అస్సాంలో బీజేపీ విజయం అంత ఈజీ కాదా?

ఓటర్ల మాటలలో ఒక విషయం స్పష్టంగా తెలుస్తోంది. ఈ ఎన్నికలు కేవలం ప్రభుత్వ వ్యతిరేకతకు సంబంధించినవి కాకపోవచ్చు. చెల్లాచెదురుగా, పొరలు పొరలుగా ఉన్న అసంతృప్తికి సంబంధించినవి కావచ్చు. ఓటింగ్ సమయానికి ఇది క్రమంగా ఒక పెద్ద సమస్యగా మారవచ్చు.

దిస్పూర్‌లో అధికారం కోసం ఎగువ అస్సాంలోని 47 సీట్లు కీలకంగా ఉన్నాయి. 2021లో తేయాకు తోటల మద్దతు స్థానిక అస్సామీ ఓట్ల ఏకీకరణతో బీజేపీ ఇక్కడ సుమారు 27 సీట్లను తన ఖాతాలో వేసుకుంది. ఈ ప్రాంతం ఒకప్పుడు ఇవి అసోం గణ పరిషత్ (ఏజీపీ)కి కంచుకోటగా ఉండేవి. కానీ ఇప్పుడు బీజేపీ ఈ కోటలో పాగా వేసింది.

జార్ఖండ్ ముక్తి మోర్చా (జేఎంఎం), జై భారత్ పార్టీ (జేబీపీ) కలిసి ఎగువ అస్సాంలోని 26 స్థానాల్లో పోటీ చేస్తున్నాయి. ప్రధానంగా తేయాకు తెగలు, ఆదివాసీ వర్గాలు అధికంగా ఉన్న ప్రాంతాల్లో ఈ పోటీ జరుగుతోంది. అదే సమయంలో, ఆ వర్గానికి ఎస్టీ హోదా ఇవ్వనందుకు బీజేపీ లక్ష్యంగా విమర్శిస్తున్నాయి. దీనివల్ల తేయాకు తోటల ప్రాంతాల్లో ఓట్లు చీలిపోతాయనే ఆందోళనలు పెరిగాయి.

ముఖ్యమంత్రి హిమంత బిస్వా శర్మ 'అరుణోదయ్' వంటి పథకాల ద్వారా మహిళా ఓటర్లలో కొంతమందిని తనవైపు తిప్పుకోగలిగారు. అయినప్పటికీ, యువ ఓటర్లలో, ముఖ్యంగా తొలిసారి ఓటు వేస్తున్న వారిలో తీవ్ర నిరాశ స్పష్టంగా కనిపిస్తోంది. 2025 సెప్టెంబర్‌లో గాయకుడు జుబీన్ గార్గ్ మరణం చుట్టూ రోజుకోసారి వస్తున్న కథలు కూడా బీజేపీకి వ్యతిరేకంగా ఉన్నాయి.

నల్బారి, సర్భోగ్ వంటి ప్రదేశాలలో నిరసనలు, న్యాయం కోరుతూ సోషల్ మీడియాలో నిరంతరంగా సాగుతున్న ప్రచారాలు ఈ సమస్యను సజీవంగా ఉంచాయి. చాలా మంది యువ ఓటర్లు "బ్యాలెట్ ద్వారా సమాధానం చెప్పడానికి" వేచి చూస్తున్నామని అంటున్నారు.

"జుబీన్ గార్గ్ కేసులో న్యాయం జరగకపోతే ప్రజలు తమకు ఓటు వేయవద్దని ముఖ్యమంత్రి హిమంత బిశ్వా శర్మ పేర్కొన్నారు. అయితే, ఛార్జిషీట్‌లో ఉన్న లొసుగుల వల్ల కోర్టులో నిందితులు నిర్దోషులుగా విడుదలయ్యే అవకాశం ఉందని చాలా మంది న్యాయవాదులు ఆందోళన వ్యక్తం చేశారు.

అంతేకాకుండా, వేగవంతమైన విచారణ కోసం ఫాస్ట్-ట్రాక్ కోర్టును ఏర్పాటు చేయడంలో కూడా ముఖ్యమంత్రి విఫలమయ్యారు," అని గోలాఘాట్ పట్టణానికి చెందిన కార్యకర్త అపూర్బ బల్లవ్ గోస్వామి అన్నారు. "ప్రభుత్వ చర్యలతో యువతరం సంతృప్తిగా లేదు, ఈ అసంతృప్తి ఓట్లలో ప్రతిబింబించవచ్చు," అని గోస్వామి అన్నారు.

