నేషనల్ హెరాల్డ్ కేసులో రాహుల్, సోనియాపై తాజాగా మరో FIR

నేషనల్ హెరాల్డ్ మనీలాండరింగ్ కేసు(National Herald case)కు సంబంధించి కాంగ్రెస్(Congress) సీనియర్ నాయకులు రాహుల్ గాంధీ(Rahul), సోనియా గాంధీ(Sonia Gandhi)తో పాటు మరికొందరిపై ఢిల్లీ ఈవోడబ్ల్యూ కొత్త ఎఫ్‌ఐఆర్‌ నమోదు చేసింది. ఐపీసీ సెక్షన్లు 120బి (నేరపూరిత కుట్ర), 403 (ఆస్తి దుర్వినియోగం), 406 (విశ్వాస ద్రోహానికి శిక్ష) 420 (మోసం) కింద అభియోగాలు మోపారు. సోనియా, రాహుల్‌తో పాటు మోతీలాల్‌ వోరా, ఆస్కార్‌ ఫెర్నాండెజ్, సుమన్‌ దూబే, శ్యామ్‌ పిట్రోడా, అలాగే యంగ్‌ ఇండియా సంస్థ కూడా కుట్ర, మనీలాండరింగ్‌కు పాల్పడినట్టు ఈడీ ఆరోపిస్తోంది. వీరంతా కేవలం రూ.50 లక్షలు మాత్రమే చెల్లించి.. అసోసియేటెడ్‌ జర్నల్స్‌ లిమిటెడ్‌ (AJL)కు చెందిన రూ.2వేల కోట్ల విలువైన ఆసులపై అధికారాన్ని పొందారని ఆరోపించింది. కొనగోలుదారుల్లో మోతీలాల్‌ వోరా 2020లో మృతిచెందగా.. ఆస్కార్‌ ఫెర్నాండెజ్‌ 2021లో మృతిచెందారు.

నేషనల్‌ హెరాల్డ్‌ పత్రికను ప్రచురిస్తున్న అసోసియేటెడ్‌ జర్నలిస్ట్స్‌ లిమిటెడ్‌ (ఏజేఎల్‌)కు కాంగ్రెస్‌ పార్టీ రూ.90 కోట్ల రుణం అందించి దాని ఆస్తుల్ని ఆధీనంలోకి తీసుకోగా.. రాహుల్‌, సోనియాకు మెజార్టీ వాటా ఉన్న యంగ్‌ ఇండియా రూ.50 లక్షలు మాత్రమే కాంగ్రెస్‌ పార్టీకి చెల్లించి ఏజేఎల్‌ను సొంతం చేసుకొన్నట్లు అభియోగపత్రంలో ఈడీ పేర్కొంది.

13 ఏళ్ల క్రితం కేసు..

నేషనల్ హెరాల్డ్ కేసు 2012 నాటిది. జవహర్‌లాల్ నెహ్రూ, ఇతర స్వాతంత్ర్య సమరయోధులు 1938లో నేషనల్ హెరాల్డ్ వార్తాపత్రికకు స్థాపించారు. దీని ప్రచురణకర్త AJL. అసోసియేటెడ్ జర్నల్స్ లిమిటెడ్ కొనుగోలులో సీనియర్ కాంగ్రెస్ నాయకులు మోసానికి పాల్పడ్డారని బీజేపీ నాయకుడు సుబ్రమణియన్ స్వామి జూన్ 26, 2014న స్థానిక కోర్టులో పిటీషన్ వేశారు.

ఆర్థిక ఇబ్బందుల కారణంగా 2008లో నేషనల్ హెరాల్డ్ ప్రచురణ ఆగిపోయింది. AJL రూ.90 కోట్ల అప్పును భరించలేకపోయింది. కంపెనీ కోలుకోవడానికి, కాంగ్రెస్ పార్టీ దశాబ్దం పాటు మొత్తం ₹90 కోట్ల రుణాలను పొడిగించింది, దాదాపు 100 వాయిదాలలో పంపిణీ చేయబడింది.