ఆందోళనగా తెలంగాణ ఆర్థిక వ్యవస్థ: కిషన్

తెలంగాణ ఆర్థిక వ్యవస్థపై కేంద్రమంత్రి కిషన్ రెడ్డి తీవ్ర ఆందోళన వ్యక్తం చేశారు. రాష్ట్ర బడ్జెట్ సమావేశాలకు ముందుగానే రాష్ట్ర ఆర్థిక వ్యవస్థపై శ్వేతపత్రం విడుదల చేయాలని డిమాండ్ చేశారు. ఈ మేరకు సీఎం రేవంత్ రెడ్డికి కిషన్ రెడ్డి బహిరంగ లేఖ రాశారు. 2023 అసెంబ్లీ ఎన్నికల సమయంలో కాంగ్రెస్ పార్టీ 6 ప్రధాన గ్యారంటీలతోపాటు 420 హామీలను ఇచ్చి ప్రజలను మభ్యపెట్టిందని ఘాటుగా వ్యాఖ్యానించారు. కానీ అధికారంలోకి వచ్చిన తర్వాత రాష్ట్ర ఖజానా ఖాళీ అంటూ హామీలను అటకెక్కించేశారని, వాటి అమలుపై ప్రశ్నించిన ప్రతిసారి తప్పించుకోవడానికి ప్రయత్నిస్తున్నారని కిషన్ రెడ్డి ఆందోళన వ్యక్తం చేశారు.

ఇటీవల సోనియా-రాహుల్‌గాంధీ కుటుంబానికి, కాంగ్రెస్ పార్టీకి అవసరమైతే రూ.1,000 కోట్లు ఇవ్వడానికి సీఎం ప్రకటించడం తీవ్ర దుమారరం రేపిందని, దీని కారణంగా అనేక సమస్యలు రానున్నాయని కిషన్ తన లేఖలో పేర్కొన్నారు. కేంద్ర సహాయం కూడా ఘనంగా ఉందని, 2014 నుంచి నరేంద్ర మోదీ నేతృత్వంలోని కేంద్ర ప్రభుత్వం తెలంగాణ అభివృద్ధికి దాదాపు రూ.12 లక్షల కోట్ల నిధులు కేటాయించిందని గుర్తు చేశారు కిషన్ రెడ్డి.

ఇందులో రహదారులు, రైల్వే బడ్జెట్, ఉపాధి హామీ, ఉచిత రేషన్, విద్య, ఆరోగ్య, విద్యుత్ ప్రాజెక్టులు, పీఎం కిసాన్, ఎరువుల సబ్సిడీలు, స్థానిక సంస్థలకు నిధులు ఉన్నాయని తెలిపారు. ‘‘కేంద్రం ద్వారా రాష్ట్రానికి రూ.10,000 కోట్ల పైగా వడ్డీ రహిత రుణాలు SASCI పథకం కింద అందాయి. కేంద్రం అందించిన రుణాలు రాష్ట్ర ప్రభుత్వ ప్రాజెక్టుల అమలుకు ముఖ్యమైన వనరుగా మారాయి. అయినప్పటికీ ప్రస్తుతంలో రాష్ట్రం పూర్తిగా కేంద్ర నిధులపై ఆధారపడి ఉంది. గత 27 నెలల కాంగ్రెస్ పాలనలో రాష్ట్ర ఆర్థిక పరిస్థితి తీవ్రమైన దుస్థితిలో ఉంది’’ అని కిషన్ రెడ్డి లేఖలో పేర్కొన్నారు.

రాష్ట్ర తలసరి అప్పులు కూడా సంవత్సరాలుగా పెరుగుతున్నాయని, ఈ నేపథ్యం లో ప్రజల ముందు ఆర్థిక వాస్తవాలు సత్యంగా వెల్లడించాల్సిన అవసరం ఉన్నట్టు అన్నారు. కిషన్ రెడ్డి పేర్కొన్నట్టుగా, మార్చి 16 నుండి ప్రారంభమయ్యే బడ్జెట్ సమావేశాలకు ముందు ప్రభుత్వం పూర్తి శ్వేతపత్రాన్ని విడుదల చేస్తే, ప్రజలకు రాష్ట్ర ఆర్థిక పరిస్థితి స్పష్టమవుతుంది.