డ్రెస్ మారితే సరిపోతుందా? స్కూళ్లలో ఇంకా ఏం మారాలి?

ర‌చ్చ‌ - రాజ‌కీయం @ 5 పి.ఎం.

1) డ్రెస్ మారితే సరిపోతుందా? స్కూళ్లలో ఇంకా ఏం మారాలి?

2) ఒయో రూమ్‌లో వైజాగ్ యువతి మృతి! గోడలపై రక్తపు మరకలు

3) బాలాపూర్ గణేశ్ లడ్డూ.. వేలం డబ్బులు ఎక్కడికి వెళ్తాయి?

1) డ్రెస్ మారితే సరిపోతుందా? స్కూళ్లలో ఇంకా ఏం మారాలి?

వచ్చే విద్యా సంవత్సరం నుంచి ప్రభుత్వ పాఠశాలల యూనిఫాంలను కొత్త డిజైన్లు, ఆకర్షణీయమైన రంగులతో మార్చేందుకు సీఎం రేవంత్‌రెడ్డి ఆదేశించారు. స్కూళ్లకు కొత్త లుక్ తీసుకురావడంతో పాటు విద్యార్థుల్లో ఆత్మవిశ్వాసం పెంచడమే లక్ష్యంగా ప్రభుత్వం చెబుతోంది. రేవంత్‌రెడ్డి ప్రభుత్వం 2023 డిసెంబర్‌లో అధికారంలోకి వచ్చిన తర్వాత తెలంగాణలో కొన్ని పేర్లు, గుర్తులు, అధికారిక చిహ్నాలు, సాంస్కృతిక అంశాల్లో మార్పులు చేసింది.

వచ్చే విద్యా సంవత్సరం నుంచి యూనిఫాంలను మరింత ఆకర్షణీయమైన రంగుల్లో, వైవిధ్యమైన డిజైన్లతో రూపొందించాలని సీఎం రేవంత్‌రెడ్డి అధికారులను ఆదేశించారు. ఈ ఏడాది ఒక జత యూనిఫాం పంపిణీ పూర్తయిందని, రెండో జతను సెప్టెంబర్ చివరి నాటికి అందిస్తామని అధికారులు తెలిపారు. వచ్చే ఏడాది మాత్రం స్కూల్ మొదటి రోజే యూనిఫాం, ఇతర సామగ్రి అందేలా ముందుగానే ప్రణాళిక రూపొందించాలని సీఎం ఆదేశించారు. అంటే, ప్రభుత్వ స్కూళ్లకు కొత్త లుక్ ఇవ్వడం ఇప్పుడు విద్యా సంస్కరణల్లో ఒక భాగంగా మారుతోంది.

తెలంగాణలో ప్రభుత్వ పాఠశాలల్లో చదువుతున్న విద్యార్థులు సుమారు 27.5 లక్షల మంది. ఈ పిల్లలందరికీ యూనిఫాం, పుస్తకాలు, ఇతర విద్యా సామగ్రి అందించడం పెద్ద స్థాయి ప్రభుత్వ కార్యక్రమమే. ఈ ఏడాది విద్యా కిట్ల కోసం ప్రభుత్వం రూ.1,000 కోట్లకు పైగా ఖర్చు చేసింద‌ని సీఎం చెప్పారు.

అంటే యూనిఫాం అనేది చిన్న విషయం కాదు. కానీ ఒక ప్రభుత్వ నిర్ణయాన్ని విద్యార్థిపై ప్రభావం చూపే కోణంలో చూస్తే, యూనిఫాం అనేది ముందుగా కనిపించే అంశం. కొత్త రంగు, కొత్త డిజైన్‌ను విద్యార్థి, తల్లిదండ్రులు, మీడియా వెంటనే గమనించగలరు. ఒక పాఠశాల భవనం, యూనిఫాం, కిట్లు వంటి అంశాల్లో మార్పు చేస్తే దాని ఫలితం కూడా బయటకు కనిపిస్తుంది.

