సీఎం క్యాంపు ఆఫీస్ లోకి కంటైనర్ ఎందుకొచ్చిందో తెలుసా?

సీఎం జగన్ బుధవారం నుంచి ఇడుపులపాయ వేదికగా ఎన్నికల ప్రచారాన్ని ప్రారంభిస్తున్నారు. జగన్ మొదటి దఫా ప్రచారాన్ని 21 రోజులు వరుసగా నిర్వహించనున్నారు. రూట్ మ్యాప్ ప్రకారం ప్రచారం సాగుతంది. ప్రచారం సందర్బంగా ఉదయం టిఫిన్, మధ్యాహ్నం, రాత్రికి భోజనం తయారు చేసేందుకు ఒక ప్యాంట్రీ వాహనాన్ని వైఎస్సార్ కాంగ్రెస్ పార్టీ వారు అద్దెకు తీసుకున్నారు. ఆ వాహనంలోనే జగన్ కు కావాల్సిన ఆహారాన్ని తయారు చేస్తారు. వంట మనుషులు కూడా అందులోనే ఉంటారు. రూట్ మ్యాప్ ప్రకారం మధ్యాహ్నం భోజనానికి ఎక్కడ ఆగుతారో ఆ వాహనం ముందుగా అక్కడికి చేరుకుని వంట సామగ్రి దించి వంట చేస్తారు. తరువాత మరలా వాహనంలోకి సామగ్రి సర్థుకుని వేరే చోటుకు వెళతారు.

క్యాంపు ఆఫీసులో వాహనంలోకి ఏమి ఎత్తారు..

మంగళవారం మధ్యాహ్నం వాహనం సీఎం జగన్ క్యాంపు కార్యాలయం లోపలికి వచ్చింది. ముందుగా పోలీసుల నుంచి అనుమతి తీసుకున్నారు. ఆ వాహనం నెంబరును సీఎం ఆఫీసుకు పార్టీ వారు తెలిపారు. అందుకే ఆ వాహనం పోతుండగానే వాహనాన్ని క్యాంపు ఆఫీసులో వంట సామగ్రి ఉండే వైపుగా తిప్పి పెట్టి వంట పాత్రలు అందులోకి ఎక్కించారు. సామాన్లు కంటైనర్ లోపలికి చేర్చడానికి సుమారు గంట పట్టింది. అక్కడి నుంచి వాహనం సామాన్లు తీసుకుని ఆళ్ళగడ్డకు బయలుదేరి వెళ్లింది. ప్రస్తుతం ఆళ్లగడ్డ వద్ద వాహనం ఉందని ఎవరైనా వచ్చి చూసుకోవచ్చని వైఎస్సార్సీపీ వారు చెబుతున్నారు.

పాదయాత్రలోనూ ఇలాంటి వాహనమే వాడారు..

వైఎస్ జగన్ పాదయాత్ర సందర్భంగా ఇటువంటి వాహనాన్నే పాంట్రీకి వాడారు. వంట సామాన్లు ఉంచేందుకు కంటైనర్ లాంటి వాహనం అయితే బయటకు కనిపించకుండా ఉంటాయనే ఆలోచనతో ఈ వాహనం ఉపయోగిస్తుంటారు. అయితే మంగళవారం వాహనం మధ్యాహ్నం సమయంలోనే అందరూ చూస్తుండగానే లోపలికి వెళ్లి బయటకు వచ్చిందని, వాహనంలో డబ్బే తరలిస్తే ఇంత బహిరంగంగా ఎందుకు చేస్తారని పలువురు వైఎస్సార్సీపీ నాయకులు ప్రశ్నిస్తున్నారు. విమర్శలకు కూడా ఒక అర్థం ఉండాలని అనటం విశేషం.