"అమ్మా, నన్నెందుకు కన్నావ్, ఎందుకు ఏట్లో విసిరేశావ్?"

రాత్రి 9.30 దాటింది. విజయవాడ.. సింగ్ నగర్ లోని న్యూరాజరాజేశ్వరి పేట.. కాలువ ఒడ్డున ఓ చిన్నారి అరుపు వినిపించింది. అదో చిన్నారి ఏడుపు. మూడు నెలల పసికందు… పుట్టుకతోనే జీవన పోరాటం మొదలైంది. తల్లిదండ్రుల ఆప్యాయతలో ఉండాల్సిన వయసులో ఆ తల్లి ఎవరో ఈ బిడ్డను బుడమేరులో పాల్జేసింది.

స్థానిక న్యూరాజరాజేశ్వరి పేటలో కాలువ తీరాన ఆ చిన్న శరీరం తడిసిముద్దయి వణికిపోతోంది. కానీ ఆ పాప ఏడుపు ఆ ప్రాంత మౌనాన్ని ఛేదించింది. ఆ అరుపే ఆమెకు ప్రాణాధారం అయింది. గేదెలకు మేత వేసేందుకు వెళ్లిన బేతాళం నాగరాజు ఆ శబ్దం విని వెనక్కి తిరిగాడు. ఆ చీకటిలో, సెల్ ఫోన్ వెలుగులో ఆ పాపను కనిపెట్టాడు. మట్టికర్రల్లో చిక్కుకున్న ఆ శిశువును తన చేతుల్లోకి ఎత్తుకున్నాడు. చుట్టుపక్కల వాళ్లని పిలిచి విషయం చెప్పాడు.

పాప జీవించడమే ఒక అద్భుతం అని భావించారు. కన్నుల ముందే "తల్లి ఒడిలో ఉండాల్సిన పాప.. కాలువలో పడిపోవడం" అందరి మనసులను కలిచివేసింది. ఒక్క క్షణం ఎవరూ మాటాడలేకపోయారు.

తర్వాత పోలీసులకు సమాచారం ఇచ్చారు. అజిత్‌సింగ్‌నగర్ సీఐ వెంకటేశ్వర్లు అక్కడికి చేరుకుని, పాపను ప్రభుత్వ ఆసుపత్రికి తరలించారు. "చైల్డ్ వెల్ఫేర్ అధికారులకు సమాచారం ఇచ్చాం. సీసీ కెమెరాలను పరిశీలించి బాధ్యుల వివరాలు తెలుసుకుంటాం" అని ఆయన వివరించారు.

ఈ ఘటన మనసుల్లో ఒక పెద్ద ప్రశ్నను మిగిల్చింది — తల్లిగా పుట్టి, ఓ పసిపాపను ఎలా కాలువలో పడేస్తారు?

ఆ పాప కళ్ళల్లో మాటలుగా వినిపించేది ఒక్కటే.. "అమ్మా, నన్నెందుకు చంపాలనుకున్నావ్?"

అది కేవలం ఒక చిన్నారి కథ కాదు. ఇది సమాజాన్ని కలవరపరిచే పిలుపు.