అదే సమయంలో "టీచర్ల కొరత, బోధన నాణ్యత, తరగతి గదుల కొరత, స్కాలర్‌షిప్ లేదా ఫీజు రీయింబర్స్‌మెంట్ బకాయిలు వంటి సమస్యల పరిష్కారానికి ఎక్కువ సమయం, నిరంతర నిధులు, పరిపాలనా చర్యలు అవసరం. అందుకే ప్రభుత్వానికి కనిపించే మార్పులతో పాటు, విద్యార్థి భవిష్యత్తును నేరుగా ప్రభావితం చేసే మార్పులు ఎంత వేగంగా జరుగుతున్నాయి అనేదే అసలు కొలమానం" అంటారు 4వ త‌ర‌గ‌తి చ‌దువుతున్న ర‌మేష్ తండ్రి తండ్రి వెంక‌ట చ‌ల‌ప‌తి చెప్పారు.

తెలంగాణ ఎడ్యుకేషన్ కమిషన్ "ప్రభుత్వ పాఠశాలలపై చేసిన సిఫార్సుల్లో బోధనా పద్ధతులు, మౌలిక వసతులు, డిజిటల్ లెర్నింగ్, టీచర్ ట్రైనింగ్, విద్యార్థుల భాగస్వామ్యం" వంటి అంశాలకు ప్రాధాన్యం ఇచ్చింది.

కేంద్ర విద్యాశాఖ నిర్వహించే (Unified District Information System for Education Plus) UDISE+ డేటా ప్రకారం. తెలంగాణలోని ప్రభుత్వ, "లోకల్ బాడీ ప్రాథమిక పాఠశాలల్లో దాదాపు 16 శాతం స్కూళ్లు ఒక్క తరగతి గదితోనే పనిచేస్తున్నాయి. అంటే ఒకే గదిలో వేర్వేరు తరగతుల పిల్లలు చదవాల్సిన పరిస్థితి కొన్ని పాఠశాలల్లో ఉంది".

ఇక "టీచర్ల విషయంలోనూ ఖాళీలు ఒక ముఖ్యమైన అంశంగా ఉన్నాయి. ఉపాధ్యాయ నియామకాలు, TET, DSC ప్రక్రియలు కొనసాగుతున్నప్పటికీ.. పాఠశాల స్థాయిలో విద్యార్థుల సంఖ్యకు సరిపడా బోధనా సిబ్బంది ఉండటం నాణ్యమైన విద్యకు కీలకం" అంటారు ఎస్‌.ఎఫ్‌.ఐ. రాష్ట్ర కార్య‌ద‌ర్శి నాగ‌రాజు.

ఫీజు రీయింబర్స్‌మెంట్, స్కాలర్‌షిప్‌ల ఆలస్యం అంశంపై తెలంగాణ హైకోర్టులో PILకు సంబంధించిన విచారణ జరిగింది. ప్రభుత్వం 2026–27 నుంచి కొత్త విధానంతో బకాయిల సమస్యను తగ్గించేందుకు నెలకు రూ.200 కోట్లు విడుదల చేసే విధానం తీసుకురావాలని నిర్ణయించినట్లు నివేదికలు వచ్చాయి. అదే సమయంలో పెండింగ్ బకాయిల మొత్తం విషయంలో రాజకీయంగా భిన్నమైన అంచనాలు, డిమాండ్లు ఉన్నాయి. అంటే విద్యార్థుల జీవితాన్ని నేరుగా ప్రభావితం చేసే సమస్యలు ఇంకా పెద్దవిగానే ఉన్నాయి.

ప్రభుత్వం చెబుతున్నది, యూనిఫాం, పుస్తకాలు, కిట్లు వంటి వస్తువులు సమయానికి అందితే విద్యార్థులు చదువుపై మరింత దృష్టి పెట్టగలరని. ఈ ఏడాది యూనిఫాం నాణ్యతపై తల్లిదండ్రులు సంతృప్తి వ్యక్తం చేశారని అధికారులు సీఎంకు తెలిపారు.

విద్యార్థికి సరైన టీచర్ ఉన్నాడా. తరగతి గది సరిపోతుందా. టాయిలెట్, తాగునీరు ఉన్నాయా. పుస్తకం సమయానికి వచ్చిందా. స్కాలర్‌షిప్ లేదా ఫీజు రీయింబర్స్‌మెంట్ సమయానికి అందిందా. ఇవే చదువుపై నేరుగా ప్రభావం చూపే అంశాలు. ప్రభుత్వం స్కూల్‌కి కొత్త లుక్ ఇవ్వడం ఒక అంశం. అదే సమయంలో స్కూల్‌లోని లెర్నింగ్, టీచింగ్, ఇన్‌ఫ్రాస్ట్రక్చర్, ఆర్థిక సహాయం కూడా అదే స్థాయిలో మెరుగుపడుతున్నాయా అనేది మరో అంశం.

