కాంగ్రెస్ తప్పులు ఎత్తిచూపడంలో బీఆర్ఎస్ ఫెయిల్: కవిత

బీఆర్ఎస్‌పై జాగృతి అధ్యక్షురాలు కవిత మరోసారి విమర్శనాస్త్రాలు సంధించారు. మున్సిపల్ ఎన్నికల్లో కాంగ్రెస్‌కు అత్యధిక సీట్లు రావడానికి బీఆర్ఎస్ చేతకాని తనమే కారణమన్న రేంజ్‌లో ఘాటు వ్యాఖ్యలు చేశారు. ఎన్నికల ప్రచారం సమయంలో కాంగ్రెస్ తప్పులను ఎత్తిచూపడంలో బీఆర్ఎస్ అట్టర్ ప్లాప్ అయిందని కవిత విమర్శించారు. మున్సిపల్ ఎన్నికల ఫలితాలు కేవలం ట్రైలర్ మాత్రమేనని, అసలు రాజకీయ చిత్రం ముందుందని పేర్కొన్నారు.

ప్రజలకు సరైన ప్రత్యామ్నాయం లేకపోవడంతోనే కాంగ్రెస్‌కు ఓట్లు పడ్డాయని కవిత అభిప్రాయపడ్డారు. ఇచ్చిన హామీలను అమలు చేయకపోయినా ఆ పార్టీ ఎక్కువ స్థానాలు గెలిచిందని వ్యాఖ్యానించారు. గతంలో 90 శాతం మున్సిపాలిటీల్లో గెలిచిన బీఆర్ఎస్ ఇప్పుడు 16 స్థానాలకు పరిమితమైందని గుర్తుచేశారు. ప్రజల విశ్వాసం ఎందుకు తగ్గిందో ఆ పార్టీ పరిశీలించుకోవాలని సూచించారు.

బీఆర్ఎస్–బీజేపీ పొత్తుపై ఆరోపణలు

ఉత్తర తెలంగాణలో బీఆర్ఎస్, బీజేపీ మధ్య సహకారం కనిపించిందని కవిత ఆరోపించారు. ఈ ఎన్నికలు ఆ పొత్తుకు తొలి మెట్టుగా భావించాల్సి ఉందని అన్నారు. కొత్తగూడెంలో సీపీఐ అడగకుండానే బీఆర్ఎస్ మద్దతు ప్రకటించిందని విమర్శించారు. గతంలో విమర్శించిన పార్టీలకే ఇప్పుడు మద్దతివ్వడం విరుద్ధమని పేర్కొన్నారు.

కొత్త తరహా రాజకీయాలను ప్రజలు స్వాగతించారని కవిత తెలిపారు. జాగృతి, ఆల్ ఇండియా ఫార్వర్డ్ బ్లాక్ కలిసి పోటీ చేసి 40 మంది అభ్యర్థులను గెలిపించుకున్నామని చెప్పారు. అధికారికంగా 33 స్థానాలు ఉన్నప్పటికీ, బీ ఫామ్ సమస్యల కారణంగా మరికొన్ని చోట్ల ఇండిపెండెంట్‌గా గెలిచినవారు తమవారేనని వివరించారు. వడ్డేపల్లిలో స్పష్టమైన మాండేట్ వచ్చిందని వెల్లడించారు.

ఎన్నికల ప్రక్రియపై విమర్శలు

ఎన్నికల సమయంలో అధికార దుర్వినియోగం జరిగిందని కవిత ఆరోపించారు. రీకౌంటింగ్ పేరుతో కొన్ని చోట్ల అక్రమాలు జరిగాయని చెప్పారు. ఈసీ స్పందించలేదని, ప్రతిపక్షాలు ప్రశ్నించలేదని వ్యాఖ్యానించారు.

అంబటి జోజిరెడ్డి మాట్లాడుతూ.. జాగృతితో కలిసి పోటీ చేసిన తమ నేతలను ప్రజలు ఆదరించారని తెలిపారు. కరీంనగర్‌లో మెజార్టీ లేదని, తమ అభ్యర్థులను ఆకర్షించే ప్రయత్నాలు జరిగాయని ఆరోపించారు.

రియాజ్ అహ్మద్ మాట్లాడుతూ.. కార్మిక హక్కుల కోసం జాగృతి, హెచ్ఎంఎస్ కలిసి పనిచేస్తున్నాయని చెప్పారు. కొందరు గెలిచిన అభ్యర్థులను బెదిరించే ప్రయత్నాలు జరిగాయని పేర్కొన్నారు. రానున్న సింగరేణి ఎన్నికల్లో కలిసి పనిచేస్తామని తెలిపారు.

భవిష్యత్ రాజకీయ దిశ

మున్సిపల్ ఫలితాలు రాష్ట్ర రాజకీయాల్లో కొత్త సమీకరణాలకు సంకేతమని కవిత పేర్కొన్నారు. స్థానిక సంస్థల నుంచి కొత్త నాయకత్వం ఎదుగుతుందని తెలిపారు. ఇచ్చిన హామీల అమలుపై దృష్టి పెట్టాలని కాంగ్రెస్‌ను కోరారు. మున్సిపల్ ఎన్నికల అనంతరం రాజకీయ చర్చలు మరింత వేడెక్కే అవకాశం కనిపిస్తోంది.