నీటి నుంచి నింగిలోకి.. పర్యాటకులకు కొత్త అనుభూతి
రాష్ట్ర పర్యాటక రంగంలో కొత్త అధ్యాయం ప్రారంభం కానుంది. ఇంకొన్ని గంటల్లో ఓ విమానం కృష్ణా బ్యారేజీ నీటిలో ఎగిరి నుంచి శ్రీశైలం డ్యాంలో దిగనుంది.
పర్యాటకంలో కొత్త అనుభవం ప్రకృతి ప్రేమికులు, పర్యాటకులకు పరిచయం కానుంది. నీటిలో తేలియాడి, ఆకాశమార్గాన విహరించి, మళ్లీ నీటిలో దిగే విమాన ప్రయాణం కొన్ని గంటల్లో ప్రారంభం అవుతుంది. ఈ కార్యక్రమాన్ని సీఎం చంద్రబాబు లాంఛనంగా ప్రారంభించనున్నారు. పర్యాటలకు ఆత్మస్థైర్యం నింపడానికి స్వయంగా ఆయనే సీ ప్లేన్ (Sea Plane)లో ప్రయాణించనున్నారు. తద్వారా పర్యాటకరంగాన్ని కొత్తపుంతలు తొక్కించడానికి అన్ని ఏర్పాట్లు పూర్తయ్యాయి.
నీటి నుంచి గగనతలానికి ఎగిరే సీప్లేన్ విజయవాడ కృష్ణా బ్యారేజీ నుంచి ప్రారంభం అవుతుంది. అక్కడ పున్నమి ఘాట్ నుంచి బయలు దేరే సీప్లేన్ శ్రీశైలం డ్యాం వద్ద ఉన్న పాతాళగంగ వద్ద నీటిలోనే మళ్లీ ల్యాండ్ అవుతుంది. ఆకాశమార్గాన తక్కువ ఎత్తులో విహరించే ఈ సీప్లేన్ నుంచి నల్లమల అడవుల అందాలను ఆస్వాదించవచ్చు. నాగార్జునసాగర్ పరీవాహ ప్రాంతాన్ని చూస్తే శ్రీశైలం జలాశయంలో దిగే ఈ విమానం నుంచి శ్రీశైలం మల్లికార్జునస్వామి ఆలయాన్ని గగనతలం నుంచి చూసే అవకాశం లభిస్తుంది. నీటి నుంచి నింగిలోకి ఎగిరే ఈ విమానం ద్వారా పర్యాటకులకు కొత్త అనుభవం, అనుభూతిని కల్పించే దిశగా కేంద్ర విమానయాన శాఖ, రాష్ట్ర ప్రభుత్వం ఏర్పాట్లు చేసింది.
విజయవంతంగా ట్రయల్ రన్
ఈ సీప్లేన్ శుక్రవారం ట్రయల్ రన్ విజయవంతంగా నిర్వహించింది. కాగా, ఈ సీప్లేన్ ను సీఎం ఎన్. చంద్రబాబు శుక్రవారం మధ్యాహ్నం విజయవాడ కృష్ణా బ్యారేజీ వద్ద ఉన్న పున్నమి ఘాట్ సమీపంలోని నీటిపై నుంచి 12 గంటలకు టేకాఫ్ తీసుకుంటుంది. దీనికోసం ప్రత్యేక ఏర్పాట్లు చేశారు. దేశం దృష్టిని ఆకర్షించే విధంగా సన్నాహక కార్యక్రమాలు కూడి సిద్ధం చేశారు. ఈ పాటికే వివిధ శాఖల అధికారులు విజయవాడ పున్నమి ఘాట్ వద్ద ఏర్పాట్లు చేశారు. కాగా,
