కొత్త ప్రభుత్వం ఎజెండాను సమీక్షించనున్న ప్రధాని మోదీ..
కొత్తగా ఏర్పడబోయే కేంద్ర ప్రభుత్వం వంద రోజుల ఎజెండాను ప్రధాని నరేంద్ర మోదీ ఈ రోజు సమీక్షించనున్నారని ప్రభుత్వ వర్గాలు తెలిపాయి.
సార్వత్రిక ఎన్నికలు ముగిశాయి. జూన్ 4న ఎన్నికల ఫలితాలు వెలువడనున్నాయి. ఈ నేపథ్యంలో ప్రధాని నరేంద్రమోదీ ఆధర్యంలో ఓ సమావేశం ఏర్పాటు కానున్నట్లు ప్రభుత్వ వర్గాలు వెల్లడించాయి. కొత్త ప్రభుత్వం కొలువయ్యాక 100 రోజుల ఎజెండాను ఇందులో సమీక్షించడానికి సుదీర్ఘ మేధో మథనం జరపనున్నారని తెలుస్తోంది. ఇందులో ఏడు సమావేశాలు జరగనున్నాయని, వీటన్నింటికి ప్రధాని నరేంద్రమోదీ అధ్యక్షత వహించనున్నారని తెలుస్తోంది.
శనివారం నాడు ప్రసారమైన ఎగ్జిట్ పోల్స్ బిజెపి నేతృత్వంలోని నేషనల్ డెమోక్రటిక్ అలయన్స్ భారీ విజయాన్ని సాధిస్తాయని అంచనా వేశాయి. మోదీ వరుసగా మూడో సారి అధికారాన్ని చేపట్టనుండటం లాంఛనమే అని తేలడంతో ఈ సమావేశానికి ప్రాధాన్యం ఏర్పడింది. లోక్ సభ ఎన్నికల ఫలితాలు మంగళవారం వెలువడనున్నాయి.
ఈ సమావేశంలో రెమాల్ తుఫాన్ ప్రభావంలో ఈశాన్య రాష్ట్రాలలో సంభవించిన ప్రకృతి వైపరీత్యాలపై సమీక్ష జరిపేందుకు మోదీ అధ్యక్షత వహిస్తారని ప్రభుత్వ వర్గాలు వెల్లడించాయి. జూన్ 5న వచ్చే ప్రపంచ పర్యావరణ దినోత్సవాన్ని పెద్ద ఎత్తున జరుపుకోవడానికి సన్నాహాలను సమీక్షించడానికి మరో సమావేశం, అలాగే దేశంలోని హీట్‌వేవ్ పరిస్థితులను సమీక్షించడానికి జరిగే సమావేశానికి కూడా ఆయన అధ్యక్షత వహిస్తారని పీఎంఓ వర్గాలు వెల్లడించాయి.
లోక్‌సభ ఎన్నికల కసరత్తు ప్రారంభం కావడానికి చాలా ముందుగానే, కొత్త ప్రభుత్వం కోసం 100 రోజుల ఎజెండాను సిద్ధం చేయడానికి వివిధ ప్రభుత్వ మంత్రిత్వ శాఖల కోసం మోదీ కసరత్తును ప్రారంభించారు. మొదటి 100 రోజుల కార్యక్రమాలు, కార్యక్రమాలకు ప్రాధాన్యత ఇవ్వాలని ఆయన తన మంత్రి మండలిని కోరారు.
Next Story
