విద్యార్థులతో కలిసి.. భోజనం చేసి

ప్రచారం కోసం చేశారా? లేదా నిజంగా మధ్యాహ్నం భోజనం ఎలా ఉంది? ఎలాంటి భోజనాన్ని పిల్లలకు పెడుతున్నారు? తినే విధంగా వండుతున్నారా? వంటి అంశాలను పరిశీలించేందుకు తిన్నారా? లేక ప్రచారం స్టంట్‌ కోసం తిన్నారా? అనేది పక్కన పెడితే ఆంధ్రప్రదేశ్‌ ముఖ్యమంత్రి నారా చంద్రబాబు నాయుడు, ఆయన కుమారుడు విద్యా శాఖ మంత్రి నారా లోకేష్‌లు మాత్రం అందరి చూపులను ఆకర్షించారు. బాపట్ల మునిసిపల్‌ ప్రభుత్వ పాఠశాలల పిల్లలతో కలిసి భోజనం చేశారు. స్వయంగా ముఖ్యమంత్రి, విద్యా శాఖ మంత్రి పిల్లలతో కలిసి మధ్యాహ్న భోజనం చేస్తుంటే.. ఇక అధికారులు మాత్రం ఏం చేస్తారు. వారు కూడా తప్పకుండా తినాల్సిన పరిస్థితి వచ్చింది. జిల్లా కలెక్టర్‌తో పాటు ఇతర అధికారులు, ప్రజా ప్రతినిధులు కూడా పిల్లలతో కలిసి భోజనం చేశారు. మధ్యాహ్న భోజన పథకం కింద వడ్డించే భోజనం పిల్లలతో కలిసి తిన్నారు.