'శ్రమ కావ్యగానం' శ్రమ గొప్పదనం చూపించే అద్దం

తిరుపతి నగరం వేమన విజ్ఞాన కేంద్రం ఆధ్వర్యంలో ప్రముఖ సినీ రచయిత సుద్దాల అశోక తేజ శ్రమకావ్యం గానం కార్యక్రమాన్ని శుక్రవారం నిర్వహించారు. ఆ సంస్థ కార్యదర్శి మల్లారపు నాగార్జున అధ్యక్షతన జరిగిన కార్యక్రమానికి సిఇటియు రాష్ట్ర ప్రధాన కార్యదర్శి సిహెచ్ నర్సింగరావు ముఖ్యఅతిథిగా హాజరయ్యారు. ఈ సభలో సుద్దాల అశోక్ తేజ మాట్లాడుతూ, "తాపీ మేస్త్రీ" పనికి వెళ్లేటప్పుడే నాకు శ్రమ గొప్పతనం తెలిసింది. అప్పట్నుంచి శ్రమజీవులు పై పాటలు, కవితలు రాస్తూనే ఉన్నా" అని చెప్పారు.

"మహాభారతం కావ్యంలో నిండు సభలో ద్రౌపదికి వస్త్రాపహరణం జరిగితే శ్రీకృష్ణుడు చీర ఇచ్చినందుకు దేవుడయ్యాడు. అలాంటిది శ్రమ దారబోసి చీరలు తయారు చేస్తున్న చేనేత కార్మికుడు దేవుడు కాడా"? అని ప్రశ్నించారు.

శ్రమ దోపిడి ఎలా ఉందో ప్రస్తుతం చూస్తున్నామని సీఐటీయూ జిల్లా ప్రధాన కార్యదర్శి కందారపు మురళి అన్నారు. ఫిబ్రవరి 21వ తేదీ ప్రపంచ మాతృభాష దినోత్సవమే కాదు, 176 ఏళ్ల క్రితం కమ్యూనిస్టుల ప్రణాళికలు విడుదలైన రోజు అని గుర్తు చేశారు. కార్మిక వర్గానికి ఆయుధాన్ని అందించిన రోజన్నారు. తిరుమలలో అనునిత్యం సేవలందిస్తూ భక్తులకు మెరుగైన సౌకర్యాలు కల్పిస్తూ, ఆధ్యాత్మిక నగరాన్ని అందంగా తీర్చిదిద్దుతున్నది, శేషాచల అడువులను పచ్చంగా పరిరక్షిస్తున్నది ఫారెస్ట్ కార్మికులనని, స్వచ్ఛ సర్వేక్షణ అవార్డులు అందుకుంటున్న అధికారులు, పాలక మండలి పెద్దలు కాదని తెలిపారు. కానీ అలాంటి కార్మికులకు గుర్తింపు లేదు, వారి శ్రమకు విలువ లేదు, పదిమంది చేసే పనిని 25 మంది కార్మికులు లేకపోతే చేపిస్తున్నారు, ఒక రెగ్యులర్ ఉద్యోగికి ఇచ్చే వేతనముతోనే పదిమంది కాంట్రాక్ట్ కార్మికులకు వేతనాలు ఇస్తున్నారని తెలిపారు. మూడు రోజుల క్రితం తిరుపతి కేంద్రంగా జరిగిన ఇంటర్నేషనల్ సదస్సులో ఆదాయంపై చర్చి జరిగిందని, ఆధ్యాత్మికతను అడ్డుపెట్టుకొని కార్పొరేట్ శక్తులకు కోట్లాది రూపాయలు ఎలా దోచి పెట్టాలి అనే తీరున జరిగిందన్నారు. ఈ తరుణంలో శ్రమను గుర్తిస్తూ సుద్దాల అశోక తేజ రచించిన శ్రమ కావ్య గానాన్ని ఏర్పాటు చేయడం అభినందనీయమన్నారు. సభాధ్యక్షులు మల్లారపు నాగర్జున మాట్లాడుతూ, 58వ శ్రమ కావ్య గానంలో సమాజ పరిణామక్రమాన్ని అణువణువునా అధ్యయనం చేసిన సుద్దాల అశోక్ తేజ నిరసించారన్నారు. సమాధుల ఉన్న సమస్త కావ్యాలకు శ్రమ గొప్పతనాన్ని, మూలాన్ని జోడించి ఈ కావ్యం ద్వారా సుద్దాల అశోక్ తేజ వెల్లడించారన్నారు. అనంతరం తన గానం ద్వారా తానే రచించిన శ్రమ కావ్యాన్ని సుద్దాల అశోక తేజ గానం చేసి, ప్రేక్షకులను అల్లరింపజేశారు, ఆలోచింపజేశారు. వేమన విజ్ఞాన కేంద్రం గౌరవ అధ్యక్షులు టెంకాయల దామోదరం, సుద్దాల అశోక్ తేజ సతీమణి నిర్మల, పలువురు కవులు రచయితలు, సాహితివేత్తలు పాల్గొన్నారు.