సదస్సులో మాట్లాడుతున్న ఎస్ఎఫ్ఐ జాతీయ అధ్యక్షుడు విపి. సాను

Constitution - SFI | రాజ్యాంగ హక్కుల కోసం మరో పోరాటం

రాజ్యాంగ హక్కులు మరింత బలహీనం అయ్యాయి. ప్రాథమిక హక్కుల కోసం ఉద్యమాలే శరణ్యమని ఎస్ఎఫ్ఐ జాతీయ నేత సాను గుర్తు చేశారు.

SSV Bhaskar Rao
28 Dec 2024 5:42 PM IST

దేశంలో బలహీనవర్గాల హక్కులు బలహీనంగా మారాయని ఎస్ఎఫ్ఐ (Student's Federation Of India - SFI) జాతీయ అధ్యక్షుడు విపి. సాను ఆందోళన వ్యక్తం చేశారు. దీనికోసం విద్యార్థులు మరో పోరాటానికి సమాయత్తం కావాలని ఆయన పిలుపునిచ్చారు. ఎస్ఎఫ్ఐ 55వ ఆవిర్భావ దినోత్సవం సందర్భంగా తిరుపతి శ్రీవేంకటేశ్వర విశ్వవిద్యాలయంలో "దేశంలో ప్రాథమిక హక్కులు, లౌకిక, సామ్యవాద విలువలు" అనే అంశాలపై శనివారం నిర్వహించిన సెమినార్ లో సాహు మాట్లాడారు.

వర్సిటీలోని ప్రకాశం భవన్ వద్ద ఎస్ఎఫ్ఐ ఆవిర్భావ దినోత్సవాలను SFI అఖిల భారత అధ్యక్షులు VP, సాను, రాష్ట్ర అధ్యక్షులు ప్రసన్నకుమార్, జిల్లా అధ్యక్షుడు అక్బర్ ఎస్ఎఫ్ఐ జెండా అవిష్కరించారు.

శ్రీవేంకటేశ్వర విశ్వవిద్యాలయం (SVU) SFI అధ్యక్షుడు నరేంద్ర అధ్యక్షతన జరిగిన సెమినార్లో విపి. సాను మాట్లాడుతూ, బీజేపీ సారధ్యంలో మళ్లీ ప్రభుత్వం ఏర్పడిన నాటి నుంచి దేశంలో రాజ్యాంగ విలువలుఉల్లంఘనలకు అడ్డు లేకుండా పోయిందన్నారు. విద్యారంగంలో ఎస్సీ, ఎస్టీ, బీసీ, మైనార్టీ విద్యార్థుల డ్రాప్ ఔట్ పెరిగాయని ఆయన ఆందోళన వ్యక్తం చేశారు. ప్రైవేట్, కార్పొరేట్ విద్యావ్యవస్థ వల్ల ఈ పరిస్థితి ఏర్పడిందన్నారు.

దేశంలో అసమానతలు పెరిగి దారిద్ర్యం ఎక్కువ అవుతోంది, దీనిని పట్టించుకోని పాలకులు మత రాజకీయాలకు ప్రాధాన్యం ఇస్తున్నారన్నారు. ఉన్నత విద్యా సంస్థల్లో కూడా అల్ప సంఖ్యాకవర్గాల అధ్యాపకులు చాలా తక్కువగా ఉన్నారని ఆవేదన చెందాు. ప్రధాని మోదీ ప్రభుత్వం నూతన విద్యా విధానం ద్వారా అసమానతలు సృష్టించి బడుగులకు విద్యను దూరం చేసిందనీ, దీనివల్ల కొన్ని వేల పాఠశాలలు మూత పడ్డాయన్నారు.

"బీజేపీ, ఆర్ఎస్ఎస్ సంస్థలకు రాజ్యాంగం విలువలు అంటే ఇష్టం ఉండదు. ప్రశ్నించే మానవహక్కుల కార్యకర్తలు, మేధావులను దేశద్రోహులుగా చిత్రీకరించి, ఏళ్ళ తరబడి జైళ్లకు పరిమితం చేస్తున్నారు" అని రాష్ట్ర అధ్యక్షులు ప్రసన్న కుమార్ ఆరోపించారు. విద్యార్థులకు ప్రైవేట్, కార్పొరేట్ రంగంలో కూడా విద్యాహక్కు చట్టం అమలు చేసి, రిజర్వేషన్లు కల్పిస్తేనే రాజ్యాంగంలోని సమానత్వం అనే మాటకు అర్థం ఉంటుందన్నారు.

మరో పోరాటం

ప్రాథమిక హక్కులు, లౌకిక, సామ్యవాద విలువలు రాజ్యాంగం మౌలిక సూత్రాలే ప్రజల గుండె చప్పుడు. వాటి కోసం విద్యార్థులు మరో రాజ్యాంగ పరిరక్షణ పోరాటాలకు సంసిద్ధం కావాలని ప్రసన్నకుమార్ పిలుపునిచ్చారు. జిల్లా కార్యదర్శి భగత్ రవి, జిల్లా మాజీ కార్యదర్శి మాధవ్ కృష్ణ, జిల్లా ఉపాధ్యక్షులు వినోద్, అశోక్, తేజ, సహాయకార్యదర్శి బాల, సుష్మిత, వీరేష్, మాట్లాడారు.