రేపటి నుంచి పార్లమెంట్ శీతాకాల సమావేశాలు

పార్లమెంటు శీతాకాల సమావేశాలు(Winter Parliament session) సోమవారం నుంచి ప్రారంభం కానున్నాయి. మూడు వారాల పాటు కొనసాగే ఈ సమావేశాల్లో సుమారు 14 బిల్లులను ప్రవేశపెట్టనున్నారు. వాటిలో అణుశక్తి వినియోగాన్ని నియంత్రించడంతో పాటు, ప్రైవేటు రంగ భాగస్వామ్యాన్ని అనుమతించం కోసం ‘ది అటామిక్ ఎనర్జీ బిల్లు- 2025', విశ్వవిద్యాలయాలు, ఉన్నత విద్యా సంస్థలకు స్వయంప్రతిపత్తిని ప్రోత్సహించడానికి భారత ఉన్నత విద్యా కమిషన్ బిల్లు 2025 అలాగే కంపెనీల చట్టం - 2013, LLP చట్టం, 2008లోని నిబంధనలను సవరించడానికి కార్పొరేట్ చట్టాలు (సవరణ) బిల్లు - 2025; సెబీ చట్టం, 1992, డిపాజిటరీల చట్టం, 1996 సెక్యూరిటీస్ కాంట్రాక్ట్స్ (నియంత్రణ) చట్టం, 1956లను ఏకీకృత మార్కెట్ కోడ్‌గా ఏకీకృతం చేయడానికి సెక్యూరిటీస్ మార్కెట్స్ కోడ్ బిల్లు - 2025, బీమా చట్టాలు (సవరణ) బిల్లు- 2025 ఉన్నాయి.

వివిధ పార్టీల నుంచి అభ్యంతరాలు రావడంతో.. కేంద్రపాలిత ప్రాంతం చండీగఢ్‌కు రాష్ట్రపతి నేరుగా నిబంధనలు జారీ చేసే అధికారాన్ని ప్రభుత్వం విరమించుకున్న విషయం తెలిసిందే.

కేంద్రాన్ని నిలదీయనున్న ప్రతిపక్షాలు..

వివిధ అంశాలపై కేంద్రాన్ని ప్రతిపక్షాలు నిలదీసే అవకాశం ఉంది. 12 రాష్ట్రాలు కేంద్రపాలిత ప్రాంతాల్లో కొనసాగుతోన్న ఓటర్ల జాబితాల సవరణ అంశాన్ని లేవనెత్తనున్నాయి. కొన్ని రాష్ట్రాల్లో పనిఒత్తిడితో బీఎల్‌వోలు అనారోగ్యం బారిన పడి ప్రాణాలు కోల్పోతున్నారని కాంగ్రెస్ ఆరోపిస్తు్న్న విషయం తెలిసిందే. దేశ రాజధాని ఢిల్లీలో రోజురోజుకు వాయు కాలుష్యం పెరిగిపోతుంది. ఈ సమస్య పరిష్కారానికి కేంద్ర వద్ద ఏమైనా ప్రణాళిక ఉందా అని రాహుల్ గాంధీ ప్రధాని మోదీని ప్రశ్నించారు. పెరిగిపోతోన్న కాలుష్యం వల్ల తమ పిల్లలు, వృద్ధులు తరుచుగా అనారోగ్యం బారిన పడుతున్నారని పిల్లలు తల్లులు రాహుల్‌ను తన నివాసంలో కలిశారు. కాలుష్య నియంత్రణకు చర్యలు తీసుకునేలా ఒత్తిడి తేవాలని వారు రాహుల్‌ను కోరారు. ఢిల్లీలో ఇటీవల కారు పేలుడు ఘటన సభ దృష్టికి తెచ్చి శాంతిభద్రతలపై కేంద్రాన్ని ప్రశ్నించే అవకాశం కూడా ఉంది.

ఫ్లోర్ లీడర్లతో రిజిజు సమావేశం..

పార్లమెంటరీ వ్యవహారాల మంత్రి కిరణ్ రిజిజు ఆదివారం ఉభయ సభల రాజకీయ పార్టీల ఫ్లోర్ లీడర్లతో విడివిడిగా సమావేశమయ్యారు. సమావేశాలు సజావుగా సాగేందుకు అన్ని పార్టీలు ఎంపీలు సహకరించాలని ఆయన విజ్ఞప్తి చేశారు. పార్లమెంట్ శీతాకాల సమావేశాలు డిసెంబర్ 19తో ముగుస్తాయి.