ఈ సారి జనగణనలో కొత్తగా ఏం చేయబోతున్నామంటే?

హౌస్ లిస్టింగ్- హౌసింగ్ సెన్సస్ (HLO) అనే పేరుతో మొదటి దశను ఏప్రిల్ నుంచి సెప్టెంబర్ వరకు 30 రోజుల వ్యవధిలో నిర్వహిస్తారు. ఇంటింటికీ వెళ్లి వివరాలు సేకరించడానికి 15 రోజుల ముందు స్వీయ గణన చేసుకోవచ్చు.

" మొదట ఇళ్ల పరిస్థితి, కుటుంబానికి అందుబాటులో ఉన్న సౌకర్యాలు, కుటుంబం కలిగి ఉన్న ఆస్తుల గురించి సమాచారం సేకరిస్తారు. జనాభా గణన మొదటి దశకు సంబంధించిన ప్రశ్నలను జనవరి 2026లో నోటిఫై చేయడం జరిగింది," అని ఆయన ఒక అధికారిక ప్రకటనలో తెలిపారు.

“రెండవ దశ–జనాభా గణన (PE) ఫిబ్రవరి 2027లో నిర్వహిస్తారు. (లడఖ్, జమ్మూ కాశ్మీర్, ఉత్తరాఖండ్, హిమాచల్ ప్రదేశ్ రాష్ట్రాలలోని మంచుతో కప్పబడిన నాన్-సింక్రోనస్ ప్రాంతాలలో రెండవ దశ సెప్టెంబర్ 2026లో నిర్వహణ)” అని నారాయణ్ తెలిపారు.

రెండవ దశలో ప్రతి వ్యక్తి నుంచి జనాభా, సామాజిక-ఆర్థిక, విద్య, వలస, సంతానోత్పత్తి మొదలైన సమాచారం సేకరిస్తామని నారాయణ్ చెప్పారు. జనాభా గణన కచ్చితమైన తేదీలు ఈ దశలో చేర్చబడే ప్రశ్నలను త్వరలో తెలియజేస్తామని పేర్కొన్నారు.

అండమాన్ - నికోబార్ దీవులు, ఢిల్లీ (న్యూ ఢిల్లీ మున్సిపల్ కౌన్సిల్, ఢిల్లీ కంటోన్మెంట్ బోర్డ్), గోవా, కర్ణాటక, లక్షద్వీప్, మిజోరం, ఒడిశా, సిక్కింలలో ఏప్రిల్ 16 నుంచి మే 15 వరకు ఇళ్ల జాబితా అంటే గృహ గణన నిర్వహిస్తాం. స్వీయ-గణన కాలం ఏప్రిల్ 1 నుండి ఏప్రిల్ 15 వరకు ఉంటుంది.

జనగణన కార్యకర్తల గౌరవ వేతనం, శిక్షణ చెల్లింపులు, ఐటీ మౌలిక సదుపాయాలు, లాజిస్టిక్స్ మొదలైన వాటికి తగిన నిబంధనలు ఉండేలా చూసేందుకు, జనగణన 2027 కోసం కేంద్రం రూ. 11,718.24 కోట్ల కేటాయింపు చేసిందని నారాయణ్ తెలిపారు. ఈ ప్రక్రియ దేశవ్యాప్తంగా 30 లక్షలకు పైగా గణన సిబ్బంది, పర్యవేక్షకులు, ఇతర అధికారులపై ఒత్తిడిని పెంచుతుంది.

2027 జనాభా లెక్కలను డిజిటల్ పద్ధతుల్లో నిర్వహిస్తామని నారాయణ్ తెలిపారు. సిబ్బంది తమ స్మార్ట్‌ఫోన్‌ను ఉపయోగించి, మొబైల్ యాప్ ద్వారా నేరుగా డేటాను సేకరించి సమర్పిస్తారు. వీటితో పాటు రెండు దశలలోనూ స్వీయ-గణన కోసం ఆన్‌లైన్ అవకాశం ఉంటుంది. మొబైల్ యాప్‌తో పాటు స్వీయ-గణన పోర్టల్ కూడా హిందీ, ఇంగ్లీషుతో సహా 16 భాషలలో అందుబాటులో ఉంటుంది.

స్వీయ-గణన విషయానికొస్తే, వ్యక్తులు తమ మొబైల్ నంబర్, ఇతర ప్రాథమిక వివరాలను ఉపయోగించి SE పోర్టల్‌లోకి లాగిన్ అయి, తమకు అనుకూలమైన సమయంలో జనాభా లెక్కల షెడ్యూల్‌ను పూర్తి చేయవచ్చు.

జనాభా లెక్కల గణన సిబ్బందికి పౌరులు కచ్చితమైన సమాచారాన్ని అందించాలని నారాయణ్ సూచించారు. వ్యక్తిగత డేటా గోప్యంగా ఉంచబడుతుందని, దానిని సాక్ష్యంగా లేదా ఏ పథకం కిందనైనా ప్రయోజనాలు పొందడానికి ఉపయోగించలేమని ఆయన స్పష్టం చేశారు.

జనగణన చట్టంలోని సెక్షన్ 15 ప్రకారం, వ్యక్తిగత సమాచారం అంతా గోప్యంగానే ఉంటుందని కమిషనర్ తెలిపారు. ఢిల్లీలో ఏప్రిల్ 16 నుంచి మే 15 వరకు జనగణన నిర్వహిస్తామన్నారు. "ఈ ప్రక్రియలో సేకరించిన వ్యక్తిగత సమాచారం అంతా గోప్యంగానే ఉంటుంది. దానిని సమాచార హక్కు చట్టం కింద పంచుకోలేరు. కోర్టులో సాక్ష్యంగా ఉపయోగించలేరు. ప్రభుత్వ లేదా ప్రైవేట్ సంస్థలతో పంచుకోలేరు" అని ఆయన అన్నారు. పట్టికల తయారీ కోసం కేవలం సమగ్ర గణాంక సమాచారాన్ని మాత్రమే ఉపయోగిస్తామని ఆయన తెలిపారు.

జనగణనలో కులాన్ని చేర్చడం, ప్రజలు సరైన సమాచారం ఇవ్వకపోవచ్చనే ఆందోళన గురించి అడగగా, రిజిస్ట్రార్ జనరల్ మాట్లాడుతూ, కులానికి సంబంధించిన సమాచారాన్ని రెండవ దశలో సేకరిస్తామని, విస్తృతమైన చర్చల తర్వాత ప్రశ్నలను నిర్ణయిస్తామని చెప్పారు. జనగణన అధికారికి ఏ వ్యక్తి అయినా అందించిన వ్యక్తిగత సమాచారం అత్యంత గోప్యంగా ఉంటుందని, ఏ ప్రభుత్వ పథకం నుంచి ప్రయోజనం పొందేందుకు దానిని ఉపయోగించలేరని, కాబట్టి దానిని దుర్వినియోగం చేస్తారనే ఆందోళన నిరాధారమైనదని ఆయన అన్నారు.