SIR తుది గడువు పొడిగింపు..

కేంద్ర ఎన్నికల సంఘం(Election Commission) ప్రత్యేక ఓటరు జాబితా సవరణ (S.I.R) కార్యక్రమాన్ని వారం పాటు పొడిగించింది. వాస్తవానికి డిసెంబర్ 4వ తేదీతో ఈ కార్యక్రమం ముగియాల్సి ఉంది. అయితే మరో వారం పొడిగించడంతో డిసెంబర్ 11వ తేదీతో S.I.R పూర్తవుతోంది. ప్రస్తుతం తొమ్మిది రాష్ట్రాలు, మూడు కేంద్రపాలిత ప్రాంతాల్లో S.I.R కొసాగుతోన్న విషయం తెలిసిందే.

తుది ఓటరు జాబితా ఫిబ్రవరి 14న..

ఇక ముసాయిదా ఓటర్ల జాబితా డిసెంబర్ 9కి బదులుగా డిసెంబర్ 16న ప్రచురిస్తారు. క్లెయిమ్‌లు అభ్యంతరాలను దాఖలు తేదీని డిసెంబర్ 16 నుంచి జనవరి 15, 2026కి మార్చారు. తుది ఓటర్ల జాబితా ఫిబ్రవరి 7న కాకుండా ఫిబ్రవరి 14న విడుదల అవుతుంది.

తమపై పనిభారం బాగా పెరిగిపోయిందని S.I.Rలో బూల్ లెవల్ అధికారులుగా బాధ్యతలు నిర్వహిస్తున్న ఉపాధ్యాయులు అంటున్నారు. ఒత్తిడి కారణంగా కొంతమంది BLOలు అనార్యోగం బారిన పడుతున్నారని పేర్కొన్నారు. పశ్చిమ బెంగాల్, తమిళనాడు, మధ్యప్రదేశ్, ఉత్తరప్రదేశ్‌లలో అనేక మంది BLOలు ఆత్మహత్యలకు పూనుకున్నారని ఆరోపణలున్నాయి.

మధ్యప్రదేశ్‌(Madhya Pradesh)లో బూత్ లెవల్ ఆఫీసర్లు(BLO)గా విధులు నిర్వహిస్తున్న ఇద్దరు ఉపాధ్యాయులు చనిపోయారు. అయితే వీరిద్దరూ అధిక పనిభారంతోనే చనిపోయారని కుటుంబసభ్యులు ఆరోపిస్తున్నారు.

రైసెన్ జిల్లాలో..

సత్లాపూర్ ప్రాంతానికి చెందిన రామకాంత్ పాండే అనే ఉపాధ్యాయుడు రైసెన్ జిల్లాలోని మండిదీప్‌లో S.I.R విధులు నిర్వహిస్తున్నాడు. శుక్రవారం రాత్రి అనారోగ్యంతో మరణించారు. పాండే మరణానికి కారణం ఏమిటని అడిగినప్పుడు, పోస్ట్‌మార్టం రిపోర్టు కోసం ఎదురుచూస్తున్నామని భోజ్‌పూర్ అసెంబ్లీ నియోజకవర్గం సబ్-డివిజనల్ అధికారి (ఎస్‌డీవో), ఎన్నికల రిజిస్ట్రేషన్ అధికారి చంద్రశేఖర్ శ్రీవాస్తవ తెలిపారు.కాగా అధిక పనిభారం కారణంగా ఒత్తిడితో అనార్యోగానికి గురై తన భర్త చనిపోయాడని పాండే భార్య రేఖ, కుటుంబ సభ్యులు చెబుతున్నారు.

దామోహ్ జిల్లాలో..

దామోహ్ జిల్లా రాంజ్రా గ్రామంలో బిఎల్‌వోగా పనిచేస్తున్న గోండ్ అనే ఉపాధ్యాయుడు గురువారం సాయంత్రం విధుల్లో ఉండగా అనారోగ్యానికి గురయ్యాడని డీఈవో ఎస్‌కె నేమా తెలిపారు. ‘‘అతన్ని (గోండ్) దామోహ్‌లోని జిల్లా ఆసుపత్రికి తీసుకెళ్లారు. పరిస్థితి విషమంగా ఉండటంతో జబల్‌పూర్ జిల్లాకు రిఫర్ చేశారు. అక్కడ చికిత్స పొందుతూ శుక్రవారం రాత్రి మరణించారు" అని డీఈవో చెప్పారు.

ఇటీవలే దామోహ్ జిల్లాలోని జబేరా అసెంబ్లీ సెగ్మెంట్ పరిధిలోని తెండుఖేడలో జరిగిన రోడ్డు ప్రమాదంలో బిఎల్‌వో శ్యామ్ సుందర్ శర్మ మరణించారు. ఎస్ఐఆర్ కారణంగా శ్యామ్ సుందర్ శర్మ తీవ్ర ఒత్తిడికి గురవుతున్నారని, గడువులోపు పని పూర్తిచేయకపోతే సస్పెండ్ చేస్తామని బెదిరించారని మృతుడి కుటుంబసభ్యులు ఆరోపించారు.