వాట్సాప్ గవర్నెన్స్ ఓ విప్లవం కాబోతోందా...

ఇన్నాళ్లూ సమస్యల పరిష్కారం కోసం ప్రజలు ప్రభుత్వ కార్యాలయాల చుట్టూ తిరుగుతున్నారు. సమస్యలను పరిష్కరించేందుకు ప్రభుత్వం స్మార్ట్ గవర్నెన్స్ లో భాగంగా వర్చువల్‌గా సేవలందించేందుకు సిద్ధంగా ఉందని డ్రోన్స్ కార్పొరేషన్ డైరెక్టర్ దినేష్ కుమార్ కలెక్టర్ ల సదస్సులో చెప్పారు. వాట్సాప్ ద్వారా ప్రజలకు సేవలందించేందుకు మెటాతో ఈ ఏడాది అక్టోబర్ 22న ఒప్పందం కుదుర్చుకున్నట్లు చెప్పారు. వాట్పాప్ ద్వారా ప్రజలకు ఏ విధంగా సేవలు అందించగలుగుతాం, మెటాతో ఏఐ ద్వారా ప్రజలకు ఏ స్కిల్లింగ్ ఇవ్వగలుగుతామన్నది చూడాల్సి ఉందన్నారు.

దేశంలో ప్రస్తుతం 59 కోట్ల మంది వాట్సాప్ వాడుతున్నారు. రోజూ ఒక్కొక్కరు సగటున 30 సార్లు వాట్సాప్‌ను సెల్ ఫోన్‌లో తెరుస్తున్నారు. ఎక్కువ మంది, ఎక్కువ సమయం వినియోగిస్తున్న తరుణంలో వాట్సాప్ ద్వారా విరివిగా సేవలందించవచ్చు. అత్యవసర సమయంలో ప్రజలను అప్రమత్తం చేయడం, మౌలిక వసతలు కల్పించే ప్రాంతంలో స్థానిక ప్రజలకు సమాచారం పంపడం, ఈ క్రాప్ లో నమోదైన రైతులు ఏ సమయంలో ఏ మందులు వాడాలనేదిపై కూడా సమాచారం అందించవచ్చు. పంట ఉత్పత్తులను విక్రయించేందుకు మార్కెటింగ్ కు సంబంధించి సమాచారాన్ని ముందే అందించడం ద్వారా రైతులను అప్రమత్తం చేయొచ్చు. వాట్సాప్ ద్వారానే సులభంగా పన్ను చెల్లింపులు కూడా చేయొచ్చు. వాట్సాప్ ద్వారా దేవదాయ, రెవెన్యూ, మున్సిపల్ శాఖలకు సంబంధించిన సేవలను పొందవచ్చు. ఫేజ్-1లో 100 నుండి 150 సేవలను అందుబాటులోకి ప్రభుత్వం తీసుకు రానుంది. ఆదాయ, ఫ్యామిలీ మెంబర్ సర్టిఫికేట్, క్యాస్ట్, స్టడీ సర్టిఫికేట్‌ లను వాట్సాప్ ద్వారా ప్రజలకు చేరవేయవచ్చు.

యూజర్లతో ఫ్రెండ్లీగా ఉండాలి. వాట్సాప్ ద్వారా సేవలందించే వ్యవస్థను దేశంలోనే మొదటిసారి తీసుకొస్తున్నాం. కొత్త టెక్నాలజీ అందుబాటులోకి వచ్చినప్పుడు సమస్యలు వస్తుంటాయి.. వాటిని పరిష్కరించుకుంటూ ముందుకెళ్లాలని కలెక్టర్ లకు ముఖ్యమంత్రి చంద్రబాబు నాయుడు సూచించారు.

ఎటువంటి రాజకీయ ప్రమేయం లేకుండా వాట్సాప్ ద్వారా అవసరమైన సర్టిఫికేట్లను పొందవచ్చు. ఈ ప్రక్రియలో ఏదైనా సమస్యలు ఎదురైతే క్షేత్రస్థాయి నుంచి కలెక్టర్లు ఫీడ్ బ్యాక్ ఇవ్వాలి. ప్రపంచంలో యూఏఈ దేశంలో తప్ప మరే దేశంలోనూ ఈ వాట్సాప్ గవర్నెన్స్ విధానం లేదు. యూఏఈ తర్వాత ఈ సేవలు తీసుకొస్తోంది ఒక్క మన రాష్ట్రమే. Ap.gov.in సైట్ లో సమాచారం ఉంచుతాం. గవర్నెన్స్ స్ట్రీమ్ లైన్ చేయాలన్నది సీఎం చంద్రబాబు అభిప్రాయం. వాట్సాప్ ద్వారా 153 సేవలు అందించేందుకు ఏపీ ప్రభుత్వం సిద్ధంగా ఉందని తెలియజేస్తున్నామని మానవ వనరుల శాఖ మంత్రి నారా లోకేష్ కలెక్టర్ ల సమావేశంలో చెప్పారు.

ఇవన్నీ బాగానే ఉన్నా సైబర్ నేరాలను అదుపు చేయడంలో ప్రభుత్వం సైతం ఒక్కోసారి చేతులత్తేస్తోంది. ఇందుకోసం ప్రత్యేక పోలీసు విభాగాలు ఏర్పాటు చేసినా సైబర్ నేరాలు ఆగటం లేదు. ఎక్కడో ఖండాల అవతల ఉన్న వ్యక్తులు బెదిరించి డబ్బులు గుంజుతున్నారు. అటువంటి నేరగాళ్లు చొరబడేందుకు వీలు లేని విధంగా వాట్సాప్ గవర్నెన్స్ ఉండాలని ప్రజలు కోరుకుంటున్నారు.