Best Panchayat Awards | కొత్త ఆలోచనలకు రెక్కలు తొడిగిన జాతీయ అవార్డు

దేశంలోని 45 గ్రామపంచాయతీలు జాతీయ అవార్డులకు ఎంపిక అయిన విషయం తెలిసిందే. అందులో రాష్ట్రం నుంచి నాలుగు పంచాయతీలు ఆ జాబితాలో ఉన్నాయి. న్యూఢిల్లీలోని రాష్ట్రపతి భవన్ లో బుధవారం మధ్యాహ్నం ఉత్తమ గ్రామపంచాయతీలుగా ఎంపికైన సర్పంచులకు రాష్ట్రపతి ద్రౌపది ముర్ము ప్రశంసా పత్రాలతో పాటు, అవార్డును ప్రధానం చేశారు. అదే సమయంలో ఆ పంచాయతీల ఖాతాలకు కేంద్ర గ్రామీణ అభివృద్ధి శాఖ నుంచి కోటి రూపాయల నగదు రివార్డును జమ చేశారు. అవార్డుల ప్రధానం అనంతరం బటన్ నొక్కడం ద్వారా రాష్ట్రపతి ఆ నిధులను పంచాయతీలకు విడుదల చేశారు.

జాతీయ ఉత్తమ అవార్డుకు ఎంపికైన పంచాయతీల్లో రాష్ట్రంలోని కృష్ణాజిల్లా కూడా చోటు దక్కించుకుంది. ఈ జిల్లాలోని చందర్లపాడు మండలం ముప్పాళ్ళ పంచాయతీ సామాజిక పింఛన్ల పంపిణీలో మేటిగా నిలిచింది. ఈ పంచాయతీలో అందించిన సేవలను గుర్తించిన కేంద్ర గ్రామీణ అభివృద్ధి శాఖ చందర్లపాడు సర్పంచ్ కుసుమరాజు వీరమ్మ, అధికారులు కూడా ఢిల్లీకి ఆహ్వానించింది. ఢిల్లీలో రాష్ట్రపతి ముర్ము నుంచి ఆమె అవార్డుతో పాటు జ్ఞాపికను కూడా స్వీకరించారు. ఈ పంచాయతీ కార్యదర్శి తోపాటు కొందరు జిల్లా అధికారులు కూడా వెళ్లారు.