ఈ ఎన్నికల సందర్భంగా బీజేపీ అంతర్గత సమస్యలు కూడా బయటపడ్డాయి. సస్పెండ్ అయిన రాష్ట్ర ఉపాధ్యక్షుడు జయంత కుమార్ దాస్ సంచలన ఆరోపణలు చేశారు. పార్టీ రాష్ట్ర ప్రధాన కార్యాలయంలోని రూమ్ నెం. 501 నుంచి ఒక “నకిలీ ఐటీ సెల్” నడుస్తోందని, ప్రజల అభిప్రాయాలను ప్రభావితం చేయడానికి వేలాది నకిలీ సోషల్ మీడియా ఖాతాలను ఉపయోగిస్తున్నారని ఆయన ఆరోపించారు.

పార్టీ ఈ ఆరోపణను తోసిపుచ్చింది. కానీ ఈ వివాదం, ముఖ్యంగా ఇంకా నిర్ణయం తీసుకోని ఓటర్లలో అపనమ్మకం అనే పెద్ద కథనానికి ఆజ్యం పోసింది. అధికారిక అభ్యర్థులకు వ్యతిరేకంగా తిరుగుబాటు చేసినందుకు సస్పెండ్ అయిన తొమ్మిది మంది నాయకులలో దాస్ కూడా ఒకరు.

ఆయన బహిరంగంగా విమర్శలు చేయడం అందులో ఉన్న అంతర్గత కుమ్ములాటలను తేటతెల్లం చేస్తుంది. ప్రద్యుత్ బోర్డోలోయ్, భూపేన్ కుమార్ బోరా వంటి కాంగ్రెస్ ఫిరాయింపుదారులకు ప్రాధాన్యత లభించడం, టిక్కెట్లు కూడా రావడం పట్ల క్షేత్రస్థాయి కార్యకర్తలు అసంతృప్తిగా ఉన్నారు. రాజకీయ వర్గాలలో ఇప్పుడు “కాంగ్ బి” అంటే బీజేపీలోపల కాంగ్రెస్ అనే కొత్త పదం వాడుకలోకి వచ్చింది.

మాజీ కేంద్ర మంత్రి, నాలుగుసార్లు ఎంపీగా పనిచేసిన రాజేన్ గోహైన్, నల్బారి మాజీ ఎమ్మెల్యే (మాజీ ఆర్‌ఎస్‌ఎస్ బోధకుడు) అశోక్ శర్మ వంటి సీనియర్ నాయకులు పార్టీ నుంచి తప్పుకోవడం, పాతతరం నాయకులలో అసంతృప్తిని సూచిస్తోంది.

టికెట్ల కేటాయింపు పై కొన్ని ప్రాంతాల్లో పార్టీలోనే నిరసనలు జరిగినట్లు కూడా వార్తలు వచ్చాయి. అభయపురి నియోజకవర్గం నుంచి టికెట్ నిరాకరించడంతో బీజేపీ నాయకుడు సంజయ్ రాయ్ బహిరంగంగా కన్నీళ్లు పెట్టుకున్నారు. ఆ తర్వాత తాను స్వతంత్ర అభ్యర్థిగా బరిలోకి దిగుతానని ప్రకటించారు. అభయపురి, బిహ్‌పురియా, సోనారి, బరాక్ వ్యాలీ, పశ్చిమ గౌహతి వంటి ప్రాంతాల్లో అసంతృప్తి నెలకొన్నట్లు సమాచారం.

బరాక్ వ్యాలీలో, బెంగాలీ హిందూ ఓటర్లలోని కొన్ని వర్గాల మద్దతుతో బీజేపీ ఇప్పటికీ నిర్మాణాత్మకంగా బలంగానే కనిపిస్తోంది. కానీ, సిల్చార్ నుంచి మాజీ ఎంపీ రాజ్‌దీప్ రాయ్‌ను బరిలోకి దింపాలన్న నిర్ణయం స్థానిక శ్రేణుల్లో కలకలం రేపింది.

