గ్రూప్‌1తో జగన్‌ రాజకీయం

ఏపీపీఎస్సీ గత సంవత్సరం సెప్టెంబర్‌లో గ్రూప్‌1 సిలబస్, పరీక్ష విధానంలో మార్పులు తీసుకొస్తున్నామంటూ అభ్యరులు, విద్యావంతులు, మేధావుల నుండి అభిప్రాయాలు స్వీకరించి కొత్త పరీక్ష విధానం సిలబస్‌ కూడా ప్రకటించారు. అయితే దానికి అనుగుణంగా ప్రస్తుతం గ్రూప్‌1 నోటిఫికేషన్‌ ఇవ్వకుండా పాత పద్ధతిలోనే నిర్వహిస్తామని చెప్పి అభ్యర్థులను మానసిక ఒత్తిడికి అయోమయానికి గురి చేసి నిరుద్యోగులను నిలువునా మోసం చేస్తున్నారని నిరుద్యోగులు వాపోతున్నారు. ఏపీపీఎస్సీ క్రమబద్ధంగా నోటిఫికేషన్‌లు జారీ చేయలేదు. కనీసం నోటిఫికేషన్‌ ఇచ్చినప్పుడు సిలబస్‌కు తగినట్లు సమయం ఇవ్వడం లేదు. ఏళ్ల తరబడి నోటిఫికేషన్‌ల కోసం ఎదురు చూస్తూ కోచింగ్‌లు తీసుకుంటున్న వారి పరిస్థితి దారుణంగా ఉంది. ప్రస్తుత గ్రూప్‌1కు మరో మూడు నెలలు గడువు ఇవ్వాలని నిరుద్యోగులు కోరుతున్నారు. 2023 డిసెంబరు 8న ఏపీపీఎస్సీ గ్రూప్‌1 నోటిఫికేషన్‌ జారీ చేసింది. జనవరి 28వరకు దరఖాస్తుకు అవకాశం కల్పించింది. మార్చి 17న ప్రిలిమినరీ పరీక్ష నిర్వహించాలని నోటిఫికేషన్‌లో పేర్కొన్నారు. నోటిఫికేషన్‌ ఇచ్చిన తరువాత కనీసం 45 రోజులు సమయం ఇవ్వాల్సి ఉండగా అటువంటి నిబంధనలేవీ పాటించకుండా నిరుద్యోగులతో ఆటలాడుకోవడం ఏమిటని నిరుద్యోగులు వాపోతున్నారు.

గ్రూప్‌1 పరీక్ష విధానం కొత్తపద్ధతిలో నిర్వహిస్తామని చెప్పిన ప్రభుత్వం పాతపద్దతినే కొనసాగించి పేద గ్రామీణ నిరుద్యోగులకు అన్యాయం చేస్తోంది. పరీక్ష గడువును మరో మూడు నెలలు పొడిగించాలి. ఏపీపీఎస్‌సీ పరీక్షల్లో రాజకీయ రంగు లేకుండా చూడాలి.