కరీంనగర్ మేయర్ ఎన్నికలో బీజేపీకి పైచేయి?

తెలంగాణ రాజకీయ వాతావరణం మరోసారి వేడెక్కింది. కార్పొరేషన్లు, మున్సిపాలిటీల్లో మేయర్లు, ఛైర్మన్ల ఎన్నికల జరుగుతోంది. ముఖ్యంగా కరీంనగర్ కార్పొరేషన్‌పై అందరి దృష్టి నిలిచింది. అక్కడి రాజకీయ సమీకరణాలు మారిపోవడం ఉత్కంఠను పెంచుతోంది. రాష్ట్రవ్యాప్తంగా పలు పార్టీలు తమ అభ్యర్థులను ప్రకటించాయి. కరీంనగర్ కార్పొరేషన్ మేయర్ అభ్యర్థిగా కొలగాని శ్రీనివాస్‌ను, డిప్యూటీ మేయర్ అభ్యర్థిగా సునీల్‌రావును బీజేపీ ఖరారు చేసింది.

ఈ నిర్ణయాన్ని ఆ పార్టీ ఎన్నికల అధికారికి అధికారికంగా ప్రతిపాదించింది. మహబూబ్‌నగర్ జిల్లా మక్తల్ మున్సిపాలిటీలో కూడా కాంగ్రెస్ పార్టీ తన అభ్యర్థులను ప్రకటించింది. ఛైర్‌పర్సన్‌గా వాకిటి మానసను ఎంపిక చేసింది. వైస్ ఛైర్మన్‌గా బాయికాటి శైవిరెడ్డిని నిర్ణయించింది. ఇక ప్రక్రియ విషయానికి వస్తే, ఉదయం 11 గంటల నుంచి కార్పొరేటర్లు, కౌన్సిలర్లు ప్రమాణ స్వీకారం ప్రారంభించారు.

అనంతరం మధ్యాహ్నం 12.30 గంటల నుంచి మేయర్, డిప్యూటీ మేయర్, మున్సిపల్ ఛైర్మన్, వైస్ ఛైర్మన్ ఎన్నికలు నిర్వహించనున్నారు. కరీంనగర్‌లో పరిస్థితి మరింత ఆసక్తికరంగా మారింది. అక్కడ మేయర్ ఎన్నికలో బీఆర్ఎస్ నుంచి గెలిచిన సభ్యుల హాజరు కీలకంగా మారింది. వారు హాజరు కాకపోతే ఫలితం మారే అవకాశాలు ఉన్నట్లు రాజకీయ వర్గాలు భావిస్తున్నాయి.

ఈ కార్పొరేషన్‌లో మ్యాజిక్ ఫిగర్ 31. ప్రస్తుతం బీజేపీ బలం 34గా ఉంది. సంఖ్యాబలం దృష్ట్యా ఆ పార్టీకి అనుకూల పరిస్థితులు కనిపిస్తున్నాయి. అయితే తుది ఫలితం సభ్యుల హాజరు, ఓటింగ్ విధానంపై ఆధారపడి ఉండనుంది. ఇప్పుడంతా మధ్యాహ్నం జరిగే ఎన్నికల ప్రక్రియపై దృష్టి సారించింది. అధికారిక ఫలితాలు వెలువడిన తర్వాతే స్పష్టత రానుంది.