పేగు బంధానికి ఖరీదు: అమ్మాయి రూ.3 లక్షలు, అబ్బాయికి రూ.5 లక్షలు

విజయవాడ, విశాఖపట్నం, సికింద్రాబాద్ కేంద్రాలుగా నడిపిన ఐవీఎఫ్ దందా మరువక ముందే విజయవాడలో శిశు విక్రయాల ఉదంతం బయటపడింది. పేదరికాన్ని ఆసరా చేసుకుని ఓ నేరస్తుల ముఠా పేగు బంధాన్ని వ్యాపారం చేసింది. అభం శుభం తెలియని పసిపిల్లలతో వ్యాపారం నడుపుతున్నట్టు పోలీసులు కనిపెట్టారు. ఐదుగురు పిల్లల్ని స్వాధీనం చేసుకుని ప్రభుత్వ సంరక్షణా కేంద్రానికి పంపడం కలకలం రేపింది. ఈ వ్యవస్థీకృత నేరం వెనుక ఉన్న లోతైన కోణాలను విశ్లేషిస్తే విస్తుపోయే నిజాలు బయటపడుతున్నాయి.

విజయవాడలోని భవానీపురం, నున్న, కొత్తపేట స్టేషన్లలో వీరిపై మూడు వేర్వేరు కేసులు నమోదయ్యాయి. విజయవాడ నుంచి పారిపోయిన ఢిల్లీకి చెందిన కిరణ్‌శర్మ, భారతిలను పట్టుకునేందుకు ప్రత్యేక బృందం ఢిల్లీకి వెళ్లింది. ఒకట్రెండు రోజుల్లో వీరిని అదుపులోకి తీసుకునే అవకాశం ఉంది.

ఈ కేసు వివరాలను నగర పోలీసు కమిషనర్‌ రాజశేఖర్‌బాబు గురువారం మీడియాకు వెల్లడించారు.

విజయవాడ నగరానికి చెందిన బలగం సరోజిని.. శిశు విక్రయాలు, సరోగసీ కేసుల్లో అరెస్టై నెల క్రితమే జైలు నుంచి బయటకొచ్చింది. ఆమె తిరిగి పిల్లలను విక్రయించడం ప్రారంభించింది. పిల్లలను ఇక్కడికి తెప్పించి, ఒక్కొక్కరిని రూ.3-5 లక్షల వరకు అమ్ముతోంది. ఇందుకోసం ఓ ముఠాను ఏర్పాటు చేసుకుంది. ఈ సమాచారం అందుకున్న పోలీసులు బుధవారం ఉదయం నుంచి విజయవాడ, పల్నాడు జిల్లా సత్తెనపల్లిలో దాడులుచేసి 10 మందిని అరెస్టు చేశారని సీపీ వివరించారు.

సాధారణంగా ఇలాంటి ముఠాలు ఒక వ్యవస్థీకృత నెట్‌వర్క్‌లా పనిచేస్తాయి. ఈ కేసులో బలగం సరోజిని లాంటి పాత నేరస్థులు ప్రధాన సూత్రధారులుగా వ్యవహరిస్తారు. ఢిల్లీ, ముంబై వంటి మహానగరాల్లో పేదరికం లేదా ఇతర కారణాల వల్ల పిల్లలను వదిలించుకోవాలనుకునే వారిని, లేదా కిడ్నాప్ చేసిన వారిని కిరణ్ శర్మ, భారతి వంటి ఏజెంట్లు సంప్రదిస్తారు. అక్కడి నుంచి రైళ్ల ద్వారా లేదా ప్రైవేట్ వాహనాల్లో పోలీసుల కంటపడకుండా శిశువులను విజయవాడకు తరలిస్తారు.

స్థానికంగా ఉండే ముఠా సభ్యులు పిల్లలను సురక్షితంగా దాచడానికి షెల్టర్ హోమ్స్ లేదా రహస్య ప్రాంతాలను ఉపయోగిస్తారు. సంతానం లేని దంపతులు, ముఖ్యంగా చట్టపరమైన దత్తత ప్రక్రియలో ఉన్న జాప్యాన్ని భరించలేని వారిని ఈ ముఠా టార్గెట్ చేసుకుంటుంది. శిశువు వయసు, రంగు, ఆరోగ్య పరిస్థితిని బట్టి రూ. 3 లక్షల నుండి రూ. 5 లక్షల వరకు బేరమాడతారు.

