నల్లమల.. చిరుతలు ఇలా వస్తే ఎలా?

దట్టమైన నల్లమల అడవుల్లో తిరగాల్సిన పులులు, చిరుతలు ఊళ్ల మీద పడుతున్నాయి. జనావాసాలను బెంబేలెత్తిస్తున్నాయి. వన్యప్రాణులు తరచూ గ్రామాల శివార్లలో కనిపించడంతో రైతులు, పశువుల కాపర్లు వణికిపోతున్నారు. పొలాల్లో పనులకు వెళ్లడానికీ, పశువుల్ని అడవిలో మేపుకు తీసుకువెళ్లడానికి జంకుతున్నారు.

కనిగిరి ఫారెస్ట్‌ రేంజ్‌ పరిధిలోని వెలిగొండ రిజర్వ్‌ ఫారెస్ట్‌లోని నాగిరెడ్డిపల్లి, వెదుళ్లచెరువు, గుడిపాటిపల్లి బీట్‌ల పరిధిలోని కొండ కింద శివారు గ్రామాల్లో చిరుత పులి సంచరిస్తోంది. వారం రోజుల క్రితం మరపగుంట్లలో పులి సంచరిస్తున్నట్లు ప్రచా­రం జరిగింది. ఫారెస్ట్‌ అధికారులు ఆ ప్రాంతాన్ని పరిశీలించారు. పాదముద్రలు సేకరించి 3, 4 ఇంచుల పొడవు ఉన్నట్లు తెలిపారు. పాద ముద్రలను బట్టి అది పెద్దపులి కాదని నిర్ధారించారు. పెద్దపులి పాద ముద్రలు 7, 8 ఇంచుల పొడవు ఉంటాయన్నారు.

గత శనివారం రాత్రి ఇమ్మడిచెరువు–రాళ్లపల్లి మధ్య పొలాల్లో బైక్‌పై వెళ్తున్న వ్యక్తి ఒక పులిని చూసినట్లు చెప్పాడు. వెంటనే అధికారులు ఆ ప్రాంతంలో ట్రాప్ కెమెరాలు ఏర్పాటు చేశారు. ఇప్పటికే తుంగోడు, పిల్లిపల్లి వంటి బీట్‌లలో ట్రాప్ కెమెరాల్లో చిరుత పులులు సంచరించినట్టు రికార్డు అయిందని అటవీశాఖ వెల్లడించింది.

యర్రగొండపాలెం రేంజి పరిధిలోని కొలుకుల బీట్‌లో పెద్దపులి కనబడటంతో రైతులు భయంలో వణికిపోతున్నారు. గత ఆదివారం వ్యవసాయ పనులకు వెళ్తున్న రైతులకు పెద్దపులి కనిపించింది. దీంతో పొలాలకు వెళ్తున్న రైతులతో పాటు రైతు కూలీలు సైతం భయాందోళనతో వణికిపోతున్నారు. కొలుకుల బీటులోని అటవీ ప్రాంతంలో పెద్దదోర్నాల మండల పరిదిలోని పెద్ద»ొమ్మలాపురం రైతులకు చెందిన వ్యవసాయ భూములు ఎక్కువగా ఉండటంతో తరచూ వన్యప్రాణులతో సమస్యలు ఎదురవుతున్నాయి.

గతంలో పాలుట్లలో తన పొలానికి వెళ్లి తిరిగి వస్తున్న రైతు బాలునాయక్‌పై పెద్దపులి దాడి చేసి గాయపర్చగా, బొమ్మలాపురానికి చెందిన ఓ రైతు ఎద్దును సైతం పులి హతమార్చింది. గ్రామానికి చెందిన దేవలూడు, గండి చెరువు ప్రాంతాల్లోనే ఎక్కువ వ్యవసాయ భూములు ఉండటంతో బొమ్మలాపురం వాసులు ఆందోళ­న చెందుతున్నారు.

అర్థవీడు మండలంలోని కొ­త్తూరు, దొనకొండ, వెలగలపాయ, బొల్లుపల్లి, అచ్చంపేట, మాగుటూరు, మోహిద్దీన్‌పురం గ్రామాల పరిధి­లో తరచూ పులి సంచరిస్తుండటంతో ప్రజలు భయాందోళనకు గురవుతున్నారు. వెలగలపాయ, దొనకొండ, మాగుటూరు సమీపంలోని అటవీ ప్రాంతాల్లో మేతకు వెళ్లిన పశువులపై పులి దాడి చేసి చంపేసిన ఘటనలు ఉన్నాయి. మొహిద్దీన్‌పురం వద్ద కారులో వెళ్తున్న కొందరికి పులి రోడ్డు దాటుతూ కనిపించిందని స్థానికులు చెబుతున్నారు.

యర్రగొండపాలెం రేంజ్‌లోని కొలుకుల బీట్‌లో పెద్దపులి కనిపించడంతో రైతులు మరింత భయాందోళనకు గురయ్యారు. దీంతో స్థానికులు “మేము రాత్రివేళ పొలాలకు వెళ్లడానికే భయపడుతున్నాం” అని చెబుతున్నారు.

అనూహ్యంగా పెరిగిన వన్యప్రాణులతో పాటు వర్షాభావం, ఆహార కొరత వంటి కారణాలతో పులులు, చిరుతలు గ్రామాల వైపు వస్తున్నాయి. అధికారుల పర్యవేక్షణ ఉన్నా, పులి ఎప్పుడు ఎదురుపడుతుందోనన్న భయంతో అటవీ సమీప గ్రామాల ప్రజలు బిక్కుబిక్కుమంటున్నారు.