నిజమైన విద్యా సంస్కరణ ఫలితం "పరీక్ష ఫలితాల్లో, హాజరులో, నేర్చుకునే సామర్థ్యంలో, ఉన్నత విద్యకు వెళ్లే అవకాశాల్లో, ఉద్యోగ అవకాశాల్లో కనిపిస్తుందని" బేగంప‌టలోని ప్ర‌భుత్వ పాఠ‌శాల టీచ‌ర్ స్వ‌రూప‌రాణి చెప్పారు.

కొత్త డ్రెస్‌తో పాటు. కొత్త తరగతి గది, కొత్త బోధనా విధానం, సరిపడా టీచర్లు, సమయానికి స్కాలర్‌షిప్‌లు, బలమైన మౌలిక వసతులు కూడా కనిపించినప్పుడే విద్యా వ్యవస్థలో అసలైన మార్పు జరిగిందని చెప్పగలం. లుక్ మారుతోంది. లెర్నింగ్ కూడా ఎంత మారుతుందనేదే అసలు కథ.

కాంగ్రెస్ పార్టీ అధికారంలోకి వ‌చ్చిన త‌రువాత తెలంగాణ రాష్ట్ర సంక్షిప్త రూపాన్ని TS నుంచి TGగా మార్చింది. ప్రభుత్వ శాఖలు, సంస్థలు, అధికారిక పత్రాలు, వెబ్‌సైట్లు, వాహన రిజిస్ట్రేషన్లలో TG వాడాలని ప్రభుత్వం ఆదేశించింది.

రాష్ట్ర గీతం అందెశ్రీ రచించిన “జయ జయహే తెలంగాణ జననీ జయకేతనం”ను అధికారిక రాష్ట్ర గీతంగా ప్రకటించింది.

తెలంగాణ తల్లి విగ్రహం. తెలంగాణ తల్లి కొత్త రూపాన్ని రూపొందించి, 2024 డిసెంబర్ 9న సచివాలయంలో కొత్త విగ్రహాన్ని ఆవిష్కరించింది.

ప్రగతి భవన్ నుంచి ప్రజా భవన్. ప్రగతి భవన్ పేరును ప్రజా భవన్గా మార్చింది. ప్రజలకు అందుబాటులో ఉండేలా చేశామని ప్రభుత్వం పేర్కొంది.

కోఠిలోని మహిళా విశ్వవిద్యాలయానికి చాకలి ఐలమ్మ పేరు పెట్టింది.

సినీ అవార్డులు. రాష్ట్ర సినిమా అవార్డులను గద్దర్ పేరుతో ఇవ్వాలని ప్రభుత్వం నిర్ణయించింది. పాత తెలంగాణ రాష్ట్ర చిహ్నాన్ని మార్పు ప్రతిపాదించారు.

స్కూల్ యూనిఫాం ఇప్పుడు కొత్త మార్పు. ప్రభుత్వ పాఠశాలల యూనిఫాంలకు మరింత ఆకర్షణీయమైన రంగులు, భిన్నమైన డిజైన్లు పరిశీలించాలని సీఎం రేవంత్‌రెడ్డి అధికారులను ఆదేశించారు.

2) ఒయో రూమ్‌లో వైజాగ్ యువతి మృతి! గోడలపై రక్తపు మరకలు

హైదరాబాద్ మాదాపూర్‌లోని ఓ OYO రూమ్‌లో విశాఖకు చెందిన 29 ఏళ్ల షారన్ నిఖితా తోప్నో అనుమానాస్పద స్థితిలో మృతి చెందారు. ఆమె ముఖం, తలపై గాయాల గుర్తులు ఉండటం, గదిలో గోడలు, బెడ్‌షీట్‌పై రక్తపు మరకలు కనిపించడంతో పోలీసులు కేసును అనుమానాస్పద మృతిగా దర్యాప్తు చేస్తున్నారు. ఈ ఘటనలో ఆమెతో కలిసి రూమ్‌కు వచ్చిన శ్రీనివాస రవితేజ ప్రస్తుతం కనిపించకుండా పోయినట్లు పోలీసులు చెబుతున్నారు.

