ఎన్నికల తర్వాత పార్లమెంట్‌లో కేరళ వాణి వినిపించేలా చేస్తాం: మోదీ

బిజెపి నేతృత్వంలోని ఎన్‌డిఎ అభ్యర్థుల కోసం ప్రధాని మోదీ త్రిస్సూర్‌లో సోమవారం (ఏప్రిల్ 15) ఎన్నికల ప్రచారం నిర్వహించారు. లోక్‌సభ ఎన్నికల తర్వాత పార్లమెంటులో కేరళ వాణి వినిపించేలా చూస్తానన్నారు.

కేరళలో ఇది పురోగతి సంవత్సరమని పేర్కొన్న మోదీ ఆదివారం (ఏప్రిల్ 14) విడుదల చేసిన బిజెపి మ్యానిఫెస్టోలో అంశాలను ప్రస్తావించారు.

NDA ప్రభుత్వం మూడోసారి అధికారంలోకి వచ్చిన తర్వాత అహ్మదాబాద్ ముంబై మధ్య బుల్లెట్ రైలు మాదిరిగానే ఉత్తర, తూర్పు దక్షిణ భారతదేశంలో బుల్లెట్ రైళ్లు నడపడానికి సర్వే ప్రారంభిస్తానని ప్రధాని హామీ ఇచ్చారు.

ప్రపంచ చిత్రపటంలో భారతదేశాన్ని బలహీనమైన ఇమేజ్‌గా చూయించారని, అదే సమయంలో బిజెపి బలమైన దేశంగా తయారుచేసిందని కాంగ్రెస్‌పై దాడి చేశారు.

వామపక్షాలు అడ్డుపడుతున్నాయి..

గత 10 ఏళ్ల ఎన్డీయే పాలనలో దేశంలో జరిగినదంతా కేవలం ట్రైలర్ మాత్రమేనని, కేరళకు, భారత్‌కు ఇంకా చాలా చేయాల్సి ఉందన్నారు.

దక్షిణాది రాష్ట్రంలో కేంద్రం చేపడుతున్న అభివృద్ధి కార్యక్రమాలకు వామపక్ష ప్రభుత్వం అడ్డుపడుతోందని, గతంలో అధికారంలో ఉన్న ఇతర రాష్ట్రాల్లో మాదిరిగా కేరళను కూడా లెఫ్ట్ ఫ్రంట్ నాశనం చేస్తుందని ఆరోపించారు.

కరువనూరు సహకార బ్యాంకు కుంభకోణాన్ని ప్రస్తావిస్తూ, పేదల సొమ్మును వామపక్షాలు దోచుకుంటున్నాయని ఆరోపిస్తూ రాష్ట్రంలోని సీపీఐ(ఎం) నేతృత్వంలోని ప్రభుత్వంపై మోదీ దాడి చేశారు.

కున్నంకులంలో ఆయన బహిరంగ సభతో పాటు మధ్యాహ్నం తిరువనంతపురం జిల్లా కట్టక్కడలో మరో సభ ఉంటుంది.

కేరళలో ఆరో పర్యటన..

మోదీ చివరిసారిగా మార్చి 19న కేరళకు వచ్చారు. అతను పాలక్కాడ్ జిల్లాలో భారీ రోడ్ షో నిర్వహించారు. మార్చి 15 న పతనంతిట్ట పట్టణంలో బహిరంగ సభలో పాల్గొన్న తరువాత, దక్షిణ కేరళ నియోజకవర్గాలలో పోటీ చేస్తున్న NDA అభ్యర్థులతో కలిసి ఎన్నికల ర్యాలీ నిర్వహించారు.

అంతకు ముందు జనవరిలో రెండుసార్లు, ఫిబ్రవరిలో ఒకసారి రాష్ట్రానికి వచ్చారు. అప్పట్లో అధికారిక, పార్టీ కార్యక్రమాలు రెండింటిలోనూ పాల్గొన్నారు.

కేరళలో సార్వత్రిక ఎన్నికలకు ఏప్రిల్ 26న మొత్తం 20 నియోజకవర్గాలకు పోలింగ్ జరగనుంది.