తమకు తాము జాతిపతి అనుకోవడం విడ్డూరం: రేవంత్

తెలంగాణలో కేసీఆర్, బీఆరెస్‌పై సీఎం రేవంత్ రెడ్డి తాజాగా స్ట్రాంగ్ కౌంటర్ ఇచ్చారు. జాతిపిత అని కొందరు తమను తాము ప్రకటించుకోవడంపై ఆయన తీవ్రంగా స్పందించారు. కొంతమంది ఉద్యమకారులమని చెప్పుకుంటున్నారని రేవంత్ రెడ్డి అన్నారు. చిన్న నోటీసులు ఇస్తే జాతిపితకు నోటీసులా అంటూ ప్రశ్నించడం సరైంది కాదని చెప్పారు.

గాంధీజీ పదవులను త్యాగం చేసి ప్రాణాలు విడిచారని గుర్తు చేశారు. ఇప్పుడు జాతిపితమని చెప్పుకునేవారు ఏం చేశారో చెప్పాలని వ్యాఖ్యానించారు. తెలంగాణ ఉద్యమాన్ని ఏకం చేసి నడిపించిన ప్రొఫెసర్ కోదండరాం ఉద్యమకారుడు కాదా అని ప్రశ్నించారు. ఆయన్ను తలుపులు బద్దలు కొట్టి అరెస్టు చేసింది మీ పాలనలోనే జరిగిందని గుర్తు చేశారు.

తమను మాత్రం అలా అరెస్టు చేయలేదని చెప్పారు. నోటీసులు ఇచ్చి విచారణకు పిలిచారని తెలిపారు. రావి నారాయణ రెడ్డి లాంటి వారు తెలంగాణ కోసం సర్వం కోల్పోయారని రేవంత్ రెడ్డి అన్నారు. పదవులు, వేలకోట్ల ఆస్తులు సంపాదించిన వారు ఉద్యమకారులు ఎలా అవుతారని ప్రశ్నించారు. ప్రజలు తిరస్కరించినప్పుడు అర్థం చేసుకోవాలని సూచించారు. ప్రజలే తప్పు చేశారని చెప్పడం ప్రజాస్వామ్య లక్షణం కాదని అన్నారు.

అక్రమ మార్గం ఎంచుకున్న వారు విచారణ ఎదుర్కోవాల్సిందే అని అంబేద్కర్ చెప్పారని గుర్తు చేశారు. శిబు సోరెన్ లాంటి వారు కూడా విచారణ ఎదుర్కొన్నారని ఉదాహరణ ఇచ్చారు. మనమంతా దైవాంశ సంభూతులు కాదని రేవంత్ రెడ్డి స్పష్టం చేశారు. ప్రజాస్వామ్యంలో తప్పు చేసినవారు విచారణను ఎదుర్కోవాల్సిందే అని తేల్చి చెప్పారు. చివరగా, చట్టప్రకారం విచారణ కొనసాగుతుందని, ప్రజాస్వామ్య వ్యవస్థలో అందరికీ ఒకే నిబంధనలు వర్తిస్తాయని ఆయన తెలిపారు.