ఏపీ ఉప ముఖ్యమంత్రి పవన్‌ కళ్యాణ్‌ ఢిల్లీ పర్యటనలో బిజీ బిజీగా ఉన్నారు. కేంద్ర ప్రభుత్వ పెద్దలతో భేటీ అవుతున్నారు.
ప్రధాన మంత్రి నరేంద్ర మోదీని ఆంధ్రప్రదేశ్‌ ఉప ముఖ్యమంత్రి పవన్‌ కళ్యాణ్‌ బుధవారం పార్లమెంట్‌ భవనంలోని ప్రధాన మంత్రి కార్యాలయంలో కలిశారు. ఆంధ్రప్రదేశ్‌లోని గ్రామాల్లో తాగు నీరు ప్రజలకు సకాలంలో అందడం లేదని, కలుషిత నీరు ఎక్కువుగా ఉంటోందని, ప్రజల జీవన ప్రమాణ స్థాయిని పెంచి ఆరోగ్యవంతులుగా ఉంచాలంటే స్వఛ్చమైన తాగు నీరు అందించాల్సిన అవసరం ఉందని ప్రధానికి పవన్‌ కళ్యాణ్‌ వివరించారు. కేంద్ర జలజీవన్‌ మిషన్‌ ద్వారా ప్రస్తుతం చాలా గ్రామాల్లో తాగు నీరు అందిస్తున్నామని, ఈ పథకానికి ఇచ్చే నిధులు పెంచడంతో పాటు పథకం కాల పరిమితిని పెంచాలని కోరారు. అంతకు ముందు కేంద్ర మంత్రి భూపేందర్‌ యాదవ్‌ను పవన్‌ కళ్యాణ్‌ కలిశారు. పవన్‌ కళ్యాణ్‌ రెండు రోజుల ఢిల్లీ పర్యటనలో పలువురు కేంద్ర మంత్రులను కలిసి ఆర్థిక ఇబ్బందుల నుంచి ఏపీని గట్టెక్కించాలని, నిధులు ఇతోదికంగా ఇవ్వాలని కోరారు. తొలి సారిగా ఎక్కువ మంది కేంద్ర మంత్రులతో పవన్‌ కళ్యాణ్‌ భేటీ కావడం విశేషం. పవన్‌ కళ్యాణ్‌ను ఢిల్లీలో బీజేపీ ఏపీ అధ్యక్షురాలు పురందేశ్వరీ, టీడీపీ ఎంపీలు లావు శ్రీకృష్ణదేవరాయలు, మాగుంట శ్రీనివాసుల రెడ్డి కలిశారు.
