మున్సిపల్ పోరులో 'మంత్రుల' మార్క్

తెలంగాణ మున్సిపల్ ఎన్నికల నగారాలో అధికార కాంగ్రెస్ పార్టీ ప్రభంజనం సృష్టించింది. అసెంబ్లీ, పార్లమెంట్, పంచాయతీ ఎన్నికల తర్వాత వరుసగా నాలుగోసారి తన విజయ పరంపరను కొనసాగిస్తూ మున్సిపల్ కోటలపై 'హస్తం' జెండాను రెపరెపలాడించింది. ముఖ్యంగా, ఈ ఎన్నికలను ప్రతిష్టాత్మకంగా తీసుకున్న మంత్రులందరూ తమ సొంత నియోజకవర్గాల్లో ప్రత్యర్థులకు చుక్కలు చూపించి, స్థానికంగా తమకున్న పట్టును మరోసారి నిరూపించుకున్నారు.

సీఎం, డిప్యూటీ సీఎంల నియోజకవర్గాల్లో క్లీన్ స్వీప్

ముఖ్యమంత్రి రేవంత్ రెడ్డి ప్రాతినిధ్యం వహిస్తున్న కొడంగల్ మునిసిపాలిటీలో కాంగ్రెస్ ఏకపక్ష విజయం సాధించింది. మొత్తం 12 వార్డులకు గాను 10 వార్డులను కైవసం చేసుకుని తన కోటలో తిరుగులేదని సీఎం నిరూపించారు. అటు ఉప ముఖ్యమంత్రి భట్టి విక్రమార్క తన నియోజకవర్గమైన మధిరలోనూ అదే జోరును కొనసాగించి పార్టీని విజయపథంలో నడిపారు.

నల్గొండలో 'డబుల్' ధమాకా

నల్గొండ జిల్లా మంత్రులు ఉత్తమ్ కుమార్ రెడ్డి, కోమటిరెడ్డి వెంకటరెడ్డి తమ పరిధిలోని పట్టణాల్లో గెలుపు గుర్రాలు ఎక్కించారు. ఉత్తమ్ ఆధ్వర్యంలో కోదాడ, హాలియా మునిసిపాలిటీలు హస్తగతం కాగా, కోమటిరెడ్డి తన నియోజకవర్గ కేంద్రమైన నల్లగొండ కార్పొరేషన్లో భారీ మెజారిటీతో పార్టీని గెలిపించారు. ఇక్కడ కాంగ్రెస్ అభ్యర్థులు స్పష్టమైన ఆధిక్యాన్ని ప్రదర్శించారు.

మంత్రుల జోరు.. మున్సిపల్ హోరు

శ్రీధరాబాబు: తన సొంత గడ్డ మంథనిలో భారీ విజయంతో కాంగ్రెస్ జెండా ఎగరేశారు.

సీతక్క: ములుగు మునిసిపాలిటీలో వ్యూహకర్తగా వ్యవహరించి విజయంలో కీలక పాత్ర పోషించారు.

దామోదర రాజనరసింహ: ఆందోల్ మునిసిపాలిటీలో పార్టీని విజయతీరాలకు చేర్చారు.

పొన్నం ప్రభాకర్: హుస్నాబాద్ మునిసిపాలిటీని కాంగ్రెస్ ఖాతాలో వేశారు.

జూపల్లి కృష్ణారావు: కొల్లాపూర్ మునిసిపాలిటీలో పట్టు నిలుపుకున్నారు.

ముఖ్య నేతలు: వాకిటి శ్రీహరి (మక్తల్), లక్ష్మణ్ కుమార్ (ధర్మపురి), వివేక్ వెంకటస్వామి (చెన్నూరు) కూడా తమ నియోజకవర్గ కేంద్రాల్లో పార్టీని గెలిపించుకున్నారు.

ప్రచారం ఎక్కడ చేసినా.. ఫలితం పక్కా!

మంత్రులు తుమ్మల నాగేశ్వరరావు, పొంగులేటి శ్రీనివాసరెడ్డి తమ నియోజకవర్గాల్లో (ఖమ్మం, పాలేరు) ఎన్నికలు లేకపోయినప్పటికీ, ఇతర ప్రాంతాల్లో గెలుపు బాధ్యతలు భుజాన వేసుకున్నారు. తుమ్మల తన పాత నియోజకవర్గమైన సత్తుపల్లి మరియు కల్లూరు మునిసిపాలిటీల్లో సుడిగాలి పర్యటనలు చేసి పార్టీని గెలిపించారు. పొంగులేటి ఇన్‌ఛార్జ్‌గా ఉన్న కొత్తగూడెంలో గట్టి పోటీ ఇచ్చి పార్టీకి ఊపిరి పోశారు.

హ్యాట్రిక్ ప్లస్ వన్!

రాష్ట్రవ్యాప్తంగా వెలువడిన ఫలితాల ప్రకారం, 116 మున్సిపాలిటీల్లో కాంగ్రెస్ 64కు పైగా స్థానాల్లో స్పష్టమైన ఆధిక్యం సాధించగా, బీఆర్ఎస్ రెండో స్థానంలో నిలిచింది. బీజేపీ కొన్ని పట్టణాల్లో ప్రభావం చూపినప్పటికీ మూడో స్థానానికే పరిమితమైంది. ఈ గెలుపు ముఖ్యమంత్రి రేవంత్ రెడ్డి పాలనకు ప్రజలు ఇచ్చిన మద్దతుగా రాజకీయ వర్గాలు భావిస్తున్నాయి.

స్థానిక పట్టు చాటుకున్న మంత్రులు

మొత్తంగా చూస్తే మంత్రులు తమ నియోజకవర్గాల్లోనే కాకుండా ఇన్‌ఛార్జ్‌గా ఉన్న ప్రాంతాల్లో కూడా కాంగ్రెస్‌కు విజయాలు సాధించడంలో సక్సెస్ అయ్యారు. స్థానికంగా తమకున్న ప్రభావం, కేడర్ సమన్వయం, వ్యూహాత్మక ప్రచారం ఫలితాల్లో ప్రతిఫలించింది. ఈ విజయాలు ప్రభుత్వానికి రాజకీయ బలం అందించాయి. మున్సిపల్ స్థాయి నుంచి రాష్ట్ర స్థాయి రాజకీయాల దాకా కాంగ్రెస్ తన స్థిరమైన అడుగులు వేస్తోందనే సంకేతాలు కనిపిస్తున్నాయి.