ప్రకాశం బ్యారేజీ సమీపంలోని పున్నమి ఘాట్ వద్ద ఏర్పాటు చేసిన టేకాఫ్ పాయింట్ వద్ద భూమిపై నుంచి సీప్లేన్ లోకి ఎక్కడానికి ప్రత్యేకంగా జెట్టీలు కూడా ఏర్పాటు చేశారు. అలాగే శ్రీశైలం డ్యాం వద్ద పాతాళగంగ వద్ద కూడా అదే సదుపాయం కల్పించారు. సీఎం చంద్రబాబు, ఇంతకొంత మంది అధికారులు, మంత్రులతో బయలుదేరే ఈ సీప్లేన్ శ్రీశైలం జలాశయంలో 12.45 నిమిషాలకు లాండ్ అవుతుంది. అంటే విజయవాడ నుంచి శ్రీశైలానికి ప్రయాణించే ఐదు గంటల పట్టే సమయం ఈ సీప్లేన్ వల్ల 45 నిమిషాల్లో చేరుకోవచ్చు. సీప్లేన్ లో వచ్చే సీఎం చంద్రబాబు, అధికారులు భ్రమరాంబ సమేత మల్లికార్జున స్వామిని దర్శించుకుని తిరిగి, మధ్యాహ్నం 2.20 గంటలకు బయలుదేరి 3.10 గంటలకు విజయవాడ ప్రకాశం బ్యారేజీ వద్దకు చేరుకునే విధంగా సీప్లేన్ షెడ్యూలు ఖరారు చేశారు.
కేంద్ర పౌరవిమానయాన శాఖ, రాష్ట్ర ప్రభుత్వం సంయుక్తంగా ఈ ప్రాజెక్టుకు శ్రీకారం చుట్టింది. శుక్రవారం ఈ సీప్లేన్ ట్రయల్ రన్ దిగ్విజయంగా నిర్వహించింది. కాగా, దేశంలో ఇది రెండో ప్రయోగం.
2020 అక్టోబర్ 31 వతేదీ మొదట గుజరాత్ ప్రభుత్వం ప్రారంభించింది. సబర్మతి నది నుంచి సర్దార్ పటేల్ ఐక్యతా విగ్రహం (Statue of Unity) వరకు ఈ సీప్లేన్ దేశంలోనే మొదటిసారి ప్రారంభించింది. ఆ తరువాత ఆ ప్రాజెక్టు చతికిలబడింది. కాగా,
పర్యాటకరంగాన్ని మరింతగా అభివృద్ధి చేయాలనే లక్ష్యం. కేంద్రంలో టీడీపీ ఎంపీ కింజరాపు రామ్మోహన్ నాయుడు పౌర విమానయాన శాఖ మంత్రి కావడంతో ఈ కార్యక్రమం అనుకున్నదే తడువుగా నెలల వ్యవధిలోనే ఆచరణలోకి తీసుకుని రావడానికి చర్యలు తీసుకున్నారు. ఈ ప్రాజెక్టు విజయవంతం చేయడం ద్వారా రాష్ట్రంలో ఇంకొన్ని ప్రాంతాలకు కూడా విస్తరించడానికి అనువైన ఆలోచనలు చేస్తున్నారు. పర్యాటకుల నుంచి వచ్చే ఆదరణ ద్వారా సేవలు విస్తృతం చేసే అవకాశం ఉన్నట్లు అధికారవర్గాల ద్వారా తెలిసింది.
సీప్లేన్ ప్రత్యేకత ఏమిటి?
ఈ సీప్లేన్ లో 14 లేదా 19 మంది మాత్రమే ప్రయాణించడానికి వీలు ఉంటుంది. విమానాలు ఆకాశంలో 15 వేల నుంచి 20 వేల అడుగుల ఎత్తులో ప్రయాణిస్తాయి. ఈ సీప్లేన్ మాత్రం విజయవాడ నుంచి శ్రీశైలం వరకు 150 కిలోమీటర్ల దూరం 1,500 అడుగుల ఎత్తు నుంచి విహరిస్తుందని విమానయాన శాఖ అధికారులు చెబుతున్నారు. పర్యాటలకు కొత్త అనుభవం, అనుభూతి కలిగించాలనే లక్ష్యంగా రూపకల్పన చేశారు.
