Parliament | నినాదాల మధ్య రాజ్యసభను వాయిదా వేసిన డిప్యూటీ చైర్మన్

డిప్యూటీ చైర్మన్ హరివంశ్ నారాయణ్ సింగ్ అధ్యక్షతన బుధవారం మధ్యాహ్నం 12 గంటలకు రాజ్యసభ ప్రారంభమైంది. సమావేశమైన కొద్దిసేపటికే సభను ఆయన రేపటికి వాయిదా వేశారు. అంతకుముందు రాజ్యసభ నాయకుడు జేపీ నడ్డా మాట్లాడాలని డిప్యూటీ చైర్మన్ ఆయనను పిలిచారు. కాంగ్రెస్‌, సోనియాతో జార్జ్‌ సోరోస్‌కు ఉన్న సంబంధమేమిటో చెప్పాలని గత రెండు రోజులుగా సభ డిమాండ్‌ చేస్తోందని నడ్డా చెప్పారు. సోరోస్‌ నుంచి జనం దృష్టిని మరల్చేందుకు కాంగ్రెస్ ప్రయత్నిస్తోందని నడ్డా అన్నారు.

నిన్న అవిశ్వాస తీర్ణానం..

ధన్‌ఖడ్‌కు వ్యతిరేకంగా నిన్న ప్రతిపక్షాలు అవిశ్వాస నోటీసు సమర్పించిన విషయం తెలిసిందే. ట్రెజరీ ఎంపీలు "సోనియా-సోరోస్" అంటూ నినాదాలు చేయడంతో కేంద్ర పార్లమెంటరీ వ్యవహారాల మంత్రి కిరణ్ రిజిజును మాట్లాడమని ధన్‌ఖడ్ పిలిచారు. 72 ఏళ్ల ప్రజాస్వామ్యం తర్వాత రాజ్యసభకు ఓ రైతు కుమారుడు చైర్మన్‌ అయ్యారని రిజిజు పేర్కొన్నారు. ప్రతిపక్షాలు ఆయనపై దాడికి, దూషణకు దిగిన సమయంలో ధన్‌ఖడ్ సభ గౌరవాన్ని, ప్రజాస్వామ్యాన్ని ఎలా కాపాడాడో రిజిజు హైలైట్ చేశారు. ఛైర్మన్‌ను చూసి ప్రభుత్వం గర్విస్తోందని, ప్రజాస్వామ్యం, రైతుల ప్రయోజనాలను పరిరక్షించడానికి ఆయన ఎలా పని చేస్తారో చెప్పి ధన్‌ఖర్‌ను రిజిజు సమర్థించారు. సోనియా-సోరోస్ బంధం గురించి బీజేపీ ఆరోపించడం లేదని, ఒక విదేశీ ప్రచురణ నివేదిక అని తెలిపారు. మాజీ ప్రధాని దేవెగౌడ కూడా ప్రతిపక్షాలపై విరుచుకుపడగా.. కాంగ్రెస్ ఉపనేత ప్రమోద్ తివారీ ప్రభుత్వాన్ని "ప్రజాస్వామ్య కిల్లర్"గా అభివర్ణించారు.

ధన్‌కడ్‌ పక్షపాతపూరితంగా వ్యవహరిస్తున్నారంటూ ఆయనపై ప్రతిపక్ష భారత కూటమికి చెందిన పార్టీలు అవిశ్వాస తీర్మానం సమర్పించాయి. తీర్మానం ఆమోదానికి సాధారణ మెజారిటీ అవసరం. కానీ 243 మంది సభ్యుల సభలో వారికి అవసరమైన సంఖ్య లేదు. అయితే పార్లమెంటరీ ప్రజాస్వామ్యం కోసం పోరాడుతున్నామంటూ ప్రతిపక్ష సభ్యులు సమర్థించుకునే ప్రయత్నం చేశారు.

14 రోజుల నోటీసు..

కాంగ్రెస్, ఆర్జేడీ, టీఎంసీ, సీపీఐ, సీపీఐ-ఎం, జేఎంఎం, ఆప్, డీఎంకే, సమాజ్‌వాదీ పార్టీలతో సహా 60 మంది విపక్ష ఎంపీల సంతకాలతో కూడిన నోటీసును విపక్షాల తరఫున కాంగ్రెస్ నేతలు జైరాం రమేష్, నసీర్ హుస్సేన్ రాజ్యసభ కార్యదర్శి PC మోదీకి సమర్పించారు. అయితే కాంగ్రెస్ అధ్యక్షుడు మల్లికార్జున్ ఖర్గే, కాంగ్రెస్ పార్లమెంటరీ పార్టీ చైర్‌పర్సన్ సోనియా గాంధీ, వివిధ ప్రతిపక్ష పార్టీల ఫ్లోర్ లీడర్‌లు అందులో సంతకం చేయలేదని కొన్ని వర్గాల నుంచి వస్తున్న సమాచారం. ముందుగా ఆ నోటీసును డిప్యూటీ ఛైర్మన్ ఆమోదించాలి. రాజ్యసభలో బీజేపీ, దాని మిత్రపక్షాలకు 121 మంది సభ్యులు ఉండగా.. ప్రతిపక్షాలకు 86 మంది సభ్యులున్నారు. వైఎస్‌ఆర్‌సీపీ, బీజేడీ, ఏఐఏడీఎంకే, బీఆర్‌ఎస్‌, బీఎస్పీ వంటి పొత్తులేని పార్టీలకు మొత్తం 24 మంది సభ్యులు ఉన్నారు.