పోతిన మహేష్ తన రాజకీయ సమాధి తానే కట్టుకున్నాడు

జనసేనకు పోతిన మహేష్ రాజీనామా చేయటంతో పార్టీకి పట్టిన శని వదిలిపోయిందని జిల్లా జనసేన పార్టీ అధికార ప్రతినిధి ఆళ్ల హరి అన్నారు. ముఖ్యమంత్రి జగన్ రెడ్డి సమక్షంలో పోతిన మహేష్ వైసీపీ తీర్థం తీసుకోవటంపై ఆయన బుధవారం విలేకరులతో మాట్లాడారు. వైకాపా నేతల గుప్పిట్లోకి వెళ్లిన మహేష్.. వైసీపీ కోవర్టుగా మారాడని ఆరోపించారు. పవన్ కల్యాణ్ బొమ్మ పెట్టుకోకపోయినా, జనసేన జెండా పెట్టుకోకపోయినా మహేష్‌ను పక్కింటోడు కూడా పట్టించుకోరని విమర్శించారు. తనకు రాజకీయ భిక్ష పెట్టింది, తనకు గుర్తింపు తీసుకువచ్చింది పవన్ కల్యాణ్ అని మహేష్ అన్న మాటలను ఆయన గుర్తుచేశారు. ఉన్నత విలువలు, అత్యున్నతమైన సిద్ధాంతాలు కలిగిన జనసేన పార్టీని వదిలి రక్తంతో తడిసిన పార్టీలో చేరినప్పుడే మహేష్ రాజకీయ జీవితం సమాధి అయిందన్నారు. జనసేన జెండా కాకుండా వేరే పార్టీ జెండా పట్టుకుంటే తన చేతిని నరకమన్న మహేష్ ఇప్పుడు పునర్జన్మ పేరుతో తప్పించుకున్నారని ఎద్దేవా చేశారు.