జనసేన పార్టీ సభ్యత్వ నమోదు కార్యక్రమాన్ని మరో వారం రోజులు పొడిగించారు. ఈ మేరకు జనసేన రాజకీయ వ్యవహారాల కార్యదర్శి, పౌరసరఫరాల శాఖ మంత్రి నాదెండ్ల మనోహర్‌ తెలిపారు.
జనసేనలో సభ్యత్వం తీసుకునేందుకు మరో వారం గడువు పెంచుతున్నట్లు పార్టీ ప్రకటించింది. ఈ మేరకు సోమవారం జనసేన పార్టీ రాష్ట్ర కార్యాలయం నుంచి జనసేన పార్టీ ప్రధాన కార్యదర్శి నాగబాబు, పార్టీ రాజకీయ వ్యవహారాల కమిటీ చైర్మన్, రాష్ట్ర మంత్రి పౌరసరఫరాల శాఖ మంత్రి నాదెండ్ల మనోహర్‌ల నేతృత్వంలో ఆ పార్టీ శ్రేణులతో టెలీకాన్‌ఫెరెన్స్‌ నిర్వహించారు. ఆంధ్రప్రదేశ్‌లోని 175 అసెంబ్లీ నియోజక వర్గాల్లోను, తెలంగాణ రాష్ట్రంలోను చురుగ్గా పార్టీ సభ్యత్వ నమోదు చురుగ్గా జరుగుతోంది. గత 10 రోజులుగా సభ్యత్వ కార్యక్రమాన్ని జనసేన నాయకులు నిర్వహిస్తున్నారు. అయితే తీవ్ర వర్షాలు, కంప్యూటర్లలో సాంకేతిక సమస్యలు రావడం వల్ల సభ్యత్వ నమోదు కార్యక్రమాన్ని మరి కొని రోజులు పెంచాలని జనసేన పార్టీ అధ్యక్షులు, ఉప ముఖ్యమంత్రి పవన్‌ కళ్యాణ్‌కు జనసైనికులు, నాయకులు, వాలంటీర్లు, వీర మహిళల నుంచి అభ్యర్థనలు అందాయి. దీంతో మరో వారం గడువు పెంచుతూ పవన్‌ కళ్యాణ్‌ నిర్ణయం తీసుకున్నట్లు నాదెండ్ల మనోహర్‌ తెలిపారు. ఈ నెల 28తో సభ్యత్వం నమోదు గడువు ముగిసింది. అయితే ఆగస్టు 5వరకు గడువును పొడిగిస్తున్నట్లు వెల్లడించారు. గత సంవ్సరం పార్టీ సభ్యత్వ నమోదు మందగొండిగా సాగింది. కేవలం ఆరు లక్షల సభ్యత నమోదుతోనే ముగించారు. ప్రస్తుతం ఈ 10 రోజుల్లో ఇప్పటి వరకు 10లక్షల సభ్యత్వం నమోదైంది. మరో 10లక్షల సభ్యత్వ నమోదను టార్గెట్‌గా పెట్టుకున్నట్లు మనోహర్‌ చెప్పారు. ఈ సందర్భంగా జనసేన ఐటీ టీమ్‌ను నాదెండ్ల మనోహర్‌ అభినందించారు.