ఎందుకంటే ఆయన అభ్యర్థిత్వాన్ని క్షేత్రస్థాయి కార్యకర్తలు అంగీకరించడం లేదు. జనాభా పెరుగుదల ఉన్నప్పటికీ, నియోజకవర్గాల పునర్విభజన వల్ల ఈ ప్రాంతంలో సీట్ల సంఖ్య 15 నుంచి 13కి తగ్గింది. ఇది ఇంకా పూర్తిస్థాయి సమస్య కానప్పటికీ, దీనిని రాజకీయంగా ఒక ఆయుధంగా వాడుకునే అవకాశం ఉంది. కీలక ప్రచార ప్రాంతాలలో, ముఖ్యంగా ఎగువ అస్సాంలో కేంద్ర మంత్రి సర్బానంద సోనోవాల్‌కు ఇప్పటికీ పలుకుబడి ఉన్నప్పటికీ, ఆయన ప్రాచుర్యం తక్కువగా ఉండటం మరో చర్చనీయాంశం.

హోరాహోరీ పోరులో యునైటెడ్ పీపుల్స్ పార్టీ లిబరల్ (UPPL), జార్ఖండ్ ముక్తి మోర్చా (JMM) వంటి చిన్న పార్టీలు కీలకంగా మారవచ్చు. UPPL బోడో ఓటు బ్యాంకును చీల్చేస్తుందని అంచనా వేస్తుండగా, తేయాకు తోటలు, ఆదివాసీలు అధికంగా ఉన్న ప్రాంతాలలో JMM గట్టి సవాలు విసురుతుందని భావిస్తున్నారు.

మౌలిక సదుపాయాలు, సంక్షేమ పథకాలపై బీజేపీ ప్రభుత్వం చేస్తున్న భారీ వ్యయం ఒక ద్విముఖ కత్తిలా మారింది. ఈ పథకాలు కొన్ని వర్గాల ఓటర్లను నిలబెట్టుకోవడంలో సహాయపడినప్పటికీ, ప్రతిపక్షాలు తమ వాదనను మరింత పదును పెడితే, పెరుగుతున్న రాష్ట్ర అప్పులు, క్షేత్రస్థాయిలో అసమాన వ్యయం ఒక సమస్యగా మారవచ్చని విమర్శకులు వాదిస్తున్నారు. అంగన్‌వాడీ, ఆశా కార్యకర్తలతో పాటు ఇతరులు కూడా తక్కువ వేతనాలు, చెల్లింపులలో జాప్యంపై ఆందోళన వ్యక్తం చేశారు.

ఈ అంశం కొన్ని ప్రాంతాలలో ఓటింగ్ తీరును ప్రభావితం చేయవచ్చు. ఇవన్నీ ఉన్నప్పటికీ, అస్సాంలో ప్రభుత్వ వ్యతిరేకత స్పష్టంగా కనిపించడం లేదు. దానికి బదులుగా, యువత ఆగ్రహం, అంతర్గత తిరుగుబాటు, ప్రాంతీయ అసంతృప్తి, జుబీన్ కేసు వంటి భావోద్వేగ సమస్యలు వంటి అనేక రకాల అంశాలు ఇందులో ఉన్నాయి.

2021లో, బీజేపీ నేతృత్వంలోని కూటమి ఓట్ల వాటాలో స్వల్ప ఆధిక్యంతో ముందుంది. నౌబైషా సీటు వంటి ఎగువ, ఉత్తర అస్సాంలోని 17 నియోజకవర్గాలలో 1-2 శాతం చిన్న మార్పు కూడా ఫలితాలను మార్చగలదు. బీజేపీ నేతృత్వంలోని ఎన్డీఏకు ఇప్పటికీ సంస్థాగత ఆధిక్యం ఉంది. తిరిగి అధికారంలోకి వచ్చే అవకాశం కూడా కనిపిస్తుంది. కానీ అంత సునాయాస విజయం దక్కకపోవచ్చు.

మార్చి 29న కాంగ్రెస్ నేతృత్వంలోని ఐక్య ప్రతిపక్షం తమ ఎన్నికల మేనిఫెస్టోను విడుదల చేయడంతో, ప్రతిపక్షం ఎన్డీఏ సంక్షేమ పథకాలను నేరుగా సవాలు చేసింది. అంతేకాకుండా, జుబీన్ గార్గ్ కేసులో 100 రోజుల్లో న్యాయం చేస్తామని చేసిన ప్రకటన యువతరాన్ని గణనీయంగా ప్రభావితం చేసి, వారి మద్దతును తగ్గించే అవకాశం ఉంది. ఏది ఏమైనప్పటికీ, అస్సాంలో హోరాహోరీ పోరు జరగబోతోంది. ఇక్కడ పెద్ద కథనాలు కాకుండా స్థానిక అంశాలే దిస్పూర్‌లో చివరికి ఎవరు కూర్చుంటారో నిర్ణయించగలవు.