలా టీటీడీ అన్ని చర్యలు తీసుకుంటున్నట్లు అధికారులు తెలిపారు.