ఆశా నిరాశల మధ్య.. బొలిశెట్టి సత్యనారాయణ

జనసేన సీనియర్ నేత బొలిశెట్టి సత్యనారాయణ ఈ మార్గాన్నే ఎన్నుకున్నారు. తనకు టికెట్ లభించలేదన్న బాధను ఆయన సోషల్ మీడియా వేదికగా వెలిబుచ్చుకుంటున్నారు. కానీ ఈ పోస్ట్‌లో ఆయన వ్యాఖ్యలు ఆశ నిరాశకు మధ్య ఉన్నాయి. పార్టీ కోసం తాను పడిన కష్టానికి గుర్తింపు దక్కలేదని ఓవైపు నిరాశ వ్యక్తం చేస్తూనే మరోవైపు అందరికీ న్యాయం జరుగుతుందని ఆశా దృక్పథం కనబరుస్తున్నారు.

దశాబ్ద కాలంలో పార్టీ కోసం ఎంతో కష్టపడ్డానని గుర్తు చేశారు బొలిశెట్టి. సంపాదన, కుటుంబాన్ని కాదని పార్టీ సిద్ధాంతాలు, బలోపేతం కోసం అహర్నిశలు తాను పడిన కష్టాన్ని కూడా గుర్తించలేదని సోషల్ మీడియా పోస్ట్‌లో వ్యాఖ్యానించారు. దశాబ్ద కాలం పాటు పార్టీ కోసం సమయం, ధనం వెచ్చించినా ఎన్నికల్లో పోటీ చేసే అవకాశం దక్కలేదని, ఆఖరికి ఈ విషయంపై తనను పిలిచి కూడా పార్టీ పెద్దలు మాట్లాడలేదని ఆవేదన వ్యక్తం చేశారు. అయినా ఎన్నికలు దగ్గర పడుతున్నప్పుడు సంయమనం కావాలని తెలిపారు.

‘‘మన ప్రభుత్వం వస్తుంది. అందరికీ న్యాయం జరుగుతుంది. కష్టపడిన ప్రతి ఒక్కరికీ న్యాయం చేస్తుంది. ప్రతి ఒక్కరి కష్టానికి గుర్తింపు లభిస్తుంది’’అని ఆయన ఓవైపు నిరాశ మరోవైపు ఆశావహ దృక్పథంతో ఆయన పెట్టి పోస్ట్ ప్రస్తుతం చర్చనీయాంశంగా మారింది. ఆయన పెట్టిన పోస్ట్‌పై స్పందిస్తున్న జనసైనికులు బొలిశెట్టిని ఓదారుస్తున్నట్లు కామెంట్లు చేస్తున్నారు. పార్టీ అంటే కొన్ని త్యాగాలు చేయాల్సి ఉంటుందని, వాటికి సమయం వచ్చినప్పుడు ప్రతి ఫలం దక్కుతుందని కొందరంటే పార్టీ బలోపేతమే పరమావధిగా పనిచేసిన బొలిశెట్టి వంటి నాయకునికి టికెట్ ఇవ్వకపోవడం దారుణమని మరికొందరు తమ అభిప్రాయం వ్యక్తం చేస్తున్నారు.