విధివిధానాలు తరువాతే....
ఈ సీప్లేన్ ట్రయల్ రన్ మాత్రమే అని పేరు వెల్లడించడానికి ఇష్టపడని విమానయాన శాఖాధికారులు "ఫెడరల్ ఆంధ్రప్రదేశ్" ప్రతినిధికి చెప్పారు. దీనికి సంబంధించి డీపీఆర్ (Detail Project Report) సిద్ధం చేయలేదనేది ఆయన చెప్పిన మాట, సీప్లేన్ ఎక్కడి నుంచి తీసుకుని వస్తారు. అందులో ఎందరు ప్రయాణించడానికి అనుమతి ఉంటుంది? టికెట్ ఎంత నిర్ణయించాలి? అనేది ఇంకా ఖరారు కాలేదని అంటున్నారు. గుజరాత్ మోడల్ ఆ ప్రభుత్వానికి తడిసి మోపడైంది. అందువల్ల ప్రభుత్వ రంగంలో నడపాలా? ప్రైవేటు భాగస్వామ్యం చేయాల అనేది కూడా నిర్ధారించలేదని తెలిసింది. ప్రధానంగా..
నీటిలో ఎలా?
సీప్లేన్ టేకాఫ్, ల్యాండింగ్ అంతా నీటిలోనే జరుగుతుంది. దీనికి సంబంధించి ఓషనోగ్రఫీ, నీటిపారుదల రంగాలకు సంబంధించిన నిపుణులు, కృష్ణా బ్యారేజీ, శ్రీశైలం వరదనీటి ఉధృతి, ప్రవాహంపై కూడా అధ్యయనం చేసి, సేచనలు చేయాల్సిన అవసరం ఉందని చెబుతున్నారు. టికెట్ ధర, విధివిధానాలు నిర్ణయించిన తరువాతే ఈ ప్రాజెక్టు ఆధారపడి ఉంటుందని ఆ అధికారి విష్లేషించారు. ఇదిలావుండగా...
ముందస్తు ఏర్పాట్లు
శ్రీశైలం ప్రాజెక్టు సమీపంలోని పాతాళగంగ వద్ద కృష్ణానది పరివాహక ప్రాంతం కలిసే చోట విజయవాడ నుంచి వచ్చే సీ ప్లేన్ నీటిలో టేకాఫ్ అవుతుంది. దీంతో కొన్ని రోజుల కిందటే విభజిత నంద్యాల జిల్లా యంత్రాంగం ఏర్పాట్లను పర్యవేక్షించింది. కొన్ని రోజుల కిందట తుపాను తాకిడి వల్ల కోతకు గురైన పాతాళగంగ వద్ద నుంచి ఎగువన కొండపైకి ఎక్కడానికి ఉన్న మెట్లు ధ్వంసం అయ్యాయి. అధికారుల ఆదేశాలతో శ్రీశైలం ఎమ్మెల్యే బుడ్డా రాజశేఖరరెడ్డి, నంద్యాల జిల్లా కలెక్టర్ రాజకుమారి, కర్నూలు జిల్లా పర్యాటక శాఖ డీవీఎం చంద్రమౌళిరెడ్డి, ఎస్పీ అధిరాజ్ రాజ్ సింగ్ సీప్లేన్ ట్రయల్ రన్ కోసం ఏర్పాట్లను పరిశీలించారు. ఆ ప్రాంతాల్లో అవసరమైన మరమ్మతులు చేయించారు. రోప్ వే ప్రదేశంలో కూడా ప్రత్యేక ఏర్పాట్లు చేశారు. విజయవాడ నుంచి సీప్లేన్ లో వచ్చే సీఎం ఎన్. చంద్రబాబు శ్రీశైలం మల్లికార్జునస్వామిని కూడా దర్శంచుకుని తిరిగి వెళతారని సమాచారం. దీంతో నంద్యాల జిల్లా అధికారులు శ్రీశైలంలో ఏర్పాట్లు చేశారు.
Next Story
