మొయినాబాద్ డ్రగ్స్ కేసుపై సీఎం స్పందన, సిట్ దర్యాప్తు

మొయినాబాద్ డ్రగ్స్ కేసుపై తెలంగాణ సీఎం రేవంత్ రెడ్డి స్పందించారు. ఈ వ్యవహారంలో ప్రభుత్వ ప్రమేయం లేదని స్పష్టం చేస్తూ సిట్ దర్యాప్తు కొనసాగుతోందని తెలిపారు. ఢిల్లీ పర్యటనలో భాగంగా మీడియాతో మాట్లాడిన సీఎం, కేసులో నిబంధనల ప్రకారమే స్టేషన్ బెయిల్ ఇచ్చినట్లు వివరించారు. వేగంగా విచారణ జరిపేందుకు ప్రత్యేక దర్యాప్తు బృందాన్ని ఏర్పాటు చేసినట్లు చెప్పారు. ఇదిలా ఉండగా, ఫార్మ్ హౌస్ డ్రగ్స్ కేసులో కొత్త విషయాలు వెలుగులోకి వచ్చాయి. పార్టీ సమయంలో నిందితులు మూడు రకాల డ్రగ్స్ వినియోగించినట్లు సిట్ గుర్తించింది.

కోకేన్, ఎండిఎంఏతో పాటు మరిన్ని పదార్థాలు ఉపయోగించినట్లు తేల్చింది. నమిత్ శర్మ మూడు రకాల డ్రగ్స్ వాడినట్లు అధికారులు నిర్ధారించారు. పైలట్ రోహిత్ రెడ్డి రెండు రకాల డ్రగ్స్ తీసుకున్నట్లు గుర్తించారు. ఇతర నిందితులు కూడా వేర్వేరు మాదక ద్రవ్యాలు వినియోగించినట్లు వివరించారు. అధిక మత్తు కోసం కొందరు మద్యం‌తో పాటు డ్రగ్స్ కలిపి తీసుకున్నట్లు దర్యాప్తులో బయటపడింది. ఈ పార్టీకోసం సిమ్లా నుంచి డ్రగ్స్ తీసుకొచ్చినట్లు అధికారులు గుర్తించారు.

కౌశిక్ అనే వ్యక్తి అభిషేక్ నుంచి డ్రగ్స్ కొనుగోలు చేసినట్లు తెలిపారు. అలాగే మరికొన్ని డ్రగ్స్ వేర్వేరు మార్గాల్లో సేకరించినట్లు దర్యాప్తులో తేలింది. పైలట్ రోహిత్ డ్రైవర్ శరత్ కూడా ఇందులో పాత్ర ఉన్నట్లు గుర్తించారు. ఇదే సమయంలో సీఎం రేవంత్ రెడ్డి ఢిల్లీలో కాంగ్రెస్ అగ్రనేతలు రాహుల్ గాంధీ, ప్రియాంకా గాంధీలను కలిశారు. టీపీసీసీ అధ్యక్షుడు మహేశ్ కుమార్ గౌడ్‌తో కలిసి ఈ భేటీ జరిగింది. ఇటీవల రాజ్యసభకు ఎన్నికైన వేం నరేందర్ రెడ్డిని వారికి పరిచయం చేశారు.

రాజకీయ అంశాలపై కూడా సీఎం స్పందించారు. తెలంగాణలో ఎన్నికలు 2029లోనే జరుగుతాయని, 2028లో ఎన్నికలు ఉండవని తెలిపారు. మహిళా రిజర్వేషన్లు ముందుగా అమల్లోకి వస్తే మంచిదని అభిప్రాయపడ్డారు. మొయినాబాద్ డ్రగ్స్ కేసులో దర్యాప్తు కొనసాగుతున్న నేపథ్యంలో, మరిన్ని వివరాలు త్వరలో వెలుగులోకి వచ్చే అవకాశముంది.