నకిలీ పత్రాల సృష్టిస్తారు. విక్రయించిన పిల్లలు తమ సొంత పిల్లలే అని నమ్మించడానికి ముఠా సభ్యులు హాస్పిటల్ నుంచి బర్త్ సర్టిఫికేట్లను కూడా ఫోర్జరీ చేసే ప్రమాదం ఉంది.

సరోగసీ ముసుగు

ప్రధాన నిందితురాలు సరోజిని గతంలో సరోగసీ కేసుల్లో కూడా నిందితురాలు కావడంతో, సంతాన సాఫల్య కేంద్రాల (Fertility Centers) చుట్టూ తిరిగే మధ్యవర్తులతో వీరికి సంబంధాలు ఉండే అవకాశం ఉంది. వీరు ఎక్కువగా నగదు రూపంలోనే లావాదేవీలు జరుపుతారు, తద్వారా పోలీసులకు ఎటువంటి ఆధారాలు దొరక్కుండా జాగ్రత్త పడతారు.

ఈ ముఠాకు సూత్రధారి బలగం సరోజిని. సరోజిని పాత నేరస్థురాలు. గతంలోనే సరోగసీ అక్రమాలు, శిశు విక్రయాల కేసుల్లో అరెస్ట్ అయ్యి, కేవలం నెల రోజుల క్రితమే జైలు నుంచి బయటకు వచ్చింది. కానీ, ఆమెలో మార్పు రాలేదు. జైలు నుంచి రాగానే పాత పరిచయాలను వాడుకుని మళ్ళీ అదే దందాను మొదలుపెట్టింది. ఈసారి తన నెట్‌వర్క్‌ను ఢిల్లీ, ముంబై మహానగరాల వరకు విస్తరించింది.

ఈ ముఠా అత్యంత ప్రణాళికాబద్ధంగా పనిచేస్తుంది. ఢిల్లీకి చెందిన కిరణ్ శర్మ, భారతి వంటి ఏజెంట్ల ద్వారా ఢిల్లీ, ముంబై, యూపీ ప్రాంతాల నుంచి శిశువులను సేకరిస్తారు. ఆడపిల్ల అయితే రూ.3 లక్షలు, మగపిల్లవాడు అయితే రూ.5 లక్షల వరకు బేరమాడుతారు.

పోలీసుల మెరుపు దాడి..

నగర పోలీస్ కమిషనర్ రాజశేఖర్ బాబు నేతృత్వంలో టాస్క్ ఫోర్స్ పోలీసులు చాకచక్యంగా వ్యవహరించారు. బుధవారం ఉదయం నుంచి విజయవాడలోని భవానీపురం, కొత్తపేట, పల్నాడు జిల్లా సత్తెనపల్లిలో ఏకకాలంలో దాడులు నిర్వహించారు. సరోజినితో పాటు గరికముక్కు విజయలక్ష్మి, వాడపల్లి బ్లేస్సీ వంటి ప్రధాన ఏజెంట్లను అదుపులోకి తీసుకున్నారు. నిందితుల నుంచి సుమారు రూ. 3.3 లక్షల నగదును స్వాధీనం చేసుకున్నారు.

పసిగుడ్డు పాలనవ్వు కూడా వారికి పరమాన్నంలా కనిపించలేదు. పేగు బంధం లేని ఆ నేరస్థులకు పసిపాపలు కేవలం కొన్ని లక్షల రూపాయల 'సరుకు' మాత్రమే. ఢిల్లీ, ముంబై వీధుల్లో నుంచి విజయవాడ సందుల వరకు విస్తరించిన ఒక భారీ శిశు విక్రయాల ముఠాను నగర పోలీసులు ఛేదించిన తీరు వెనుక అనేక హృదయవిదారక నిజాలు ఉన్నాయి.