పోలీసుల వివరాల ప్రకారం.. ఈ నెల 21న సిద్ధిక్‌నగర్‌లోని ఓ హోటల్‌లో షారన్ నిఖితా తోప్నో తనతో పాటు వచ్చిన శ్రీనివాస రవితేజతో కలిసి చెక్‌ఇన్ చేశారు. కొంతసేపటి తర్వాత యువతి రూమ్‌లో స్పృహతప్పి పడిపోయినట్లు హోటల్ సిబ్బందికి సమాచారం అందింది. దీంతో ఆమెను కొత్తగూడ అపోలో ఆసుపత్రికి తరలించారు. అయితే అప్పటికే ఆమె మృతి చెందినట్లు వైద్యులు నిర్ధారించారు.

ఘటనపై సమాచారం అందుకున్న మాదాపూర్ పోలీసులు అక్కడికి చేరుకుని ప్రాథమిక దర్యాప్తు చేపట్టారు. యువతి ముఖం, తలపై గాయాలు ఉన్నట్లు గుర్తించారు. రూమ్‌లోని గోడలు, బెడ్‌షీట్‌పై రక్తపు మరకలు కూడా కనిపించాయి. దీంతో సహజ మరణమా, గాయాల కారణంగా మరణించారా, లేక మరేదైనా జరిగిందా అనే కోణాల్లో పోలీసులు దర్యాప్తు చేస్తున్నారు.

ప్రస్తుతం హత్య కోణాన్ని కూడా పోలీసులు పరిశీలిస్తున్నారు. అయితే యువతి మృతికి ఖచ్చితమైన కారణం ఇంకా అధికారికంగా నిర్ధారించాల్సి ఉంది.

ఇక ఈ కేసులో కీలకంగా మారింది యువతితో పాటు రూమ్‌లో ఉన్న శ్రీనివాస రవితేజ ఆచూకీ. పోలీసుల ప్రకారం.. యువతిని ఆసుపత్రికి తరలించిన సమయంలో రవితేజ అక్కడి నుంచి వెళ్లిపోయాడు. ఆ తర్వాత అతని ఫోన్ స్విచ్ ఆఫ్ అయినట్లు పోలీసులు గుర్తించారు. అతని ఆచూకీ కోసం ప్రత్యేక బృందాలు గాలిస్తున్నాయి. ఫోన్ సిగ్నల్, సీసీటీవీ ఫుటేజ్, హోటల్‌లో లభించిన ఇతర ఆధారాలను పోలీసులు పరిశీలిస్తున్నారు.

ఈ కేసులో ప్రస్తుతం అనేక అంశాలపై దర్యాప్తు కొనసాగుతోంది. యువతికి, రవితేజకు ఉన్న సంబంధం ఏంటి? రూమ్‌లో అసలు ఏం జరిగింది? గాయాలు ఎలా అయ్యాయి? యువతి మృతికి కారణం ఏంటి? అనే అంశాలపై ఆధారాలు సేకరించి పోలీసులు దర్యాప్తు చేస్తున్నారు.

ఒక యువతి అనుమానాస్పద మృతి. రూమ్‌లో రక్తపు మరకలు. వెంట వచ్చిన వ్యక్తి అదృశ్యం. ఈ మూడు అంశాల చుట్టూనే మాదాపూర్ పోలీసుల దర్యాప్తు కొనసాగుతోంది. అధికారిక దర్యాప్తు పూర్తయిన తర్వాతే మృతికి అసలు కారణం, ఘటనలో ఎవరి పాత్ర ఉందనే విషయాలు స్పష్టమవుతాయి.

3) బాలాపూర్ గణేశ్ లడ్డూ.. వేలం డబ్బులు ఎక్కడికి వెళ్తాయి?

హైదరాబాద్ గణేశ్ ఉత్సవాల్లో బాలాపూర్ గణేశ్ లడ్డూకు ప్రత్యేక గుర్తింపు ఉంది. మూడు దశాబ్దాలుగా జరుగుతున్న ఈ లడ్డూ వేలం. భక్తి, నమ్మకం, సంప్రదాయంతో పాటు సామాజిక కార్యక్రమాలతోనూ ముడిపడి ఉంది. 1994లో కేవలం రూ.450తో ప్రారంభమైన లడ్డూ వేలం. 2025లో రూ.35 లక్షలకు చేరింది.

