‘ఢిల్లీలో వాయు కాలుష్యంపై ప్రధాని మాట్లాడాలి’

ఢిల్లీ(Delhi)లో వాయు కాలుష్యం(Air Pollution) రోజురోజుకూ పెరిగిపోతుండటంతో ప్రధాని మోదీ జోక్యం చేసుకుని పరిష్కారం కనుగొనాలని IPS మాజీ అధికారి కిరణ్ బేడి(Kiran Bedi) శనివారం విజ్ఞప్తి చేశారు. జాతీయ రాజధాని ఢిల్లీ (ఎన్‌సిఆర్)లో గాలి నాణ్యత క్షీణిస్తుండడంతో ఆమె ఈ వ్యాఖ్యలు చేశారు. మన్ కీ బాత్ ప్రసంగంలో ఈ అంశంపై ప్రధాని మాట్లాడాలని కోరారు. తాను పుదుచ్చేరి లెఫ్టినెంట్ గవర్నర్‌గా పనిచేసిన కాలంలో అధికారులతో మోదీ జూమ్ మీటింగ్‌లను ఆమె గుర్తు చేశారు.

ఢిల్లీలో గాలి నాణ్యత AQI (Air Quality Index) 332గా నమోదయ్యింది. శుక్రవారం (AQI 369) కంటే ఇది కాస్త మెరుగు.

గాలి నాణ్యత తెలిపే సూచికలు..

CPCB ప్రకారం.. 0 - 50 మధ్య ఉంటే గాలి నాణ్యత "మెరుగ్గా" ఉందని, 51-100 మధ్య ఉంటే "సంతృప్తికరం", 101-200 మధ్య ఉంటే"మధ్యస్థం", 201-300 మధ్య ఉంటే "పేలవం", 301-400 మధ్య ఉంటే"చాలా పేలవం", 401-500 మధ్య ఉంటే గాలి నాణ్యత పూర్తిగా పడిపోయిందని అర్థం చేసుకోవాలి.

పార్లమెంటులో చర్చకు డిమాండ్..

గాలి కాలుష్యం వల్ల పిల్లలు, వృద్ధులు తరుచుగా అనారోగ్యం బారిన పడుతుండడంతో.. రోజురోజుకు ఢిల్లీలో పెరిగిపోతోన్న వాయు కాలుష్యంపై పార్లమెంటు శీతాకాల సమావేశాలకు ముందు చర్చ జరపాలని లోక్‌సభా ప్రతిపక్ష నేత రాహుల్ గాంధీ(Rahul Gandhi) డిమాండ్ చేస్తున్నారు. కొంతమంది పిల్లల తల్లులు నిన్న ఆయనను తన నివాసంలో కలిశారు. ఎయిర్ పొల్యూషన్‌(Air Pollution)తో పడుతున్న ఇబ్బందులను వారు రాహుల్ దృష్టికి తీసుకెళ్లారు. మోదీ జీ, ఈ సమస్య పరిష్కారానికి మీ వద్ద కార్యాచరణ ప్రణాళిక ఏమైనా ఉందా? ప్రజల ఆరోగ్యం పట్ల ప్రభుత్వానికి శ్రద్ధ ఉందా? అని రాహుల్ గాంధీ ప్రధానిని ప్రశ్నించారు కూడా.