‘సికింద్రాబాద్ అస్తిత్వంపై కుట్రలు సహించం’

రెండేళ్ల పాలనలో సీఎం రేవంత్ రెడ్డి పేర్లు మార్చడం తప్ప రాష్ట్రానికి చేసింది ఏమీలేదని మాజీ మంత్రి, బీఆర్ఎస్ వర్కింగ్ ప్రెసిడెంట్ కేటీఆర్ విమర్శించారు. తెలంగాణను టీఎస్ నుంచి టీజీగా మార్చడం వల్ల ప్రజలకు లాభం ఏమీ లేదని అన్నారు. తెలంగాణ తల్లి రూపాన్ని మార్చి కాంగ్రెస్ తల్లిని తీసుకొచ్చారని మండిపడ్డారు. హైదరాబాద్ తెలంగాణ భవన్‌లో నిర్వహించిన సమావేశంలో కేటీఆర్.. కాంగ్రెస్‌పై విమర్శనాస్త్రాలు సంధించారు. రాజముద్ర నుంచి చార్మినార్ తొలగిస్తామనడం సరికాదని చెప్పారు. ఇప్పటికే కాకతీయ కళాతోరణం తీసివేశారని గుర్తుచేశారు. ఇవన్నీ తుగ్లక్ పనులేనని అన్నారు.

ప్రజలు అధికారం ఇచ్చింది హక్కులు కాపాడటానికేనని కేటీఆర్ తెలిపారు. కానీ ప్రభుత్వం విధ్వంసం తప్ప అభివృద్ధి చేయలేదని అన్నారు. రెండేళ్లలో హైదరాబాద్‌లో ఒక్క కొత్త రోడ్డు కూడా వేయలేదని విమర్శించారు. ఒక్క ఫ్లైఓవర్ కూడా కట్టలేదని చెప్పారు. అధికారం శాశ్వతం కాదని హెచ్చరించారు. కాంగ్రెస్ నాయకులు చరిత్రహీనులుగా మిగిలిపోతారని అన్నారు. సికింద్రాబాద్ అస్తిత్వాన్ని దెబ్బతీసిన పార్టీగా కాంగ్రెస్ మిగులుతుందని వ్యాఖ్యానించారు.

సికింద్రాబాద్ ఐడెంటిటీని తొలగించాలనే ప్రయత్నాలు జరుగుతున్నాయని కేటీఆర్ మండిపడ్డారు. అందుకే అన్ని వర్గాల ప్రజలు శాంతియుత ర్యాలీకి సిద్ధమయ్యారని తెలిపారు. పార్టీలకు అతీతంగా పిలుపునిచ్చారని చెప్పారు. ఆ ర్యాలీకి బీఆర్ఎస్‌ను కూడా ఆహ్వానించారని తెలిపారు. ప్రజాప్రతినిధులు సంఘీభావం తెలపాలని నిర్ణయించుకున్నామని అన్నారు. కానీ ప్రభుత్వం వేలాదిమందిని అరెస్టు చేసిందని విమర్శించారు. తమను కూడా తెలంగాణ భవన్‌లోనే నిర్బంధించారని చెప్పారు.

అరెస్టులు చేసి ఆనందం పొందడం దుర్మార్గమని కేటీఆర్ అన్నారు. కోర్టుకు వెళ్లి న్యాయం కోసం పోరాడతామని స్పష్టం చేశారు. కోర్టు అనుమతితో మళ్లీ ర్యాలీ నిర్వహిస్తామని చెప్పారు. సికింద్రాబాద్ ప్రజల మనోభావాలను బీఆర్ఎస్ గౌరవిస్తుందని తెలిపారు. అరెస్టు చేసిన వారిని భేషరతుగా విడుదల చేయాలని డిమాండ్ చేశారు.

కేసీఆర్ పాలనలో పరిపాలన వికేంద్రీకరణ జరిగిందని కేటీఆర్ గుర్తుచేశారు. కొత్త జిల్లాలు ఏర్పాటు చేశామని చెప్పారు. కొత్త మండలాలు తీసుకొచ్చామని తెలిపారు. రెవెన్యూ డివిజన్లు ఏర్పాటు చేశామని అన్నారు. తండాలను గ్రామ పంచాయతీలుగా మార్చామని చెప్పారు. హైదరాబాద్‌లో జోన్ల సంఖ్య పెంచినా నగర అస్తిత్వాన్ని ఎప్పుడూ తాకలేదని స్పష్టం చేశారు.

ఇప్పుడు ఉన్న జిల్లాలను తొలగించాలనే ఆలోచనలు తుగ్లక్ చర్యలేనని విమర్శించారు. చేతనైతే సికింద్రాబాద్‌ను అభివృద్ధి చేయాలని సూచించారు. ఫోర్త్ సిటీ పేరుతో ప్రయోగాలు చేయవద్దని అన్నారు.

తెలంగాణ రాష్ట్రం తప్పుదారి పట్టిందని కేటీఆర్ అన్నారు. తుగ్లక్ పాలన ఎలా ఉంటుందో ప్రజలు చూస్తున్నారని వ్యాఖ్యానించారు. ఆరు గ్యారంటీలు చెప్పి కాంగ్రెస్ అధికారంలోకి వచ్చిందని అన్నారు. అధికారంలోకి వచ్చిన తర్వాత ఆ హామీలు అమలు కాలేదని విమర్శించారు.

సికింద్రాబాద్ హైదరాబాద్ నగరాలకు శతాబ్దాల చరిత్ర ఉందని కేటీఆర్ చెప్పారు. ఇవి రెండు కళ్లు లాంటివని అన్నారు. అందుకే జంట నగరాలుగా గుర్తింపు ఉందని తెలిపారు. ఆ బంధాన్ని చెడగొట్టాలనుకోవడం మంచిది కాదని హెచ్చరించారు.

సికింద్రాబాద్ మున్సిపల్ కార్పొరేషన్ ఏర్పాటు చేయాలని డిమాండ్ చేస్తూ బీఆర్ఎస్ శాంతి ర్యాలీ చేపట్టిందని తెలిపారు. ఆ ర్యాలీని అడ్డుకోవడం ప్రజాస్వామ్యానికి విరుద్ధమని అన్నారు. ప్రజల దీవెనలతో బీఆర్ఎస్ మళ్లీ అధికారంలోకి వస్తుందని ధీమా వ్యక్తం చేశారు. అప్పటికి సికింద్రాబాద్‌ను జిల్లాగా ఏర్పాటు చేసే ఆలోచన చేస్తామని కేటీఆర్ స్పష్టం చేశారు.