మంత్రి వివేక్ సమక్షంలోనే అసభ్య ప్రవర్త: హరీష్

క్యాతనపల్లిలో చైర్మన్ ఎన్నిక వాయిదా వివాదంగా మారింది. 22 స్థానాల్లో 14 స్థానాలు గెలిచినా ఎన్నికను కావాలనే నిలిపివేశారని బీఆర్ఎస్ ఆరోపించింది. చైర్మన్ ఎన్నిక రోజు ఉద్దేశపూర్వకంగా పోలీసు బందోబస్తు లేకుండా చేసి ప్రక్రియను అడ్డుకున్నారని పేర్కొంది. ప్రజల తీర్పును అంగీకరించకుండా వ్యవహరించారని విమర్శించింది. అధికారులు, పోలీసులు ఉన్న సమయంలోనే దళిత, గిరిజన, మహిళా కౌన్సిలర్లతో అసభ్యంగా ప్రవర్తించారని తెలిపింది. మంత్రి వివేక్ సమక్షంలోనే ఈ ఘటనలు జరిగాయని పేర్కొంది.

బాల్క సుమన్, కోవ లక్ష్మిలను లోపలికి అనుమతించలేదని, కాంగ్రెస్ మంత్రిని మాత్రమే అనుమతించడంపై ప్రశ్నించడంతో దాడులు జరిగాయని ఆరోపించింది. పోలీసులను అడ్డం పెట్టుకుని అధికారం దక్కించుకోవాలని ప్రయత్నిస్తున్నారని కాంగ్రెస్ సర్కార్‌పై తీవ్ర విమర్శలు చేసింది. క్యాతనపల్లి మాత్రమే కాకుండా జనగామ, ఇబ్రహీంపట్నం, ఆమనగల్ ప్రాంతాల్లోనూ బీఆర్ఎస్ నాయకులు, కౌన్సిలర్లను భయభ్రాంతులకు గురిచేశారని తెలిపింది.

జనగామలో ఓటింగ్ సమయంలో కౌన్సిలర్ చేయి పైకెత్తగా వెనుక నుంచి పట్టుకుని లాగారని పేర్కొంది. ఒక దళిత మహిళ చేయి పట్టుకుని అసభ్యంగా ప్రవర్తించారని ఆరోపించింది. ఇబ్రహీంపట్నంలో స్పష్టమైన మెజార్టీ ఉన్నప్పటికీ ఎన్నికను అడ్డుకునే ప్రయత్నం జరిగిందని తెలిపింది. ఒక ఎంపీ తొర్రూరులో రెండోసారి ఓటు నమోదు చేసి ఓటు వేయడం ప్రజాస్వామ్యానికి విరుద్ధమని పేర్కొంది. తమ ప్రభుత్వం ఉన్న సమయంలో కాంగ్రెస్ నాలుగు మున్సిపాలిటీలకే పరిమితమైందని గుర్తు చేసింది.

ప్రస్తుతం తాము దాదాపు 800 మంది కౌన్సిలర్లను గెలుచుకున్నామని వెల్లడించింది. అప్పట్లో ఇలాంటి చర్యలు తాము చేయలేదని స్పష్టం చేసింది. కాంగ్రెస్ ప్రజా ఆమోదం కోల్పోయిందని విమర్శించింది. దొడ్డిదారిన పదవులు పొందే ప్రయత్నాలను ప్రజలు గమనిస్తున్నారని తెలిపింది. ఈ ఆరోపణలపై అధికార వర్గాల స్పందన కోసం ఎదురుచూపులు కొనసాగుతున్నాయి.