బడ్జెట్‌లో 6 గ్యారెంటీలకు నిధులివ్వండి: కేటీఆర్

రాబోయే 2026-27 బడ్జెట్‌పై రాజకీయ వేడి పెరిగింది. ఆరు గ్యారెంటీలు, 420 హామీల అమలుకు నిధులు కేటాయించాలని సీఎం రేవంత్‌కు రాసిన బహిరంగ లేఖలో మాజీ మంత్రి, బీఆర్ఎస్ వర్కింగ్ ప్రెసిడెంట్ కేటీఆర్ డిమాండ్ చేశారు. 2023 అసెంబ్లీ ఎన్నికల్లో ఇచ్చిన హామీలు రెండేళ్లుగా అమలు కాలేదని లేఖలో గుర్తుచేసింది. ఈసారి బడ్జెట్‌లోనైనా అవసరమైన మొత్తాన్ని కేటాయించాలని కోరింది.

వృద్ధులు, వితంతువులకు పెన్షన్‌ను నాలుగు వేల రూపాయలకు పెంచేందుకు పూర్తి నిధులు కేటాయించాలని డిమాండ్ చేసింది. మహిళలకు మహాలక్ష్మి పథకం కింద నెలకు రూ.2,500 చెల్లిస్తామని చెప్పి ఇప్పటివరకు అమలు చేయలేదని పేర్కొంది. ఈ హామీ అమలు కాకపోతే ఆడబిడ్డలు ఊరుకోరని హెచ్చరించింది. రైతులకు రైతుబంధును రూ.15 వేలకి పెంచుతామని ఇచ్చిన మాట నిలబెట్టుకోవాలని కోరింది. పెండింగ్ బకాయిలను వెంటనే చెల్లించాలని డిమాండ్ చేసింది. కౌలు రైతులు, రైతు కూలీలకు మేనిఫెస్టో ప్రకారం నిధులు జమ చేయాలని సూచించింది.

నిరుద్యోగులకు రెండు లక్షల ఉద్యోగాలు, జాబ్ క్యాలెండర్, నెలకు రూ.4 వేల భృతి వంటి హామీలకు బడ్జెట్‌లో కేటాయింపులు చేయాలని యువత తరపున కోరింది. ఆటో డ్రైవర్లకు సంవత్సరానికి రూ.12 వేల సహాయం, సంక్షేమ బోర్డు ఏర్పాటు విషయాల్లో ముందడుగు పడలేదని విమర్శించింది. బకాయిలను కూడా ఈ బడ్జెట్‌లో చేర్చాలని పేర్కొంది. దివ్యాంగులు, బీడీ కార్మికులు, పెళ్లి కానుకలు, యువ వికాసం విద్యా భరోసా కార్డు, స్కూటీలు, ఫీజు రీయింబర్స్‌మెంట్ వంటి హామీలు కూడా పెండింగ్‌లోనే ఉన్నాయని ఆరోపించింది. మహిళలకు పెద్ద ఎత్తున బకాయిలు పేరుకుపోయాయని పేర్కొంది.

మున్సిపల్ ఎన్నికల తర్వాత రైతుబంధు నిధులు జమ చేస్తామని చెప్పినా అమలు కాలేదని గుర్తుచేసింది. ఉద్యోగాల భర్తీ విషయంలోనూ మాట మారిందని విమర్శించింది. ఎన్నికల సమయంలో ఢిల్లీ నేతల సమక్షంలో విడుదల చేసిన మేనిఫెస్టోను విస్మరించారని పేర్కొంది. 100 రోజుల్లో ఆరు గ్యారెంటీలకు చట్టబద్ధత తీసుకొస్తామని చెప్పినా అమలు కాలేదని తెలిపింది. అభయహస్తం మేనిఫెస్టోలోని హామీలకు అవసరమైన మొత్తం ప్రకటించి బడ్జెట్‌లో ప్రతి పైసాకు లెక్క చూపాలని డిమాండ్ చేసింది. ఈసారి కూడా కేటాయింపులు లేకపోతే ప్రజలు నిలదీస్తారని హెచ్చరించింది.