బాలాపూర్‌లో గణేశ్ ఉత్సవాలు 1980లో ప్రారంభమైనట్లు పలు కథనాలు చెబుతున్నాయి. అయితే 1994లో మొదటిసారి లడ్డూను వేలం వేయడంతో ఈ ఉత్సవానికి ప్రత్యేక గుర్తింపు వచ్చింది. మొదటి ఏడాది స్థానిక రైతు కొలను మోహన్‌రెడ్డి రూ.450కు లడ్డూను దక్కించుకున్నారు. 1995లో అదే లడ్డూ రూ.4,500 పలికింది. ఆ తర్వాత ధర క్రమంగా పెరుగుతూ వచ్చింది. 2002లో తొలిసారి రూ.1 లక్ష దాటింది. 2012లో రూ.7.50 లక్షలు, 2015లో రూ.10.32 లక్షలు, 2017లో రూ.15.60 లక్షలు, 2022లో రూ.24.60 లక్షలు, 2024లో రూ.30.01 లక్షలు పలికింది. ఇక 2025లో మరో రికార్డు నమోదైంది. కర్మన్‌ఘాట్‌కు చెందిన లింగాల దశరథ్‌గౌడ్ రూ.35 లక్షలకు బాలాపూర్ లడ్డూను దక్కించుకున్నారు.

ఇంత భారీ ధర ఎందుకు?

దీని వెనుక భక్తుల విశ్వాసం ప్రధాన కారణాల్లో ఒకటి. గణపయ్యకు నైవేద్యంగా సమర్పించిన ఈ లడ్డూ ప్రసాదాన్ని ఇంటికి తీసుకెళ్తే శుభం కలుగుతుందని చాలామంది నమ్ముతారు. కుటుంబ సభ్యులకు పంచుకోవడం, ఇంట్లో పూజించడం, కొందరు పొలాల్లో ప్రసాదంగా చల్లడం వంటి ఆచారాలు కూడా ఉన్నాయి.

అయితే బాలాపూర్ లడ్డూ వేలానికి మరో ప్రత్యేకత ఉంది. వేలం ద్వారా వచ్చిన మొత్తాన్ని స్థానిక అభివృద్ధి, దేవాలయాల అభివృద్ధి, మౌలిక వసతులు, సామాజిక కార్యక్రమాలకు వినియోగిస్తున్నట్లు నిర్వాహకులు చెబుతున్నారు. 2025లో బాలాపూర్ ఉత్సవ సమితి వెల్లడించిన వివరాల ప్రకారం, వేలం ద్వారా వచ్చిన నిధుల్లో రూ.1,60,87,970ను ఇప్పటి వరకు గ్రామాభివృద్ధి కోసం ఖర్చు చేసినట్లు కమిటీ తెలిపింది. 2025లోనే బాలాపూర్ జిల్లా పరిషత్ పాఠశాలలో మరుగుదొడ్ల నిర్వహణకు రూ.80,000 ఖర్చు చేసినట్లు వెల్లడించింది.

అందుకే ఇది కేవలం ఒక లడ్డూ కోసం జరిగే వేలం కాదు. ఒకవైపు భక్తి, మరోవైపు సమాజానికి ఉపయోగపడే కార్యక్రమాలు.. ఈ రెండింటి కలయికగా బాలాపూర్ లడ్డూ వేలం కొనసాగుతోంది.రూ.450తో మొదలై.. రూ.35 లక్షలకు చేరిన బాలాపూర్ లడ్డూ వేలం. ఇది కేవలం ధర పెరిగిన కథ కాదు. మూడు దశాబ్దాల సంప్రదాయం. భక్తుల విశ్వాసం. బాలాపూర్ ప్రజల అనుబంధం. సమాజానికి ఉపయోగపడే కార్యక్రమాల కథ. అందుకే ప్రతి వినాయక చవితికీ. హైదరాబాద్‌లో బాలాపూర్ లడ్డూ వేలం ప్రత్యేకంగా వార్తల్లో నిలుస్తోంది.