ఈశాన్యంలో మరో తలనొప్పి రఖైన్ రూపంలో ఎదురవబోతుందా?

దక్షిణాసియా లేదా భారత ఉపఖండం ప్రాంతంలో మరొ కొత్త దేశం ఏర్పడబోతుందా? కొన్ని సంఘటనలు లేదా ఇంకొన్ని అంతర్గత సంఘర్షణలు చూస్తే కొత్త దేశానికి పునాది పడుతుందనే అర్థమవుతోంది. భారత్ నేరుగా జోక్యం చేసుకోవడంతో 1971 లో పాకిస్తాన్ నుంచి బంగ్లాదేశ్ ఏర్పడింది. దక్షిణాసియాలో చివరగా ఏర్పడిన కొత్త దేశం ఇదే.

దాదాపు 53 సంవత్సరాల తరువాత ఇక్కడ మరో దేశం ఏర్పడటానికి అనుకూల పరిస్థితులు ఉన్నాయి. అది మన సరిహద్దు దేశంలో ఉన్న మయన్మార్ లో. మన దేశానికి మయన్మార్ దేశంలోని రఖైన్ ప్రాంతానికి సరిహద్దు ఉంది. ఇక్కడ చాలా కాలంగా తిరుగుబాటు జరుగుతోంది. ఇక్కడ అరకాన్ ఆర్మీతో సైనిక జుంటా నేరుగా తలపడుతోంది. కానీ పైచేయి మాత్రం అరకాన్ ఆర్మీ, దాని మిత్రులదే.